‘ಹೋಗಿ ಸಾಯಬಾರದೇ’ ಎಂದು ಹೇಳುವುದು ಆತ್ಮಹತ್ಯೆಗೆ ಪ್ರಚೋದನೆಯಲ್ಲ; ಕಾಸರಗೋಡು ಮೂಲದ ಆರೋಪಿಯನ್ನು ಖುಲಾಸೆಗೊಳಿಸಿದ ಕೇರಳ ಹೈಕೋರ್ಟ್

ಕೊಚ್ಚಿ: ವಾದದ ವೇಳೆ ಯಾರಿಗಾದರೂ ‘ಹೋಗಿ ಸಾಯಬಾರದೇ’ ಅಥವಾ ‘ಹೋಗಿ ಸಾಯಿರಿ’ ಎಂದು ಹೇಳುವುದು ಆತ್ಮಹತ್ಯೆಗೆ ಪ್ರಚೋದನೆಯ ಅಪರಾಧದ ವ್ಯಾಪ್ತಿಗೆ ಬರುವುದಿಲ್ಲ ಎಂದು ಕೇರಳ ಹೈಕೋರ್ಟ್ ಸ್ಪಷ್ಟಪಡಿಸಿದೆ. ಕೌಟುಂಬಿಕ ಕಲಹದ ನಂತರ ಪತ್ನಿ ಆತ್ಮಹತ್ಯೆ ಮಾಡಿಕೊಂಡ ಘಟನೆಯಲ್ಲಿ ಆರೋಪಿಯಾಗಿದ್ದ ಕಾಸರಗೋಡು ಮೂಲದ ವ್ಯಕ್ತಿಯೊಬ್ಬರನ್ನು ಖುಲಾಸೆಗೊಳಿಸುವ ಮೂಲಕ ನ್ಯಾಯಾಲಯವು ಈ ನಿರ್ಣಾಯಕ ಅಭಿಪ್ರಾಯವನ್ನು  ಶನಿವಾರ ನೀಡಿದೆ. 

ಈ ಘಟನೆ 2023ರ ಸೆಪ್ಟೆಂಬರ್ ರಲ್ಲಿ ನಡೆದಿತ್ತು. ತನ್ನ ಪತಿಗೆ ಬೇರೆ ಮಹಿಳೆಯೊಂದಿಗೆ ಸಂಬಂಧವಿದೆ ಎಂದು ಪತ್ನಿ ಪ್ರಶ್ನಿಸಿದ ನಂತರ ಉಂಟಾದ ವಾಗ್ವಾದವೇ ಈ ದುರಂತಕ್ಕೆ ಕಾರಣವಾಗಿತ್ತು. ವಾದದ ಸಮಯದಲ್ಲಿ, ' ಹೋಗಿ ಸಾಯಿ' ಎಂಬ ಪತಿಯ ಮಾತುಗಳಿಂದ ಬೇಸತ್ತ ಮಹಿಳೆ ತನ್ನ ಐದೂವರೆ ವರ್ಷದ ಮಗಳೊಂದಿಗೆ ಬಾವಿಗೆ ಹಾರಿ ಆತ್ಮಹತ್ಯೆ ಮಾಡಿಕೊಂಡಿದ್ದಳು. ಘಟನೆಯಲ್ಲಿ ಮಹಿಳೆ ಮತ್ತು ಆಕೆಯ ಮಗು ಮುಳುಗಿ ಸಾವನ್ನಪ್ಪಿದ್ದರು. ಬಳಿಕ, ಪೋಲೀಸರು ಪತಿಯ ವಿರುದ್ಧ ಆತ್ಮಹತ್ಯೆಗೆ ಪ್ರಚೋದನೆಗಾಗಿ ಪ್ರಕರಣ ದಾಖಲಿಸಿದ್ದರು. 

ಆದಾಗ್ಯೂ, ಆತ್ಮಹತ್ಯೆಗೆ ಪ್ರಚೋದನೆಯ ಆರೋಪ ಹೊರಿಸಲು, ಆರೋಪಿಯು ಹಾಗೆ ಮಾಡುವ ಸ್ಪಷ್ಟ ಉದ್ದೇಶವನ್ನು ಹೊಂದಿರಬೇಕು ಎಂದು ನ್ಯಾಯಾಲಯವು ಗಮನಿಸಿದೆ. ಬಿಸಿಯಾದ ವಾದ ಅಥವಾ ಹಠಾತ್ ಪ್ರಚೋದನೆಯ ಸಮಯದಲ್ಲಿ ಮಾತನಾಡುವ ಮಾತುಗಳು ಆತ್ಮಹತ್ಯೆಗೆ ಪ್ರಚೋದಿಸುವ ಉದ್ದೇಶದಿಂದ ಇರಬಾರದು. ಕಾನೂನು ಪರೀಕ್ಷೆಯು ಆರೋಪಿಯ ಉದ್ದೇಶದ ಮೇಲೆ ಇರಬೇಕು, ಮೃತರ ಭಾವನಾತ್ಮಕ ಪ್ರತಿಕ್ರಿಯೆಗಳು ಅಥವಾ ಅಭಿಪ್ರಾಯಗಳ ಮೇಲೆ ಅಲ್ಲ ಎಂದು ನ್ಯಾಯಾಲಯ ಸ್ಪಷ್ಟಪಡಿಸಿದೆ.

ಆರೋಪಿಯು ತನ್ನ ಪತ್ನಿ ಆತ್ಮಹತ್ಯೆ ಮಾಡಿಕೊಳ್ಳಬೇಕೆಂದು ಬಯಸಿದ್ದನೆಂದು ಸಾಬೀತುಪಡಿಸಲು ಸಾಧ್ಯವಾಗಿಲ್ಲ ಮತ್ತು ಇವು ವಾದದ ಸಮಯದಲ್ಲಿ ಸ್ವಾಭಾವಿಕವಾಗಿ ಉದ್ಭವಿಸಿದ ಮಾತುಗಳು ಮಾತ್ರ ಎಂದು ನ್ಯಾಯಾಲಯ ಅಭಿಪ್ರಾಯಪಟ್ಟಿದೆ. ಈ ಪರಿಸ್ಥಿತಿಯಲ್ಲಿ ಆರೋಪಿಯ ವಿರುದ್ಧದ ಆರೋಪಪಟ್ಟಿ ಸಾದುವಾಗುವುದಿಲ್ಲ ಎಂದು ಸ್ಪಷ್ಟಪಡಿಸಿದ ನ್ಯಾಯಾಲಯ, ಕಾಸರಗೋಡು ನಿವಾಸಿಯನ್ನು ಪ್ರಕರಣದಿಂದ ಬಿಡುಗಡೆ ಮಾಡಿದೆ.