ಮೊಗ್ರಾಲ್‌ನಲ್ಲಿ ಮಿತಿ ಮೀರಿದ ಬೀದಿ ನಾಯಿಗಳ ಹಾವಳಿ: ಸಾಕುಪ್ರಾಣಿಗಳ ಬಳಿಕ ಪತ್ರಿಕೆಗಳ ಕಟ್ಟುಗಳಿಗೂ ಕಂಟಕ; ಪಂಚಾಯತ್ ನಿರ್ಲಕ್ಷ್ಯಕ್ಕೆ ಜನಾಕ್ರೋಶ

 ಕುಂಬಳೆ: ಮೊಗ್ರಾಲ್ ಪೇಟೆ ಹಾಗೂ ಪರಿಸರದ ಪ್ರದೇಶಗಳಲ್ಲಿ ಬೀದಿ ನಾಯಿಗಳ ಉಪಟಳ ಮಿತಿಮೀರಿದ್ದು, ಸಾರ್ವಜನಿಕರು ತೀವ್ರ ಭೀತಿಯಲ್ಲಿ ದಿನದೂಡುವ ಪರಿಸ್ಥಿತಿ ನಿರ್ಮಾಣವಾಗಿದೆ. ಈ ಹಿಂದೆ ಹಲವು ಸಾಕುಪ್ರಾಣಿಗಳನ್ನು ಕೊಂದು ಹಾಕಿದ್ದ ಬೀದಿ ನಾಯಿಗಳ ಹಿಂಡು, ಇದೀಗ ಮುಂಜಾನೆ ಅಂಗಡಿಗಳ ಮುಂದೆ ಇರಿಸಲಾಗಿದ್ದ ದಿನಪತ್ರಿಕೆಗಳ ಕಟ್ಟುಗಳನ್ನು ಹರಿದು ಹಾಕಿ ವಿಕೃತಿ ಮೆರೆದಿದೆ.

ಸೋಮವಾರ ಮುಂಜಾನೆ ವೇಳೆ ಗುಂಪಾಗಿ ಬಂದ ನಾಯಿಗಳು ಮೊಗ್ರಾಲ್ ಪೇಟೆಯ ವಿವಿಧ ಅಂಗಡಿಗಳ ಮುಂದೆ ವಿತರಣೆಗಾಗಿ ಇಟ್ಟಿದ್ದ ಪತ್ರಿಕೆಗಳ ಬಂಡಲ್‌ಗಳ ಮೇಲೆ ದಾಳಿ ನಡೆಸಿ, ಹಾಳೆಗಳನ್ನು ಎಳೆದಾಡಿ ತಿಂದು ಹಾಕಿವೆ. ಇದರಿಂದ ಪತ್ರಿಕಾ ವಿತರಕರಿಗೆ ಭಾರಿ ನಷ್ಟ ಸಂಭವಿಸಿದ್ದು, ಗ್ರಾಹಕರಿಗೆ ಸಕಾಲಕ್ಕೆ ಪತ್ರಿಕೆ ತಲುಪಿಸಲಾಗದೆ ಪರದಾಡುವಂತಾಗಿದೆ.

ಸಾರ್ವಜನಿಕರ ಸಂಚಾರ ದುಸ್ತರ: ಹೆಚ್ಚಿದ ಭಯ

ಮೊಗ್ರಾಲ್ ಪೇಟೆ ಹಾಗೂ ಸುತ್ತಮುತ್ತಲ ರಸ್ತೆಗಳಲ್ಲಿ ಹಿಂಡುಹಿಂಡಾಗಿ ಅಡ್ಡಾಡುವ ನಾಯಿಗಳು ಪಾದಚಾರಿಗಳು ಹಾಗೂ ದ್ವಿಚಕ್ರ ವಾಹನ ಸವಾರರನ್ನು ಬೆನ್ನಟ್ಟುತ್ತಿವೆ. ಇದರಿಂದಾಗಿ ಮುಂಜಾನೆ ವಾಯುವಿಹಾರಕ್ಕೆ ತೆರಳುವ ಹಿರಿಯ ನಾಗರಿಕರು, ಶಾಲೆಗೆ ತೆರಳುವ ಪುಟ್ಟ ಮಕ್ಕಳು, ನಿತ್ಯ ಉದ್ಯೋಗಿಗಳು ಹಾಗೂ ದಿನಪತ್ರಿಕೆ ವಿತರಕರು ರಸ್ತೆಯಲ್ಲಿ ಸಂಚರಿಸಲು ಹಿಂದೇಟು ಹಾಕುವ ವಾತಾವರಣ ಉಂಟಾಗಿದೆ. ಈಗಾಗಲೇ ಹಲವು ಮನೆಗಳ ಸಾಕುಪ್ರಾಣಿಗಳು ಈ ನಾಯಿಗಳ ಹಿಂಡಿಗೆ ಬಲಿಯಾಗಿವೆ.

ನ್ಯಾಯಾಲಯದ ಆದೇಶಕ್ಕೂ ಕಿಮ್ಮತ್ತಿಲ್ಲ; ಆಶ್ರಯ ಕೇಂದ್ರವೂ ಅನಿಶ್ಚಿತ

ಸಾರ್ವಜನಿಕರ ಜೀವ ಮತ್ತು ಆಸ್ತಿಪಾಸ್ತಿಗೆ ಹಾನಿಯಾಗದಂತೆ ಬೀದಿ ನಾಯಿಗಳ ನಿಯಂತ್ರಣಕ್ಕೆ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಬೇಕೆಂದು ಸರ್ವೋಚ್ಚ ನ್ಯಾಯಾಲಯ ಹಾಗೂ ಹೈಕೋರ್ಟ್ ಮಹತ್ವದ ನಿರ್ದೇಶನಗಳನ್ನು ನೀಡಿವೆ. ಆದರೆ ಸ್ಥಳೀಯಾಡಳಿತ ಸಂಸ್ಥೆಗಳು ಈ ಕುರಿತು ಜಾಣಕುರುಡು ಪ್ರದರ್ಶಿಸುತ್ತಿವೆ ಎಂಬ ಗಂಭೀರ ಆರೋಪ ಕೇಳಿಬಂದಿದೆ.

ಬೀದಿ ನಾಯಿಗಳ ಸಂತಾನೋತ್ಪತ್ತಿ ನಿಯಂತ್ರಣ (ಎಬಿಸಿ ಯೋಜನೆ), ವ್ಯಾಕ್ಸಿನೇಷನ್ ಹಾಗೂ ಪ್ರತ್ಯೇಕ ಆಶ್ರಯ ಕೇಂದ್ರಗಳ ನಿರ್ಮಾಣದ ಭರವಸೆಗಳು ಕೇವಲ ಕಾಗದದಲ್ಲೇ ಉಳಿದಿವೆ. ಜಿಲ್ಲೆಯಲ್ಲಿ ನಿರ್ಮಿಸಲಾಗಿರುವ ಏಕೈಕ ಪ್ರಾಣಿ ಆಶ್ರಯ ಕೇಂದ್ರವು ಜನವಸತಿ ಪ್ರದೇಶದಲ್ಲಿದೆ ಎಂಬ ಕಾರಣಕ್ಕೆ ಸ್ಥಳೀಯರ ವಿರೋಧ ವ್ಯಕ್ತವಾಗಿದ್ದು, ಅದರ ಕಾರ್ಯಾಚರಣೆಯೂ ಅನಿಶ್ಚಿತತೆಗೆ ಸಿಲುಕಿದೆ.

ಪಂಚಾಯತ್‌ಗೆ ದೂರು ನೀಡಿದರೂ ಸ್ಪಂದನೆಯಿಲ್ಲ

ಮೊಗ್ರಾಲ್ ಪ್ರದೇಶದಲ್ಲಿ ಬೀದಿ ನಾಯಿಗಳ ಉಪಟಳದ ಕುರಿತು ಕುಂಬಳೆ ಗ್ರಾಮ ಪಂಚಾಯತ್ ಆಡಳಿತಕ್ಕೆ ಹಲವು ಬಾರಿ ಮನವಿ ಸಲ್ಲಿಸಿದರೂ ಯಾವುದೇ ಪ್ರಯೋಜನವಾಗಿಲ್ಲ ಎಂದು ಗ್ರಾಮಸ್ಥರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಕೂಡಲೇ ವೈಜ್ಞಾನಿಕ ಕ್ರಮಗಳನ್ನು ಕೈಗೊಂಡು ಬೀದಿ ನಾಯಿಗಳನ್ನು ನಿಯಂತ್ರಿಸದಿದ್ದರೆ ಮುಂದಿನ ದಿನಗಳಲ್ಲಿ ಭಾರೀ ಅನಾಹುತಗಳು ಸಂಭವಿಸುವ ಸಾಧ್ಯತೆಯಿದೆ ಎಂದು ಸ್ಥಳೀಯರು ಎಚ್ಚರಿಸಿದ್ದಾರೆ.

"ಬೀದಿ ನಾಯಿಗಳ ಹಾವಳಿಯಿಂದಾಗಿ ಮುಂಜಾನೆ ಮನೆ-ಮನೆಗೆ ಪತ್ರಿಕೆ ವಿತರಿಸಲು ತೀವ್ರ ಆತಂಕವಾಗುತ್ತಿದೆ. ಈ ಮಧ್ಯೆ ನಾನು ವಿತರಿಸಲು ತಂದಿಟ್ಟಿದ್ದ ಪತ್ರಿಕೆಗಳ ಬಂಡಲ್‌ಗಳನ್ನು ನಾಯಿಗಳು ಸಂಪೂರ್ಣವಾಗಿ ಹರಿದು ಹಾಕಿ ಭಾರೀ ನಷ್ಟ ಉಂಟುಮಾಡಿವೆ. ಸಂಬಂಧಪಟ್ಟ ಅಧಿಕಾರಿಗಳು ಕೂಡಲೇ ನಾಯಿಗಳ ನಿಯಂತ್ರಣಕ್ಕೆ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಬೇಕು."

— ಮೂಸಾ, ನಷ್ಟಕ್ಕೊಳಗಾದ ಪತ್ರಿಕಾ ವಿತರಕ