ಆಲಪ್ಪುಳ: ನಾಲ್ಕೂವರೆ ವರ್ಷದ ಮಗನ ಪೃಷ್ಠಕ್ಕೆ ಬರೆ ಹಾಕಿದ ತಾಯಿಯ ಬಂಧನ

ಆಲಪ್ಪುಳ: ತನ್ನ ನಾಲ್ಕೂವರೆ ವರ್ಷದ ಮಗನ ಪುಷ್ಠಭಾಗ ಮತ್ತು ಕಾಲಿಗೆ ಕಾದ ಸ್ಟೀಲ್ ಚಮಚದಲ್ಲಿ ಬರೆ ಎಳೆದ ತಾಯಿಯನ್ನು ಬಂಧಿಸಿದ ಪ್ರಕರಣ ಕೇರಳದ ಕಾಯಂಕುಲಂನಲ್ಲಿ ನಡೆದಿದೆ.

ಘಟನೆ ಸೆ. 22ರಂದು ನಡೆದಿದೆ. ಮಗುವಿನ ಮೇಲೆ ನಡೆದ ಹಲ್ಲೆಗೆ ಸಂಬಂಧಿಸಿದಂತೆ ಮಕ್ಕಳ ನ್ಯಾಯ ಕಾಯ್ದೆ ಹಾಗೂ ಭಾರತೀಯ ನ್ಯಾಯ ಸಂಹಿತಾ ಅಡಿಯಲ್ಲಿ ಮಹಿಳೆ ವಿರುದ್ಧ ಪ್ರಕರಣ ದಾಖಲಾಗಿದೆ ಎಂದು ಪೊಲೀಸರು ಹೇಳಿದ್ದಾರೆ.

ಚಡ್ಡಿಯಲ್ಲಿ ಮಲ, ಮೂತ್ರ ವಿಸರ್ಜನೆ ಮಾಡುತ್ತಿದ್ದ ಎಂದು ಮಗನ ಮೇಲೆ ಕೋಪಗೊಂಡ ಮಹಿಳೆ, ಬರೆ ಹಾಕಿ ಘಾಸಿಗೊಳಿಸಿದ್ದಾರೆ. ಈ ಕುರಿತು ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ ಎಂದು ಕನಕಕುನ್ನು ಪೊಲೀಸ್ ಠಾಣೆ ಪೊಲೀಸರು ತಿಳಿಸಿದ್ದಾರೆ.

'ಮಗುವನ್ನು ಆಸ್ಪತ್ರೆಗೆ ಕರೆದೊಯ್ದ ತಾಯಿ, ಮಗು ಬಿಸಿ ಒಲೆ ಮೇಲೆ ಕುಳಿತಿದ್ದರಿಂದ ಗಾಯವಾಗಿದೆ ಎಂದಿದ್ದರು. ಆದರೆ ಆಕೆಯ ಅತ್ತೆ, ಮಾವ ನಡೆದ ವಾಸ್ತವವನ್ನು ಪೊಲೀಸರಿಗೆ ತಿಳಿಸಿದ್ದಾರೆ. ಅವರ ಹೇಳಿಕೆ ಆಧರಿಸಿ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ' ಎಂದು ತಿಳಿಸಿದ್ದಾರೆ.