ಕುಂಬಳೆ ಉಪಜಿಲ್ಲಾ ಶಾಲಾ ಕಲೋತ್ಸವದ ಲಾಂಛನ ಬಿಡುಗಡೆ, ಬಟ್ಟೆ ಚೀಲಗಳ ಹಸ್ತಾಂತರ

ಬದಿಯಡ್ಕ: ಕುಂಬಳೆ ಉಪಜಿಲ್ಲಾ ಶಾಲಾ ಕಲೋತ್ಸವದ ಲಾಂಛನವನ್ನು ಬಿಡುಗಡೆಗೊಳಿಸಲಾಯಿತು. ಬದಿಯಡ್ಕ ನವಜೀವನ ಹೈಯರ್ ಸೆಕೆಂಡರಿ ಶಾಲೆಯಲ್ಲಿ ನಡೆದ ಸಮಾರಂಭದಲ್ಲಿ ಜಿಲ್ಲಾ ಪಂಚಾಯಿತಿ ಸದಸ್ಯ ರಾಮಪ್ಪ ಮಂಜೇಶ್ವರ ಲಾಂಛನವನ್ನು ಅನಾವರಣಗೊಳಿಸಿದರು. 

ಪಿಟಿಎ ಅಧ್ಯಕ್ಷ ಹಮೀದ್ ಕಡಂಜಿ ಅಧ್ಯಕ್ಷತೆ ವಹಿಸಿದ್ದರು. ಪಂಚಾಯಿತಿ ಉಪಾಧ್ಯಕ್ಷೆ ಹಾಗೂ ವಾರ್ಡ್ ಸದಸ್ಯೆ ಅಶ್ವಿನಿ ಕೆ.ಎಂ., ಆರೋಗ್ಯ ಮತ್ತು ಶಿಕ್ಷಣ ಸ್ಥಾಯಿ ಸಮಿತಿ ಅಧ್ಯಕ್ಷ ಅವಿನಾಶ್ ರೈ, ಗ್ರಾಮ ಪಂಚಾಯಿತಿ ಸದಸ್ಯರಾದ ಶ್ಯಾಮಪ್ರಸಾದ್ ಮಾನ್ಯ, ಶ್ಯಾಮಪ್ರಸಾದ್ ಸರಳಿ, ಉಪಜಿಲ್ಲಾ ಶಿಕ್ಷಣಾಧಿಕಾರಿ ಎಂ. ಅಶೋಕ್, ಶಾಲಾ ಪ್ರಾಂಶುಪಾಲ ಎಂ. ಜೀಕೃಷ್ಣ, ಮುಖ್ಯೋಪಾಧ್ಯಾಯಿನಿ ಟಿ.ಎಚ್. ಶಾಹಿದಾ ಬೀಬಿ, ಆನಂದ ಮೌವ್ವಾರ್, ಶಫಿ ಚೂರಿಪಳ್ಳಂ, ಶರೀಫ್ ಪಾಲಕ್ಕಾರ್ ಹಾಗೂ ಕೆ. ಪ್ರಭಾಕರನ್ ನಾಯರ್, ಪಿ. ಸಿಂಧು ಮೊದಲಾದವರು ಮಾತನಾಡಿದರು.

ಶಾಲೆಯ ಹಳೆಯ ವಿದ್ಯಾರ್ಥಿ ಸಿ.ಎಚ್. ದೀಕ್ಷಿತ್ ಅವರು ಸಿದ್ಧಪಡಿಸಿದ ಲಾಂಛನವನ್ನು ಆಯ್ಕೆ ಮಾಡಲಾಯಿತು. ಶಿಕ್ಷಕ ವೃಂದದವರು ಕಾರ್ಯಕ್ರಮದ ನೇತೃತ್ವ ವಹಿಸಿದ್ದರು.

ಅಕ್ಟೋಬರ್ 26,  27 ಹಾಗೂ ನವೆಂಬರ್ 2, 3 ಮತ್ತು 4ರಂದು ನವಜೀವನ ಹೈಯರ್ ಸೆಕೆಂಡರಿ ಶಾಲೆಯಲ್ಲಿ ಉಪಜಿಲ್ಲಾ ಕಲೋತ್ಸವ ನಡೆಯಲಿದೆ.

ಕಲೋತ್ಸವದ ಅಂಗವಾಗಿ ಬಟ್ಟೆ ಚೀಲಗಳ ವಿತರಣೆ:

ಕುಂಬಳೆ ಉಪಜಿಲ್ಲಾ ಶಾಲಾ ಕಲೋತ್ಸವ ಆರಂಭಕ್ಕೂ ಮುನ್ನವೇ ವಿವಿಧ ವೇದಿಕೆಗಳಿಗೆ ಬಟ್ಟೆ ಚೀಲಗಳನ್ನು ತಲುಪಿಸುವ ಕಾರ್ಯಕ್ಕೆ ಚಾಲನೆ ನೀಡಲಾಗಿದೆ. ಮುಳ್ಳೇರಿಯದ ಏಯುಪಿ ಶಾಲೆಯ ನಿವೃತ್ತ ಶಿಕ್ಷಕಿ ಎಂ. ಸಾವಿತ್ರಿ ಟೀಚರ್ ಅವರು ಈ ಬಟ್ಟೆ ಚೀಲಗಳನ್ನು ಶಾಲೆಯ ಸೀಡ್ ಕ್ಲಬ್‍ಗೆ ಹಸ್ತಾಂತರಿಸಿದರು.

ಶಾಲಾ ಕಲೋತ್ಸವಗಳಲ್ಲಿ ಕಾರ್ಯಕ್ರಮ ಸಮಿತಿಗೆ ಸಂಬಂಧಿಸಿದ ವಿವಿಧ ಕಾರ್ಯಗಳಿಗೆ ನೂರಾರು ಬಟ್ಟೆ ಚೀಲಗಳ ಅಗತ್ಯವಿರುತ್ತದೆ. ಈ ಚೀಲಗಳನ್ನು ಸಾವಿತ್ರಿ ಟೀಚರ್ ಅವರ ನೇತೃತ್ವದಲ್ಲಿ ಶಾಲೆಯ ಸೀಡ್ ಕ್ಲಬ್ ಸಿದ್ಧಪಡಿಸುತ್ತಿದೆ.

ಕುಂಬಳೆ ಉಪಜಿಲ್ಲಾ ಕಲೋತ್ಸವ ಎಲ್ಲೇ ನಡೆದರೂ, ಮುಂಚಿತವಾಗಿಯೇ ಬಟ್ಟೆ ಚೀಲಗಳನ್ನು ತಲುಪಿಸುವುದು ಹಲವು ವರ್ಷಗಳಿಂದ ಸಾವಿತ್ರಿ ಟೀಚರ್ ಅವರ ಸಂಪ್ರದಾಯವಾಗಿದೆ. ಪರಿಸರ ಸಂರಕ್ಷಣಾ ಚಟುವಟಿಕೆಗಳಿಗಾಗಿ ಅವರಿಗೆ ಸರ್ಕಾರದ ವನಮಿತ್ರ ಪ್ರಶಸ್ತಿ ಸೇರಿದಂತೆ ಹಲವು ಗೌರವಗಳು ಲಭಿಸಿವೆ.

ಸೀಡ್ ಕ್ಲಬ್ ಸದಸ್ಯೆಯಾದ ಶಿಕ್ಷಕಿ ಉಷಾ ಕುಮಾರಿ ಹಾಗೂ ವಿದ್ಯಾರ್ಥಿಗಳಾದ ಎಸ್. ಆರ್ಯ ಮತ್ತು ಬಿ. ಲಕ್ಷ್ಯ ಅವರೊಂದಿಗೆ ಆಗಮಿಸಿದ ಸಾವಿತ್ರಿ ಟೀಚರ್, ಬಟ್ಟೆ ಚೀಲಗಳನ್ನು ಶಾಲೆಗೆ ಹಸ್ತಾಂತರಿಸಿದರು.