‘ಅಣ್ಣಾ ಕ್ಷಮಿಸಿ...’: ಕದ್ದ ಏಣಿಯನ್ನು ಕ್ಷಮಾಪಣಾ ಪತ್ರದೊಂದಿಗೆ ವಾಪಸ್ ತಂದಿಟ್ಟ ಕಳ್ಳರು!

ಅರುವಿಕ್ಕರ: ಮಳಿಗೆಯ ಮುಂಭಾಗದಿಂದ ಕಳವು ಮಾಡಿಕೊಂಡು ಹೋಗಿದ್ದ ಅಲ್ಯೂಮಿನಿಯಂ ಏಣಿಯನ್ನು ಕಳ್ಳರು ಕ್ಷಮಾಪಣಾ ಪತ್ರದ ಸಮೇತ ಅಂಗಡಿಯ ಮುಂದೆಯೇ ತಂದಿಟ್ಟು ಹೋಗಿರುವ ಅಪರೂಪದ ಹಾಗೂ ಕೌತುಕದ ಘಟನೆ ಕೇರಳದ ಅರುವಿಕ್ಕರ ಸಮೀಪದ ವಟ್ಟಕ್ಕುಳಂನಲ್ಲಿ ನಡೆದಿದೆ. 

ವಟ್ಟಕ್ಕುಳಂನ ‘ಎಂ.ಕೆ. ಪವರ್ ಟೂಲ್ಸ್’ ಎಂಬ ಉಪಕರಣಗಳನ್ನು ಬಾಡಿಗೆಗೆ ನೀಡುವ ಮಳಿಗೆಯಿಂದ ಅಕ್ಟೋಬರ್ 27 ರಂದು ಹೊಸ ಅಲ್ಯೂಮಿನಿಯಂ ಏಣಿ ಕಳವಾಗಿತ್ತು. ಆದರೆ, ಅಕ್ಟೋಬರ್ 30 ರ ಮಧ್ಯಾಹ್ನ ಅದೇ ಏಣಿಯನ್ನು ಕ್ಷಮಾಪಣಾ ಪತ್ರದೊಂದಿಗೆ ಮಳಿಗೆಯ ಮುಂಭಾಗದಲ್ಲೇ ತಂದಿಡಲಾಗಿದೆ.

ಸಿಸಿಟಿವಿಯಲ್ಲಿ ಸೆರೆಯಾಗಿದ್ದ ಕಳ್ಳತನ; ವಾಟ್ಸಾಪ್‌ನಲ್ಲಿ ವೈರಲ್

ಅಕ್ಟೋಬರ್ 29 ರಂದು ಮಳಿಗೆಯ ಮುಂಭಾಗ ಇರಿಸಿದ್ದ ಏಣಿ ಕಾಣೆಯಾಗಿರುವುದನ್ನು ಗಮನಿಸಿದ ಮಾಲೀಕ ಅನ್ವರ್, ಸಿಸಿಟಿವಿ ಕ್ಯಾಮೆರಾ ದೃಶ್ಯಗಳನ್ನು ಪರಿಶೀಲಿಸಿದ್ದರು. ಅಕ್ಟೋಬರ್ 27 ರಂದು ಮಧ್ಯಾಹ್ನ ಅನ್ವರ್ ಮತ್ತು ಅವರ ಪತ್ನಿ ಜಸೀನಾ ಮಳಿಗೆ ಪಕ್ಕದಲ್ಲೇ ಇರುವ ತಮ್ಮ ಮನೆಗೆ ಊಟಕ್ಕೆ ತೆರಳಿದ್ದ ವೇಳೆ, ಪಾರಶ್ಶಾಲಾ ನೋಂದಣಿ ಸಂಖ್ಯೆಯ ಬೈಕ್‌ನಲ್ಲಿ ಬಂದ ಮೂವರು ವ್ಯಕ್ತಿಗಳು ಏಣಿಯನ್ನು ಹೊತ್ತೊಯ್ದಿರುವುದು ದೃಶ್ಯಗಳಲ್ಲಿ ಸ್ಪಷ್ಟವಾಗಿ ದಾಖಲಾಗಿತ್ತು. ಈ ಸಂಬಂಧ ಮಾಲೀಕರು ಅರುವಿಕ್ಕರ ಪೊಲೀಸ್ ಠಾಣೆಗೆ ದೂರು ನೀಡಿದ್ದರು.

ಇದರ ನಡುವೆ ಕಳ್ಳರು ಏಣಿಯೊಂದಿಗೆ ಬೈಕ್‌ನಲ್ಲಿ ಪರಾರಿಯಾಗುವ ಸಿಸಿಟಿವಿ ದೃಶ್ಯಾವಳಿಗಳು ಅರುವಿಕ್ಕರ ಭಾಗದ ಸ್ಥಳೀಯ ವಾಟ್ಸಾಪ್ ಗ್ರೂಪ್‌ಗಳಲ್ಲಿ ಭಾರಿ ವೈರಲ್ ಆಗಿದ್ದವು. ಪೊಲೀಸರ ತನಿಖೆ ತೀವ್ರಗೊಂಡ ಹಿನ್ನೆಲೆಯಲ್ಲಿ ಹಾಗೂ ದೃಶ್ಯಗಳು ವೈರಲ್ ಆಗಿ ಸಿಕ್ಕಿಬೀಳುವ ಭೀತಿಯಿಂದ ಕಳ್ಳರು ಈ ಹೆಜ್ಜೆ ಇಟ್ಟಿದ್ದಾರೆ ಎನ್ನಲಾಗಿದೆ.

‘ಅಣ್ಣಾ ಸಾರಿ...’ ಕ್ಷಮಾಪಣಾ ಪತ್ರದಲ್ಲೇನಿತ್ತು?

ಅಕ್ಟೋಬರ್ 30 ರಂದು ಮಧ್ಯಾಹ್ನ ಯಾರ ಕಣ್ಣಿಗೂ ಬೀಳದಂತೆ ಏಣಿಯನ್ನು ಮಳಿಗೆಯ ಮುಂದೆ ತಂದಿರಿಸಿ, ಅದರ ಪಕ್ಕದಲ್ಲೇ ಒಂದು ಪತ್ರವನ್ನಿಟ್ಟು ಕಳ್ಳರು ಪರಾರಿಯಾಗಿದ್ದಾರೆ.

ಪತ್ರದಲ್ಲಿ, "ಅಣ್ಣಾ ಕ್ಷಮಿಸಿ (ಸಾರಿ)... ಗುಂಡಿಗೆ ಬಿದ್ದಿದ್ದ ವಸ್ತುವೊಂದನ್ನು ಮೇಲಕ್ಕೆತ್ತಲು ತುರ್ತಾಗಿ ಏಣಿ ಬೇಕಾಗಿದ್ದರಿಂದ ತೆಗೆದುಕೊಂಡು ಹೋಗಿದ್ದೆವು. ಅಂದೇ ವಾಪಸ್ ತಂದಿಡಬೇಕೆಂದುಕೊಂಡಿದ್ದೆವು, ಆದರೆ ತುರ್ತಾಗಿ ಬೇರೆ ಊರಿಗೆ ಹೋಗಬೇಕಾಯಿತು. ದಯವಿಟ್ಟು ವಿಡಿಯೋವನ್ನು ವೈರಲ್ ಮಾಡಬೇಡಿ. ನಮ್ಮ ಬದುಕು ಅತ್ತ ದರಿ, ಇತ್ತ ಪುಲಿ ಎಂಬಂತಾಗಿದೆ; ಆತ್ಮಹತ್ಯೆಯ ಅಂಚಿನಲ್ಲಿದ್ದೇವೆ..." ಎಂದು ಬರೆದು, ಕೊನೆಯಲ್ಲಿ ಮೂರು ಬಾರಿ ‘ಸಾರಿ, ಸಾರಿ, ಸಾರಿ’ ಎಂದು ಕ್ಷಮೆಯಾಚಿಸಿದ್ದಾರೆ.

ಕದ್ದ ಏಣಿ ವಾಪಸ್ ಸಿಕ್ಕಿರುವ ಹಿನ್ನೆಲೆಯಲ್ಲಿ ಪ್ರಕರಣದ ಮುಂದಿನ ಕಾನೂನು ಕ್ರಮ ಬೇಡವೆಂದು ಅಂಗಡಿ ಮಾಲೀಕರು ನಿರ್ಧರಿಸಿದ್ದಾರೆ.