ಕೇರಳದ ಎಲ್ಲಾ ಜಿಲ್ಲೆಗಳಲ್ಲಿ ಸ್ಪರ್ಶ್ ಸೇವಾ ಕೇಂದ್ರ: ಕಾಂಞಂಗಾಡ್ ನಲ್ಲಿ ಸ್ಪರ್ಶ ಸೇವಾ ಕೇಂದ್ರ ಉದ್ಘಾಟನೆ

ಕಾಸರಗೋಡು: ಕೇರಳದಲ್ಲಿ ಹನ್ನೊಂದನೇ ಸ್ಪರ್ಶ ಸೇವಾ ಕೇಂದ್ರ (ಎಸ್‍ಎಸ್‍ಸಿ)ವನ್ನು ಸೋಮವಾರ ಕಾಸರಗೋಡು ಜಿಲ್ಲೆಯ ಕಾಞಂಗಾಡ್‍ನಲ್ಲಿ ಚೆನ್ನೈನ ಐಡಿಎಎಸ್‍ನ ರಕ್ಷಣಾ ಲೆಕ್ಕಪತ್ರಗಳ ನಿಯಂತ್ರಕ ಟಿ. ಜಯಶೀಲನ್ ಉದ್ಘಾಟಿಸಿದರು. 

ಇದು ಕೇರಳದಲ್ಲಿ ತೆರೆಯಲಾಗುತ್ತಿರುವ ಹನ್ನೊಂದನೇ ಎಸ್‍ಎಸ್‍ಸಿ)ಎಂದು ಟಿ. ಜಯಶೀಲನ್ ಹೇಳಿದರು. ಮುಂದಿನ ತಿಂಗಳು ಕೋಝಿಕ್ಕೋಡ್‍ನಲ್ಲಿ ಹನ್ನೆರಡನೆಯ ಸ್ಪರ್ಶ ಸೇವಾ ಕೇಂದ್ರ ಪ್ರಾರಂಭವಾಗಲಿದೆ. ಇಡುಕ್ಕಿ ಮತ್ತು ಮಲಪ್ಪುರಂ ಜಿಲ್ಲೆಗಳು ಮಾತ್ರ ಈ ವ್ಯಾಪ್ತಿಗೆ ಬರಲು ಉಳಿದಿವೆ, ಮತ್ತು ಈ ಜಿಲ್ಲೆಗಳಲ್ಲಿ ಎಸ್‍ಎಸ್‍ಸಿಗಳನ್ನು ತೆರೆಯುವ ಪ್ರಕ್ರಿಯೆಯು ಕೇರಳದ ಪ್ರತಿಯೊಂದು ಜಿಲ್ಲೆಯಲ್ಲೂ ಸ್ಪರ್ಶ ಸೇವಾ ಕೇಂದ್ರಗಳ ಸ್ಥಾಪನೆಯನ್ನು ಖಚಿತಪಡಿಸುತ್ತದೆ. ಕಾಞಂಗಾಡ್‍ನಲ್ಲಿರುವ ಸ್ಪರ್ಶ ಸೇವಾ ಕೇಂದ್ರವು ಕಾಸರಗೋಡು ಜಿಲ್ಲೆಯಲ್ಲಿ ಸುಮಾರು 4000 ರಕ್ಷಣಾ ಪಿಂಚಣಿದಾರರು ಮತ್ತು ಕುಟುಂಬ ಪಿಂಚಣಿದಾರರಿಗೆ ಸೇವೆ ಸಲ್ಲಿಸಲಿದೆ. ಕಾಞಂಗಾಡ್ ಸುತ್ತಮುತ್ತಲಿನ ಪ್ರದೇಶಗಳಿಗೂ ಇದರಿಂದ ಪ್ರಯೋಜನವಾಗಲಿದೆ ಎಂದು ಅವರು ಹೇಳಿದರು.

ಸ್ಪರ್ಶ್ ಎಂಬುದು ರಕ್ಷಣಾ ಪಿಂಚಣಿ ವಿತರಣೆಗಾಗಿ ಪರಿಚಯಿಸಲಾದ ವೆಬ್ ಆಧಾರಿತ ಪಿಂಚಣಿ ವಿತರಣಾ ಮಾಡ್ಯೂಲ್ ಆಗಿದೆ. ಭಾರತದಾದ್ಯಂತ ಇರುವ 32 ಲಕ್ಷ ರಕ್ಷಣಾ ಪಿಂಚಣಿದಾರರು/ರಕ್ಷಣಾ ಕುಟುಂಬ ಪಿಂಚಣಿದಾರರಲ್ಲಿ ಸುಮಾರು 90 ಪ್ರತಿಶತ ಜನರು ಈಗಾಗಲೇ ಸ್ಪರ್ಶ್‍ಗೆ ಸ್ಥಳಾಂತರಗೊಂಡಿದ್ದಾರೆ ಮತ್ತು ಉಳಿದ ಪಿಂಚಣಿದಾರರನ್ನು ಹಂತ ಹಂತವಾಗಿ ಸ್ಪರ್ಶ್‍ಗೆ ಸೇರ್ಪಡೆಯಾಗುವರು. ಸ್ಪರ್ಶ್ ಸೇವಾ ಕೇಂದ್ರವು ವಾರ್ಷಿಕ ಪರಿಶೀಲನೆ, ಪ್ಯಾನ್, ಆಧಾರ್, ಮೊಬೈಲ್ ಸಂಖ್ಯೆಗಳ ನವೀಕರಣ, ಪ್ರೊಫೈಲ್ ನವೀಕರಣ, ಕುಟುಂಬ ಪಿಂಚಣಿಯನ್ನು ಪ್ರಾರಂಭಿಸುವುದು ಮತ್ತು ರಕ್ಷಣಾ ಪಿಂಚಣಿಗೆ ಸಂಬಂಧಿಸಿದ ಎಲ್ಲಾ ಪ್ರಶ್ನೆಗಳ ಪರಿಹಾರದಂತಹ ಎಲ್ಲಾ ಸ್ಪರ್ಶ್ ಸೇವೆಗಳನ್ನು ಒದಗಿಸುತ್ತದೆ. ಎಸಿಡಿಎ ಆರ್. ನಾರಾಯಣ ಪ್ರಸಾದ್, ಕಣ್ಣೂರಿನ ರಕ್ಷಣಾ ಭದ್ರತಾ ದಳದ ಅಧಿಕಾರಿಗಳು, ಕೇರಳ ರಾಜ್ಯ ಮಾಜಿ ಸೇವಾ ಲೀಗ್ ಕಾಸರಗೋಡು ಜಿಲ್ಲಾ ಪದಾಧಿಕಾರಿಗಳು ಮತ್ತು ರಕ್ಷಣಾ ಪಿಂಚಣಿದಾರರು/ಕುಟುಂಬ ಪಿಂಚಣಿದಾರರು ಸಮಾರಂಭದಲ್ಲಿ ಭಾಗವಹಿಸಿದ್ದರು.