ವಯನಾಡ್: ಕೊರೋನಾ ರೋಗಿಯೊಬ್ಬರು ಬೀದಿಗಿಳಿದು ಕೊರೋನಾ ಮಾನದಂಡಗಳನ್ನು ಉಲ್ಲಂಘಿಸಿ ಪತ್ನಿಗೆ ವಾಹನ ಚಾಲನೆ ತರಬೇತಿ ನೀಡುತ್ತಿದ್ದುದು ಬೆಳಕಿಗೆ ಬಂದಿದೆ. ವಯನಾಡ್ ಕೊನಿಚೀರ ತಾಳೆಮುಂಡ್ ಎಂಬಲ್ಲಿ ನಿನ್ನೆ ಈ ಘಟನೆ ನಡೆದಿದೆ. ರೋಗಿಯನ್ನು ಹುಡುಕಿಕೊಂಡು ಪೋಲೀಸರು ಮನೆಗೆ ಆಗಮಿಸಿದಾಗ ಈ ಘಟನೆ ಬೆಳಕಿಗೆ ಬಂದಿದ್ದು ಪೋಲೀಸರು ದೂರು ದಾಖಲಿಸಿರುವರು.
ಕೊರೋನಾ ಪಾಸಿಟಿವ್ ಆದವರಿಗಿರುವ ಮಾನದಂಡಗಳನ್ನು ಅನುಸರಿಸಲಾಗುತ್ತಿದೆಯೇ ಎಂದು ಪರಿಶೀಲನೆ ನಡೆಸಲು ಪೋಲೀಸರು ಅವರ ಮನೆಗೆ ಭೇಟಿ ನೀಡಿದ್ದರು. ಆದರೆ ಆ ವೇಳೆ ಪಾಸಿಟಿವ್ ಆಗಿರುವ ಸೋಂಕಿತ ಮನೆಯಲ್ಲಿ ಇರಲಿಲ್ಲ. ಆಗ ಸಂಬಂಧಿಕರನ್ನು ಪ್ರಶ್ನಿಸಿದಾಗ ಅಸಂಬದ್ದ ಉತ್ತರಗಳು ಲಭ್ಯವಾದವು. ಇದರಿಂದ ಸಂಶಯಗೊಂಡ ಪೋಲೀಸರು ಸೋಂಕಿತನನ್ನು ದೂರವಾಣಿಯಲ್ಲಿ ಸಂಪರ್ಕಿಸಿದರು.
ಕೊರೋನಾ ರೋಗಿಯು ಪರೀಕ್ಷೆಗೆ ತೆರಳುತ್ತಿದ್ದೇನೆ ಎಂದು ಉತ್ತರಿಸಿದ. ಬಳಿಕ ಪೋಲೀಸರು ಸಾರ್ವಜನಿಕ ಶೋಧಕ್ಕೆ ತೆರಳಿದ್ದು, ಈ ವೇಳೆ ಸೋಂಕಿತ ವ್ಯಕ್ತಿ ಆತನ ಪತ್ನಿಗೆ ವಾಹನ ಚಲಾಯಿಸುವುದನ್ನು ಕಲಿಸುತ್ತಿರುವುದು ಕಂಡುಬಂದಿತು. ಲಾಕ್ ಡೌನ್ ಉಲ್ಲಂಘನೆಗಾಗಿ ಪೋಲೀಸರು ಸಾಂಕ್ರಾಮಿಕ ರೋಗಗಳ ಕಾಯ್ದೆಯಡಿ ಪ್ರಕರಣ ದಾಖಲಿಸಿದ್ದಾರೆ.