ಕಾಸರಗೋಡು ವೈದ್ಯಕೀಯ ಕಾಲೇಜಿಗಾಗಿ ಮತ್ತೆ ಮೊಳಗಿದ ಪ್ರತಿಭಟನೆರ: ವೈದ್ಯಕೀಯ ಕಾಲೇಜು ಕಾರ್ಯಾರಂಭಕ್ಕೆ ಒತ್ತಾಯಿಸಿ ಕಲೆಕ್ಟರೇಟ್‍ಗೆ ಪ್ರತಿಭಟನಾ ಮೆರವಣಿಗೆ.

ಕಾಸರಗೋಡು: ಕಾಸರಗೋಡು ವೈದ್ಯಕೀಯ ಕಾಲೇಜು ಪೂರ್ಣವಾಗಿ ಕಾರ್ಯನಿರ್ವಹಿಸುವಂತೆ ಒತ್ತಾಯಿಸಿ ಕಲೆಕ್ಟರೇಟ್‍ಗೆ ಬೃಹತ್ ಪ್ರತಿಭಟನಾ ಮೆರವಣಿಗೆ ನಡೆಸಲಾಯಿತು. ಘೋಷಣೆಯಾಗಿ ವರ್ಷಗಳೇ ಕಳೆದರೂ, ವೈದ್ಯಕೀಯ ಕಾಲೇಜು ಸಂಪೂರ್ಣವಾಗಿ ಕಾರ್ಯನಿರ್ವಹಿಸಲು ಸಾಧ್ಯವಾಗದಿರುವುದು ಖಂಡಿಸಿ ಕಾಸರಗೋಡು ವೈದ್ಯಕೀಯ ಕಾಲೇಜು ಕ್ರಿಯಾ ಸಮಿತಿ ನೇತೃತ್ವದ ಮುಷ್ಕರಕ್ಕೆ ಬೆಂಬಲ ವ್ಯಕ್ತಪಡಿಸಲು ಜನರು ಬೀದಿಗಿಳಿದರು. ಕಳೆದ ವಾರ ಕ್ರಿಯಾ ಸಮಿತಿ ನಡೆಸಿದ 'ಶಾಕ್ ಸ್ಟ್ರೈಕ್' ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆದ ನಂತರ ಪ್ರತಿಭಟನೆಗೆ ಸಾರ್ವಜನಿಕ ಬೆಂಬಲ ಹೆಚ್ಚಾಯಿತು.

ಜಿಲ್ಲೆಯ ಪ್ರಮುಖ ನೇತಾರರು ಮತ್ತು ಸಾರ್ವಜನಿಕ ಕಾರ್ಯಕರ್ತರು ಈ ವಿಷಯದಲ್ಲಿ ಮಧ್ಯಪ್ರವೇಶಿಸಿದ್ದರಿಂದ ಸಾಮಾಜಿಕ ಮಾಧ್ಯಮ ಅಭಿಯಾನ ತೀವ್ರಗೊಂಡಿತು. ಪಕ್ಷ ಅಥವಾ ರಾಜಕೀಯ ಸಂಬಂಧವನ್ನು ಲೆಕ್ಕಿಸದೆ ನೂರಾರು ಜನರು ಪ್ರತಿಭಟನಾ ಮೆರವಣಿಗೆಯಲ್ಲಿ ಭಾಗವಹಿಸಿದ್ದರು. ಎಂಡೋಸಲ್ಫಾನ್ ಮುಷ್ಕರ ನಾಯಕ ಮುನೀಸಾ ಅಂಬಲತ್ತರ ಕಲೆಕ್ಟರೇಟ್ ಮೆರವಣಿಗೆಯನ್ನು ಉದ್ಘಾಟಿಸಿದರು. ಜನರಲ್ ಆಸ್ಪತ್ರೆಯ ಮುಂದೆ ವೈದ್ಯಕೀಯ ಕಾಲೇಜು ಫಲಕ ಅಳವಡಿಸುವ ಕ್ರಮವನ್ನು ಅವರು ತೀವ್ರವಾಗಿ ಅಪಹಾಸ್ಯ ಮಾಡಿದರು. ಇದು ಗೂಡಂಗಡಿಯ ಮುಂದೆ ಪಂಚತಾರಾ ಹೋಟೆಲ್ ಬೋರ್ಡ್ ಹಾಕಿದಂತೆ ಎಂದು ಮುನೀಸಾ ಹೇಳಿದರು.

ವೈದ್ಯಕೀಯ ಕಾಲೇಜಿಗಾಗಿ ಬಿಜೆಪಿ, ಸಿಪಿಎಂ, ಕಾಂಗ್ರೆಸ್ ಮತ್ತು ಲೀಗ್ ಒಗ್ಗಟ್ಟಾಗಿ ಮುಂದೆ ಬರಬೇಕು ಮತ್ತು ಈ ಬೇಡಿಕೆ ರಾಜಕೀಯವನ್ನು ಮೀರಿದ ವಿಷಯವಾಗಿದೆ ಎಂದು ಅವರು ಹೇಳಿದರು. ಜಾತಿ, ಧರ್ಮ ಅಥವಾ ರಾಜಕೀಯವನ್ನು ಲೆಕ್ಕಿಸದೆ ಆಸ್ಪತ್ರೆ ಎಲ್ಲರಿಗೂ ಅಗತ್ಯವಾಗಿದೆ ಎಂದು ಅವರು ಗಮನಸೆಳೆದರು. "ನಾವು ಅನುಭವಿಸುತ್ತಿರುವ ನೋವನ್ನು ಬೇರೆ ಯಾರೂ ಅನುಭವಿಸಬಾರದು ಎಂದು ನಾವು ಬಯಸುತ್ತೇವೆ" ಎಂದು ಮುನೀಷಾ ಹೇಳಿದರು.

ತಾಸುಗಟ್ಟಲೆ ನಡೆದ ಪ್ರತಿಭಟನೆಯಿಂದ ಪ್ರದೇಶದಲ್ಲಿ ಸಂಚಾರ ಸ್ತಬ್ಧವಾಯಿತು. ಅಧಿಕಾರಿಗಳು ತಕ್ಷಣ ಕ್ರಮ ಕೈಗೊಳ್ಳದಿದ್ದರೆ ಮುಂದಿನ ದಿನಗಳಲ್ಲಿ ಮುಷ್ಕರವನ್ನು ತೀವ್ರಗೊಳಿಸಲು ವೈದ್ಯಕೀಯ ಕಾಲೇಜು ಕ್ರಿಯಾ ಸಮಿತಿ ನಿರ್ಧರಿಸಿದೆ. ಹೊಸ ಬಸ್ ನಿಲ್ದಾಣದ ಮೇಲ್ಸೇತುವೆಯ ಕೆಳಗೆ ಆರಂಭವಾದ ಅನಿರ್ದಿಷ್ಟಾವಧಿ ಮುಷ್ಕರ ಇಂದು ಐದನೇ ದಿನಕ್ಕೆ ಕಾಲಿಟ್ಟಿದೆ.