ಉಪರಾಷ್ಟ್ರಪತಿ ಧನಕರ್ ನಾಳೆ ಕೇರಳಕ್ಕೆ

             ನವದೆಹಲಿ: ಎರಡು ದಿನಗಳ ಭೇಟಿಗಾಗಿ ಉಪರಾಷ್ಟ್ರಪತಿ ಜಗದೀಪ್ ಧನಕರ್ ನಾಳೆ ಕೇರಳಕ್ಕೆ ಆಗಮಿಸಲಿದ್ದಾರೆ.

           ಕೇರಳ ಶಾಸಕಾಂಗ ಭವನದ ರಜತ ಮಹೋತ್ಸವ ಆಚರಣೆಯನ್ನು ಉದ್ಘಾಟಿಸಲು ಉಪರಾಷ್ಟ್ರಪತಿಗಳು ಎಝಿಮಲ ಇಂಡಿಯನ್ ನೇವಲ್ ಅಕಾಡೆಮಿಗೆ ಭೇಟಿ ನೀಡಲಿದ್ದಾರೆ. ಅವರು ತಲಶ್ಶೇರಿಗೆ ಬಂದು ತಮ್ಮ ಶಾಲಾ ಶಿಕ್ಷಕಿ ರತ್ನಾ ನಾಯರ್ ಅವರನ್ನು ಸನ್ಮಾನಿಸಲಿದ್ದಾರೆ. ಉಪರಾಷ್ಟ್ರಪತಿಯಾದ ನಂತರ ಜಗದೀಪ್ ಧನಕರ್ ಕೇರಳಕ್ಕೆ ನೀಡುತ್ತಿರುವ ಮೊದಲ ಭೇಟಿ ಇದಾಗಿದೆ.

          21ರಂದು ತಿರುವನಂತಪುರಕ್ಕೆ ಆಗಮಿಸಲಿರುವ ಉಪರಾಷ್ಟ್ರಪತಿ ಶ್ರೀ ಪದ್ಮನಾಭಸ್ವಾಮಿ ದೇವಸ್ಥಾನಕ್ಕೆ ಭೇಟಿ ನೀಡಲಿದ್ದಾರೆ. 22ರಂದು ಕೇರಳ ವಿಧಾನಸಭೆ ಭವನದ ರಜತ ಮಹೋತ್ಸವ ಸಮಾರಂಭವನ್ನು ಉದ್ಘಾಟಿಸಲಿದ್ದಾರೆ. ಅವರು ಕೇರಳ ವಿಧಾನಸಭೆಯ ಅಂತಾರಾಷ್ಟ್ರೀಯ ಪುಸ್ತಕೋತ್ಸವ-2023ರ ಸ್ಮರಣಿಕೆಯನ್ನು ಬಿಡುಗಡೆ ಮಾಡಲಿದ್ದಾರೆ. 1998ರ ಮೇ 22ರಂದು ಅಂದಿನ ರಾಷ್ಟ್ರಪತಿ ಕೆ.ಆರ್. ನಾರಾಯಣನ್ ಸಭಾಭವನವನ್ನು ಉದ್ಘಾಟಿಸಿದ್ದರು.

         ಮಧ್ಯಾಹ್ನ ಉಪರಾಷ್ಟ್ರಪತಿಗಳು ಕಣ್ಣೂರಿನ ಎಝಿಮಲದಲ್ಲಿರುವ ಭಾರತೀಯ ನೌಕಾ ಅಕಾಡೆಮಿಗೆ ಭೇಟಿ ನೀಡಿ ಕೆಡೆಟ್‍ಗಳೊಂದಿಗೆ ಸಂವಾದ ನಡೆಸಲಿದ್ದಾರೆ. ಉಪರಾಷ್ಟ್ರಪತಿಯೊಬ್ಬರು ಐಎನ್‍ಎಗೆ ಭೇಟಿ ನೀಡುತ್ತಿರುವುದು ಇದೇ ಮೊದಲು. ಉಪರಾಷ್ಟ್ರಪತಿಯವರು ತಮ್ಮ ಶಿಕ್ಷಕಿ ರತ್ನಾ ನಾಯರ್ ಅವರನ್ನು ತಲಶ್ಶೇರಿಯಲ್ಲಿರುವ ಅವರ ಮನೆಯಲ್ಲಿ ಭೇಟಿ ಮಾಡಲಿದ್ದಾರೆ. ರತ್ನಾ ನಾಯರ್ ಅವರು ಚಿತ್ತೋರ್‍ಗಢದ ಸೈನಿಕ ಶಾಲೆಯಲ್ಲಿ ಶಿಕ್ಷಕಿಯಾಗಿದ್ದ ವೇಳೆ ಧನಕರ್ ವಿದ್ಯಾರ್ಥಿಯಾಗಿದ್ದರು.