“ಕುಟುಂಬಕ್ಕೆ ಹೊರೆಯಾಗಬಾರದೆಂದು ಜೀವನ ಅಂತ್ಯಗೊಳಿಸುತ್ತಿದ್ದೇವೆ” ಎಂದು ಪತ್ರ: ತ್ರಿಶೂರ್‌ನಲ್ಲಿ ದಂಪತಿ ಶವವಾಗಿ ಪತ್ತೆ

ಕೋಡನ್ನೂರಿನಲ್ಲಿ ಘಟನೆ; ಪಾರ್ಶ್ವವಾಯುವಿನಿಂದ ಸತ್ಯನ್‌, ಕಿಡ್ನಿ ಕಾಯಿಲೆಯಿಂದ ಕುಮಾರಿ ಚಿಕಿತ್ಸೆ ಪಡೆಯುತ್ತಿದ್ದರು

ತ್ರಿಶೂರ್: ಕೇರಳದ ತ್ರಿಶೂರ್ ಜಿಲ್ಲೆಯ ಕೋಡನ್ನೂರಿನಲ್ಲಿ ದಂಪತಿ ಮನೆಯೊಳಗೆ ಶವವಾಗಿ ಪತ್ತೆಯಾಗಿದ್ದಾರೆ. ವಡಕ್ಕೆಪುರಕ್ಕಲ್ ಮನೆಯ ಸತ್ಯನ್ (66) ಮತ್ತು ಅವರ ಪತ್ನಿ ಕುಮಾರಿ (59) ಮೃತಪಟ್ಟವರು.

ಕೋಡನ್ನೂರು ಪುತ್ತನ್‌ವೆಟ್ಟು ವಳಿಯಲ್ಲಿರುವ ತಮ್ಮ ಮನೆಯಲ್ಲಿ ದಂಪತಿ ಮೃತಪಟ್ಟ ಸ್ಥಿತಿಯಲ್ಲಿ ಪತ್ತೆಯಾಗಿದ್ದಾರೆ. “ಕುಟುಂಬಕ್ಕೆ ಹೊರೆಯಾಗಬಾರದೆಂದು ಜೀವನ ಅಂತ್ಯಗೊಳಿಸುತ್ತಿದ್ದೇವೆ” ಎಂದು ಬರೆದಿರುವ ಪತ್ರವೂ ಸ್ಥಳದಲ್ಲಿ ಪತ್ತೆಯಾಗಿದೆ ಎಂದು ವರದಿಯಾಗಿದೆ.

ಸತ್ಯನ್ ಅವರು ಪಾರ್ಶ್ವವಾಯುವಿಗೆ ಒಳಗಾಗಿ ಚಿಕಿತ್ಸೆ ಪಡೆಯುತ್ತಿದ್ದರು. ಕುಮಾರಿ ಕೂಡ ಕಿಡ್ನಿ ಕಾಯಿಲೆಗೆ ಚಿಕಿತ್ಸೆ ಪಡೆಯುತ್ತಿದ್ದರು ಎನ್ನಲಾಗಿದೆ.

ಶನಿವಾರ ಮುಂಜಾನೆ ಸುಮಾರು 3 ಗಂಟೆಯ ವೇಳೆಗೆ ಈ ಘಟನೆ ನಡೆದಿದೆ. ದಂಪತಿಯ ಮಗ ಮತ್ತು ಸೊಸೆ ಚೋಟ್ಟಾನಿಕ್ಕರ ದೇವಸ್ಥಾನಕ್ಕೆ ದರ್ಶನಕ್ಕೆ ತೆರಳಿದ್ದರು. ಅವರು ಮುಂಜಾನೆ ಮನೆಗೆ ಮರಳಿದಾಗ ದಂಪತಿ ಮೃತಪಟ್ಟಿರುವುದು ಬೆಳಕಿಗೆ ಬಂದಿದೆ.

ಮಾಹಿತಿ ತಿಳಿದ ತಕ್ಷಣ ಚೇರ್ಪು ಪೊಲೀಸರು ಸ್ಥಳಕ್ಕೆ ಆಗಮಿಸಿ ಮುಂದಿನ ಕ್ರಮ ಕೈಗೊಂಡಿದ್ದಾರೆ.