ಅಸಫ್ ನಿಂದ ಉದ್ಯೋಗ ಮೇಳ ಆಯೋಜನೆ

ಕಾಸರಗೋಡು: ಉನ್ನತ ಶಿಕ್ಷಣ ಇಲಾಖೆಯ ವಿಜ್ಞಾನ ಕೇರಳಂ ಯೋಜನೆಯ ಭಾಗವಾಗಿ ಕಾಸರಗೋಡಿನ ಅಸಫ್  ಸಮುದಾಯ ಕೌಶಲ್ಯ ಉದ್ಯಾನವನದಲ್ಲಿ ಅಸಫ್ ಕೇರಳ ಮತ್ತು ಲಿಂಕ್ ಅಕಾಡೆಮಿ ಜಂಟಿಯಾಗಿ ಉದ್ಯೋಗ ಮೇಳವನ್ನು ಭಾನುವಾರ ಆಯೋಜಿಸಿದ್ದವು. ಮೇಳವನ್ನು ಶಾಸಕ ಎನ್.ಎ. ನೆಲ್ಲಿಕುನ್ನು ಉದ್ಘಾಟಿಸಿದರು. ಜಿಲ್ಲಾ ಕೈಗಾರಿಕಾ ಕೇಂದ್ರದ ವ್ಯವಸ್ಥಾಪಕಿ ಆರ್.ರೇಖಾ ಮುಖ್ಯ ಅತಿಥಿಗಳಾಗಿದ್ದರು. ಜಿಲ್ಲೆಯ ವಿವಿಧ ಭಾಗಗಳಿಂದ ಸುಮಾರು 200 ಉದ್ಯೋಗಾಕಾಂಕ್ಷಿಗಳು ಭಾಗವಹಿಸಿದ್ದರು. ಸುಮಾರು 20 ಪ್ರಮುಖ ಕಂಪನಿಗಳಿಗೆ ಸುಮಾರು ನಾಲ್ಕು ನೂರು ಉದ್ಯೋಗಾವಕಾಶಗಳು ಸೃಷ್ಟಿಯಾದವು. ಎಎಸ್.ಎ.ಪಿ. ಜಿಲ್ಲಾ ಕಾರ್ಯಕ್ರಮ ವ್ಯವಸ್ಥಾಪಕ ಸಿ. ಸುಬಿನ್ ಸಮಾರಂಭದ ಅಧ್ಯಕ್ಷತೆ ವಹಿಸಿದ್ದರು. ಲಿಂಕ್ ಅಕಾಡೆಮಿ ತರಬೇತಿ ಮತ್ತು ಅಭಿವೃದ್ಧಿಯ ವ್ಯವಹಾರ ವ್ಯವಸ್ಥಾಪಕ ಸಜೇಶ್ ನಾಯರ್, ಕಾಸರಗೋಡಿನ ನಾರ್ತ್ ಮಲಬಾರ್ ಚೇಂಬರ್ ಆಫ್ ಕಾಮರ್ಸ್‍ನ ಅಧ್ಯಕ್ಷ ಶ್ಯಾಮ ಪ್ರಸಾದ್, ಎಎಸ್‍ಎಪಿ ಕಾಸರಗೋಡು ಸಮುದಾಯ ಕೌಶಲ್ಯ ಉದ್ಯಾನವನದ ಕಾರ್ಯನಿರ್ವಾಹಕ ಕೆ. ಅಖಿಲ್ ಮತ್ತು ಡೈಕ್ಸ್‍ನ ಲಿಂಕ್ ಅಕಾಡೆಮಿಯ ಉದ್ಯೋಗ ವ್ಯವಸ್ಥಾಪಕ ಡೇನಿಯಲ್ ಡೇವಿಡ್ ಮಾತನಾಡಿದರು. ವಿಜ್ಞಾನ ಕೇರಳ ಯೋಜನೆಯ ಭಾಗವಾಗಿ, ಕಾಸರಗೋಡು ಅಸಫ್ ಕೇಂದ್ರದಲ್ಲಿ ಪ್ರತಿ ತಿಂಗಳು ಉದ್ಯೋಗ ಮೇಳಗಳನ್ನು ಆಯೋಜಿಸಲಾಗುತ್ತಿದೆ.