ಕೇರಳ ಪಿಎಸ್‌ಸಿ ನೇಮಕಾತಿ ಹಗರಣ: ಹೈಕೋರ್ಟ್ ಚಾಟಿ ಬೆನ್ನಲ್ಲೇ ಅಧ್ಯಕ್ಷರು, ಸದಸ್ಯರ ವಿರುದ್ಧ ಎಫ್‌ಐಆರ್ ದಾಖಲಿಸಿದ ಎಸ್‌ಐಟಿ; ಸಿಪಿಎಂ ನಂಟು ಬಹಿರಂಗ

ತಿರುವನಂತಪುರಂ: ಕೇರಳ ಹೈಕೋರ್ಟ್‌ನ ಕಟ್ಟುನಿಟ್ಟಿನ ಆದೇಶದ ಬೆನ್ನಲ್ಲೇ, ಸಾರ್ವಜನಿಕ ಸೇವಾ ಆಯೋಗದ (ಪಿಎಸ್‌ಸಿ) ಅಧ್ಯಕ್ಷರು ಹಾಗೂ ಸದಸ್ಯರನ್ನು ಆರೋಪಿಗಳನ್ನಾಗಿ ಹೆಸರಿಸಿ ಐಜಿ ಅಜಿತಾ ಬೇಗಂ ನೇತೃತ್ವದ ವಿಶೇಷ ತನಿಖಾ ದಳ (ಎಸ್‌ಐಟಿ) ಕ್ರಿಮಿನಲ್ ಮೊಕದ್ದಮೆ ದಾಖಲಿಸಿದೆ. ಮೀನುಗಾರಿಕಾ ಇಲಾಖೆಯ ‘ಫಿಶರೀಸ್ ಎಕ್ಸ್‌ಟೆನ್ಶನ್ ಆಫೀಸರ್’ ಹುದ್ದೆಗಳ ನೇಮಕಾತಿಯಲ್ಲಿ ನಡೆದ ಬೃಹತ್ ಅಕ್ರಮಕ್ಕೆ ಸಂಬಂಧಿಸಿದಂತೆ ಆಯೋಗದ ಉನ್ನತಾಧಿಕಾರಿಗಳ ವಿರುದ್ಧವೇ ಈ ತನಿಖೆ ಆರಂಭವಾಗಿದೆ.

ಪಿಎಸ್‌ಸಿ ಅಧಿಕಾರಿಗಳು ಮಾತ್ರವಲ್ಲದೆ, ಆಡಳಿತರೂಢ ಸಿಪಿಎಂ ಪಕ್ಷದ ಆಪ್ತರು ಮತ್ತು ಬೆಂಬಲಿಗ ಅಧಿಕಾರಿಗಳೂ ಈ ನೇಮಕಾತಿ ದಂಧೆಯಲ್ಲಿ ಶಾಮೀಲಾಗಿರುವುದನ್ನು ಕ್ರೈಂ ಬ್ರಾಂಚ್ ಪತ್ತೆಹಚ್ಚಿದೆ. ಪಿಎಸ್‌ಸಿ ಅಕ್ರಮಗಳಲ್ಲಿ ಸಿಪಿಎಂ ಪಕ್ಷದ ನಂಟನ್ನು ತನಿಖಾ ಸಂಸ್ಥೆ ಬಹಿರಂಗಪಡಿಸಿರುವುದು ಇದೇ ಮೊದಲು.

ಅರ್ಹರ ವಂಚಿಸಿ ಆಪ್ತರಿಗೆ ಉನ್ನತ ರ್ಯಾಂಕ್: ಎಫ್‌ಐಆರ್ ಮುಖ್ಯಾಂಶಗಳು

ಕೊಚ್ಚಿಯ ಫಿಶರೀಸ್ ಮತ್ತು ಸಾಗರ ಅಧ್ಯಯನ ವಿಶ್ವವಿದ್ಯಾಲಯದ (ಕುಫೋಸ್) ಕೆಲ ಆಯ್ದ ಅಭ್ಯರ್ಥಿಗಳಿಗೆ ನಿಯಮಬಾಹಿರವಾಗಿ ಪ್ರಥಮ ರ್ಯಾಂಕ್‌ಗಳನ್ನು ನೀಡಿ ಅರ್ಹ ಅಭ್ಯರ್ಥಿಗಳ ಭವಿಷ್ಯವನ್ನು ಕಸಿದುಕೊಳ್ಳಲಾಗಿದೆ ಎಂದು ಎಫ್‌ಐಆರ್‌ನಲ್ಲಿ ಆರೋಪಿಸಲಾಗಿದೆ.

• ವಿಶ್ವಾಸದ್ರೋಹ ಹಾಗೂ ಭ್ರಷ್ಟಾಚಾರ: ಸಾರ್ವಜನಿಕ ಸೇವಕರಾಗಿ ತಮ್ಮ ಮೇಲೆ ಇರಿಸಲಾಗಿದ್ದ ಸಾಂವಿಧಾನಿಕ ಜವಾಬ್ದಾರಿಯನ್ನು ದುರುಪಯೋಗಪಡಿಸಿಕೊಂಡು, ಅರ್ಹರಿಗೆ ಸಿಗಬೇಕಾದ ಉದ್ಯೋಗವನ್ನು ಆಪ್ತರಿಗೆ ಅಕ್ರಮವಾಗಿ ಹಂಚಿಕೆ ಮಾಡುವ ಮೂಲಕ ಸಾಂವಿಧಾನಿಕ ಸಂಸ್ಥೆಯ ವಿಶ್ವಾಸಾರ್ಹತೆಗೆ ಧಕ್ಕೆ ತರಲಾಗಿದೆ ಎಂದು ಎಫ್‌ಐಆರ್‌ನಲ್ಲಿ ಉಲ್ಲೇಖಿಸಲಾಗಿದೆ.

• ದೂರುದಾರರು: ನೇಮಂ ನಿವಾಸಿ ಶಶಿಕುಮಾರ್ ಎಂಬ ನೊಂದ ಅಭ್ಯರ್ಥಿ ನೀಡಿದ ದೂರಿನ ಮೇರೆಗೆ ಪ್ರಕರಣ ದಾಖಲಾಗಿದೆ.

• ಇನ್ನೊಂದು ಪ್ರಕರಣ: ಇದರೊಂದಿಗೆ 'ವಿಲೇಜ್ ಆಯಿಲ್ ಇನ್ಸ್‌ಪೆಕ್ಟರ್' ಹುದ್ದೆಗೆ ಅರ್ಹತೆಯಿಲ್ಲದಿದ್ದರೂ ಪಿಎಸ್‌ಸಿ ನೌಕರನ ಪತ್ನಿಗೆ ಅಕ್ರಮವಾಗಿ ನೇಮಕಾತಿ ನೀಡಿರುವ ಕುರಿತು ನೆಡುಮಂಗಾಡ್ ನಿವಾಸಿ ಸುನಿತ್ ಎಂಬುವವರು ನೀಡಿದ ದೂರಿನ ಮೇಲೆಯೂ ಪ್ರತ್ಯೇಕ ಪ್ರಕರಣ ದಾಖಲಿಸಲಾಗಿದೆ.

ಜೀವಾವಧಿ ಶಿಕ್ಷೆಯಾಗುವ ಗಂಭೀರ ಕಾಯ್ದೆಗಳಡಿ ಕೇಸ್

ಆರೋಪಿಗಳ ವಿರುದ್ಧ ಅತ್ಯಂತ ಕಠಿಣ ಕ್ರಿಮಿನಲ್ ಹಾಗೂ ಭ್ರಷ್ಟಾಚಾರ ವಿರೋಧಿ ಸೆಕ್ಷನ್‌ಗಳನ್ನು ಜಡಿಯಲಾಗಿದೆ:

• ಐಪಿಸಿ ಸೆಕ್ಷನ್ 409 (ಸಾರ್ವಜನಿಕ ಸೇವಕರಿಂದ ಕ್ರಿಮಿನಲ್ ವಿಶ್ವಾಸದ್ರೋಹ): ಇದು ಜೀವಾವಧಿ ಶಿಕ್ಷೆ ಅಥವಾ 10 ವರ್ಷಗಳವರೆಗೆ ಕಠಿಣ ಜೈಲು ಶಿಕ್ಷೆ ಹಾಗೂ ದಂಡ ವಿಧಿಸಬಹುದಾದ ಗಂಭೀರ ಅಪರಾಧವಾಗಿದೆ. ಇದು ಜಾಮೀನು ರಹಿತ (Non-bailable) ಹಾಗೂ ವಾರಂಟ್ ಇಲ್ಲದೆ ಬಂಧಿಸಬಹುದಾದ ಕಾಗ್ನಿಜೆಬಲ್ ಅಪರಾಧ.

• ಭ್ರಷ್ಟಾಚಾರ ನಿಯಂತ್ರಣ ಕಾಯ್ದೆ ಸೆಕ್ಷನ್ 7(ಸಿ) ಮತ್ತು 13(1)(ಎ): ಅಧಿಕಾರ ದುರುಪಯೋಗ, ಲಂಚ ಮತ್ತು ಅಕ್ರಮ ಆರ್ಥಿಕ ಲಾಭದ ಆರೋಪಗಳಡಿ ಕೇಸ್ ದಾಖಲಿಸಲಾಗಿದ್ದು, ಸಾಬೀತಾದರೆ 5 ರಿಂದ 10 ವರ್ಷಗಳ ಜೈಲು ಶಿಕ್ಷೆಯಾಗಲಿದೆ.