ನವದೆಹಲಿ: ಪ್ರೀಪೇಯ್ಡ್ ಮೊಬೈಲ್ ಕನೆಕ್ಷನ್ ಬಯಸುವವರಿಗೆ ಸರ್ಕಾರಿ ಸ್ವಾಮ್ಯದ ಬಿಎಸ್ಎನ್ಎಲ್ ಶುಭ ಸುದ್ದಿ ನೀಡಿದೆ. ಮೊಬೈಲ್ ಕನೆಕ್ಷನ್ ಪಡೆಯುವ ಹೊಸ ಗ್ರಾಹಕರಿಗೆ 249 ರೂ.ಗಳ ಫಸ್ಟ್ ರೀಚಾರ್ಜ್ ಕೂಪನ್ (ಎಫ್ಆರ್ಸಿ) ಅನ್ನು ಬಿಡುಗಡೆ ಮಾಡಿದೆ. 2021ರ ಮಾರ್ಚ್ 31 ರವರೆಗೆ ಲಭ್ಯವಿರುವ ಈ ಕೂಪನ್, ಪ್ರತಿಸ್ಪರ್ಧಿಗಳಾದ ಏರ್ಟೆಲ್ ಮತ್ತು ಜಿಯೋ ನೀಡುತ್ತಿರುವ ಯೋಜನೆಗಳಿಗೆ ಸಮನಾದ ಸೌಲಭ್ಯಗಳನ್ನು ನೀಡಲಿದೆ ಎನ್ನಲಾಗಿದೆ.
ಕೇರಳ ಟೆಲಿಕಾಮ್ ನೀಡಿರುವ ಮಾಹಿತಿಯ ಪ್ರಕಾರ ಹೊಸ ಗ್ರಾಹಕರು, ಈ ಎಫ್ಆರ್ಸಿ ಕೆಳಗೆ 249 ರೂಪಾಯಿ ಕೊಟ್ಟು ರೀಚಾರ್ಜ್ ಮಾಡಿಸಿದಲ್ಲಿ, ಅರವತ್ತು ದಿನಗಳವರೆಗೆ ಅನಿಯಮಿತ ಡೇಟಾ ಮತ್ತು ಅನಿಯಮಿತ ವಾಯ್ಸ್ ಕಾಲ್ಗಳ ಸೌಲಭ್ಯವಿದೆ. ದಿನಕ್ಕೆ 100 ಎಸ್ಎಂಎಸ್ಗಳ ಸೌಲಭ್ಯ ಕೂಡ ಇದೆ. ಡೇಟಾ ಅನಿಯಮಿತವಾಗಿದ್ದರೂ ದಿನಕ್ಕೆ 2 ಜಿಬಿ ಡೇಟಾ ಬಾಬತ್ತು ಮುಗಿದ ನಂತರ ವೇಗವು ಸೆಕೆಂಡ್ಗೆ 40 ಕೆಬಿಗೆ ಮಾರ್ಪಾಡಾಗುತ್ತದೆ. ಅನಿಯಮಿತ ಕಾಲ್ಗಳ ಸೌಲಭ್ಯದಲ್ಲಿ ಯಾವುದೇ ನೆಟ್ವರ್ಕ್ಗೆ ಮಾಡುವ ಸ್ಥಳೀಯ, ಎಸ್ಟಿಡಿ ಮತ್ತು ರೋಮಿಂಗ್ ಕರೆಗಳು ಉಚಿತವಾಗಿರುತ್ತವೆ.
ಈ ಮಾರ್ಚ್ 31 ರವರೆಗೆ ಲಭ್ಯವಿರುವ ಈ ಸೀಮಿತ ಅವಧಿಯ ಯೋಜನೆಯ ವಿಶೇಷ ಆಕರ್ಷಣೆಯೆಂದರೆ, ಬಿಎಸ್ಎನ್ಎಲ್, ಪ್ರತಿ ಹೊಸ ಸಂಪರ್ಕಕ್ಕಾಗಿ ತನ್ನ ನೇರ ಮಾರಾಟದ ಏಜೆಂಟರಿಗೆ 224 ರೂ.ಗಳನ್ನು ನೀಡಲಿದೆ. ಈ ಮೂಲಕ ಬಿಎಸ್ಎನ್ಎಲ್ ತನ್ನೆಡೆಗೆ ಹೊಸ ಗ್ರಾಹಕರನ್ನು ಸೆಳೆಯುವ ಪ್ರಯತ್ನ ಮಾಡುತ್ತಿದೆ.
ಇದರೊಂದಿಗೆ ತನ್ನ ಎಫ್ಟಿಟಿಹೆಚ್ ಬ್ರಾಡ್ಬ್ಯಾಂಡ್ ಪ್ಲಾನ್ಗಳನ್ನು ನವೀಕರಿಸಿ, ಅದೇ ಹಳೇ ಬೆಲೆಯಲ್ಲಿ ಹೆಚ್ಚಿನ ಡೇಟಾ ಮತ್ತು ಅಧಿಕ ವೇಗದ ಸೌಲಭ್ಯ ನೀಡಲು ಬಿಎಸ್ಎನ್ಎಲ್ ಮುಂದಾಗಿದೆ. ಈ ಪ್ಲಾನ್ಗಳು 777 ರೂ.ಗಳಿಂದ ಆರಂಭವಾಗಲಿದ್ದು, ಅಂಡಮಾನ್ ಮತ್ತು ನಿಕೋಬಾರ್ ಸರ್ಕಲ್ಗಳನ್ನು ಬಿಟ್ಟು ಬೇರೆಲ್ಲಾ ಟೆಲಿಕಾಂ ಸರ್ಕಲ್ಗಳಲ್ಲಿ ನಿಯಮಿತವಾಗಿ ಲಭ್ಯವಾಗಲಿವೆ. ಮಾರ್ಚ್ 31 ರವರೆಗೆ ಈ ಎಫ್ಟಿಟಿಹೆಚ್ ಪ್ಲಾನ್ಗಳ ಅಳವಡಿಕೆಗೆ ಯಾವುದೇ ಶುಲ್ಕವಿರುವುದಿಲ್ಲ.
DOCTYPE html>
