ಮುಂಬೈ ಮೆಟ್ರೊಗೆ 108 ಬೋಗಿ ಸರಬರಾಜು: ₹ 1,600 ಕೋಟಿ ಒಪ್ಪಂದ ಮಾಡಿಕೊಂಡ TRSL

ಕೋಲ್ಕತ್ತ: ಮುಂಬೈ ಮೆಟ್ರೊಗೆ 108 ಬೋಗಿಗಳನ್ನು ತಯಾರಿಸಿ, ಸರಬರಾಜು ಮಾಡಲು 'ತಿತಗಢ ರೈಲ್ ಸಿಸ್ಟಮ್ಸ್‌ ಲಿಮಿಟೆಡ್‌' (TRSL) ₹ 1,598.55 ಕೋಟಿ ಮೊತ್ತದ ಒಪ್ಪಂದ ಮಾಡಿಕೊಂಡಿದೆ ಎಂದು ಕಂಪನಿಯ ಅಧಿಕಾರಿಯೊಬ್ಬರು ಸೋಮವಾರ ತಿಳಿಸಿದ್ದಾರೆ.

ಮುಂಬೈ ಮೆಟ್ರೊ ಲೈನ್‌-6ಗಾಗಿ ಬೋಗಿಗಳ ವಿನ್ಯಾಸ, ತಯಾರಿಕೆ, ಪೂರೈಕೆ ಮತ್ತು ಏಕೀಕರಣ, ಪರೀಕ್ಷೆ ಮತ್ತು ಕಾರ್ಯಾಚರಣೆ ನಡೆಸುವುದಕ್ಕೆ ಸಂಬಂಧಿಸಿದಂತೆ TRSL ಸ್ವೀಕಾರ ಪತ್ರವನ್ನು ಪಡೆದುಕೊಂಡಿದೆ ಎಂದು ಮಾಹಿತಿ ನೀಡಿದ್ದಾರೆ.

ಪ್ರತಿ ಬೋಗಿ ತಯಾರಿಕೆಗೆ ಸರಾಸರಿ ₹ 10-11 ಕೋಟಿ ವೆಚ್ಚವಾಗಲಿದೆ ಎಂದೂ ಹೇಳಿದ್ದಾರೆ.

ಮುಂಬೈ ಮಹಾನಗರ ಪ್ರದೇಶ ಅಭಿವೃದ್ಧಿ ಪ್ರಾಧಿಕಾರಕ್ಕಾಗಿ ಯೋಜನೆ ಕಾರ್ಯಗತಗೊಳಿಸುತ್ತಿರುವ NCC ಲಿಮಿಟೆಡ್, ಈ ಒಪ್ಪಂದವನ್ನು TRSLಗೆ ನೀಡಿದೆ.

ಈ ಒಪ್ಪಂದವು ಭಾರತೀಯ ನಗರ ಸಾರಿಗೆ ವಿಭಾಗದಲ್ಲಿ ತನ್ನ ಅಸ್ತಿತ್ವವನ್ನು ಮತ್ತಷ್ಟು ಬಲಪಡಿಸುತ್ತದೆ ಎಂದು ಹೇಳಿಕೊಂಡಿರುವ TRSLನ ತಯಾರಿಕಾ ಘಟಕವು ಪಶ್ಚಿಮ ಬಂಗಾಳದ ಹೂಗ್ಲಿ ಜಿಲ್ಲೆಯ ಉತ್ತರ್ಪರಾದಲ್ಲಿದೆ.