ಹಣ್ಣುಗಳು ಮತ್ತು ಜ್ಯೂಸ್‌ಗಳು; ಇವೆರಡರಲ್ಲಿ ಆರೋಗ್ಯಕ್ಕೆ ಯಾವುದು ಉತ್ತಮ

ಹಣ್ಣುಗಳನ್ನ ತಿನ್ನೋದಕ್ಕಿಂತಲೂ ಹಣ್ಣುಗಳ ಜ್ಯೂಸ್‌ ಕುಡಿಯೋದನ್ನ ಇಷ್ಟಪಡುವವರ ಸಂಖ್ಯೆಯೇ ಹೆಚ್ಚು. ಹಣ್ಣಿಗಿಂತಲೂ ಹಣ್ಣುಗಳ ಜ್ಯೂಸ್‌ಗೆ ಬೆಲೆ ಜಾಸ್ತಿ. ಹಣ್ಣು ತಿನ್ನೋದು ಕಷ್ಟ..ಆದರೆ ಜ್ಯೂಸ್‌ ಕುಡಿಯೋದು ತುಂಬ ಸುಲಭ. ಅದರಲ್ಲೂ ಮನೆಗೆ ಹಣ್ಣು ತಂದು, ಅದನ್ನ ತೊಳೆದು, ಸಿಪ್ಪೆ ತೆಗೆದು, ಕಟ್‌ ಮಾಡಿ ತಿನ್ನೋದಕ್ಕಿಂತಲೂ, ಫಟ್‌ ಅಂತ ಹೋಟೆಲ್‌, ಜ್ಯೂಸ್‌ ಸೆಂಟರ್‌ಗೆ ಹೋಗಿ ಜ್ಯೂಸ್‌ ಕುಡಿದುಬಂದುಬಿಡೋಣ..ಹಣ್ಣಿನಿಂದ ಮಾಡುವ ಜ್ಯೂಸ್‌ ಕೂಡ ಹಣ್ಣಿನಷ್ಟೇ ಆರೋಗ್ಯಕರ ಎಂದು ಅನೇಕಾನೇಕರು ಭಾವಿಸುತ್ತಾರೆ.

ಮಕ್ಕಳೂ ಅಷ್ಟೇ ಹಣ್ಣು ಕೊಟ್ಟರೆ ತಿನ್ನೋದಿಲ್ಲ. ಹಣ್ಣಿನಿಂದ ಜ್ಯೂಸ್‌ ಮಾಡಿಕೊಟ್ಟರೆ ಕುಡಿಯುತ್ತಾರೆ. ಆದರೆ ಆರೋಗ್ಯದ ದೃಷ್ಟಿಯಿಂದ ಹಣ್ಣು ತಿನ್ನುವುದು ಉತ್ತಮವೋ..ಹಣ್ಣುಗಳ ಜ್ಯೂಸ್‌ ಕುಡಿಯೋದು ಬೆಸ್ಟೋ..?

ನಿಜಕ್ಕೂ ಹೇಳಬೇಕು ಎಂದರೆ ಹಣ್ಣುಗಳ ಜ್ಯೂಸ್‌ ಕುಡಿಯೋದಕ್ಕಿಂತ ಹಣ್ಣುಗಳನ್ನ ತಿನ್ನೋದು ಬಹಳ ಉತ್ತಮ. ಹಣ್ಣುಗಳಲ್ಲಿರುವ ಫೈಬರ್‌ ಅಂಶವು ಅದೇ ಹಣ್ಣಿನಿಂದ ಮಾಡುವ ಜ್ಯೂಸ್‌ನಲ್ಲಿ ಇರೋದಿಲ್ಲ. ಅಥವಾ ಫೈಬರ್‌ ಅಂಶ ಕಡಿಮೆ ಆಗುತ್ತದೆ. ಹಣ್ಣುಗಳನ್ನ ತಿಂದಾಗ ಅದರಲ್ಲಿರುವ ಫೈಬರ್‌ ಅಂಶವು ನಮ್ಮ ಜೀರ್ಣಕ್ರಿಯೆಯನ್ನ ಉತ್ತಮಗೊಳಿಸುತ್ತದೆ. ರಕ್ತದಲ್ಲಿನ ಸಕ್ಕರೆ ಅಂಶವನ್ನ ಜಾಸ್ತಿ ಮಾಡೋದಿಲ್ಲ. ಹೊಟ್ಟೆ ತುಂಬುವಂತೆ ಮಾಡುತ್ತದೆ..
ಆದರೆ ಹಣ್ಣುಗಳ ಸಿಹಿಯೊಟ್ಟಿಗೆ ಮತ್ತೊಂದಿಷ್ಟು ಸಕ್ಕರೆ ಸುರಿದು ಜ್ಯೂಸ್‌ ಮಾಡಿದಾಗ ಅದರಲ್ಲಿನ ಫೈಬರ್‌ ಅಂಶ ಕಡಿಮೆಯಾಗುತ್ತದೆ. ಹೀಗಾದಾಗ ಜ್ಯೂಸ್‌ನಿಂದ ನಿಮ್ಮ ದೇಹ ಸೇರಿದ ಸಕ್ಕರೆ ಅಂಶವು ದೇಹದಲ್ಲಿ ಹಾಗೇ ಉಳಿದುಬಿಡುತ್ತದೆ. ಇದು ದೇಹದಲ್ಲಿ ಸಕ್ಕರೆ ಮಟ್ಟವನ್ನ ಹೆಚ್ಚಿಸುತ್ತದೆ. ಒಂದು ಗ್ಲಾಸ್‌ ಜ್ಯೂಸ್‌ನಲ್ಲಿ, 3-4 ಹಣ್ಣುಗಳಲ್ಲಿ ಇರುವಷ್ಟು ಸಕ್ಕರೆ ಇರುತ್ತದೆ.

ಹಣ್ಣುಗಳು ಯಾಕೆ ಬೆಸ್ಟ್‌?

ಹಣ್ಣುಗಳನ್ನ ಹಾಗೇ ತಿಂದಾಗ ಅದರಲ್ಲಿರುವ ಫೈಬರ್‌ ಅಂಶ ದೇಹಕ್ಕೆ ಸೇರುತ್ತದೆ. ಅದು ನಮ್ಮ ದೇಹವು ಸಕ್ಕರೆ ಅಂಶವನ್ನ ಹೀರಿಕೊಳ್ಳುವುದನ್ನ ನಿಯಂತ್ರಿಸುತ್ತದೆ. ವಿಟಮಿನ್‌ ಮತ್ತು ಖನಿಜಾಂಶಗಳು ಲಭ್ಯವಾಗುತ್ತದೆ. ನೀವು ಹಣ್ಣುಗಳನ್ನ ಅಗಿದು ತಿಂದಾಗ ಹೊಟ್ಟೆ ತುಂಬಿದಂತಾಗುತ್ತದೆ. ಆಗ ನೀವು ಹೆಚ್ಚಿನ ಆಹಾರ ತಿಂದು, ತೂಕ ಜಾಸ್ತಿ ಮಾಡಿಕೊಳ್ಳುವುದು ತಪ್ಪುತ್ತದೆ. ಹಣ್ಣುಗಳನ್ನ ತಿನ್ನುವುದು ಕರುಳಿನ ಆರೋಗ್ಯಕ್ಕೆ ಒಳ್ಳೆಯದು. ಆದರೆ ಜ್ಯೂಸ್‌ಗಳು ಅಷ್ಟೊಂದು ಒಳ್ಳೆಯದಲ್ಲ. ಯಾಕೆಂದರೆ ಇದರಲ್ಲಿ ಫೈಬರ್‌ ಕಡಿಮೆ ಇರುತ್ತದೆ.

ಮನೆಯಲ್ಲೇ ಮಾಡಿಕೊಂಡರೆ ಆರೋಗ್ಯಕ್ಕೆ ಒಳ್ಳೆಯದಾ?

ಹಣ್ಣುಗಳ ಜ್ಯೂಸ್‌ನ್ನ ಅಂಗಡಿಗಳಲ್ಲಿ ಕುಡಿಯದೆ, ಪ್ಯಾಕ್ಡ್‌ ಜ್ಯೂಸ್‌ಗಳನ್ನ ಸೇವಿಸದೆ, ಮನೆಯಲ್ಲೇ ಮಾಡಿಕೊಂಡು ಕುಡಿದರೂ ಆರೋಗ್ಯಕ್ಕೆ ಒಳ್ಳೆಯದು ಅಲ್ಲವಾ ಎಂಬ ಪ್ರಶ್ನೆ ಹುಟ್ಟಬಹುದು. ಪ್ಯಾಕ್ಡ್‌ ಜ್ಯೂಸ್‌, ಹೊರಗೆ ಹೊಟೆಲ್‌-ರೆಸ್ಟೋರೆಂಟ್‌ಗಳಲ್ಲಿ ಮಾಡುವ ಜ್ಯೂಸ್‌ಗಿಂತಲೂ ಮನೆಯಲ್ಲಿ ನಾವೇ ಮಾಡಿಕೊಳ್ಳುವ ಜ್ಯೂಸ್‌ ಆರೋಗ್ಯಕ್ಕೆ ಒಳ್ಳೆಯದು. ಆದರೂ ಕೂಡ ಯಾವುದೇ ಹಣ್ಣುಗಳನ್ನ ಕತ್ತರಿಸಿ, ನೀರು ಹಾಕಿ ರುಬ್ಬಿ ಜ್ಯೂಸ್‌ ಮಾಡಿದಾಕ್ಷಣ ಅದರಲ್ಲಿನ ಫೈಬರ್‌ ಅಂಶ ಹೊರಟುಹೋಗುತ್ತದೆ. ಫೈಬರ್‌ ಅಂಶವಿಲ್ಲದೆ ಸಕ್ಕರೆ ಪದಾರ್ಥ ನಿಮ್ಮ ಹೊಟ್ಟೆಗೆ ಹೋದರೆ, ಬ್ಲಡ್‌ ಶುಗರ್‌ ಜಾಸ್ತಿ ಆಗುತ್ತದೆ.

ಸ್ಮೂದಿ ಒಳ್ಳೆಯದಾ?

ಹಣ್ಣುಗಳಲ್ಲಿ ಮಾಡಬಹುದಾದ ಇನ್ನೊಂದು ಡೆಸರ್ಟ್‌ ಎಂದರೆ ಸ್ಮೂದಿ. ಇದು ಕೂಡ ಸರಿಯಾಗಿ ತಯಾರಿಸಿಕೊಳ್ಳಬೇಕು. ಒಬ್ಬರಿಗೆ ಬೇಕಾಗುವ ಸ್ಮೂದಿಯಲ್ಲಿ ನಾಲ್ಕು ಹಣ್ಣುಗಳನ್ನ ಹಾಕುವುದು ಅಷ್ಟೊಂದು ಒಳ್ಳೆಯದಲ್ಲ. 4 ಹಣ್ಣುಗಳನ್ನ ಹಾಗೇ ತಿನ್ನಲಾಗದು ಎಂದು, ಅಷ್ಟು ಹಣ್ಣು ಹಾಕಿ ಸ್ಮೂದಿ ಮಾಡಿಕೊಳ್ಳಬೇಡಿ. ಒಬ್ಬರಿಗಾದರೆ 1 ಅಥವಾ 2ಹಣ್ಣುಗಳನ್ನ ಹಾಕಿ, ಅದಕ್ಕೆ ಮೊಸರು, ಡ್ರೈಫ್ರೂಟ್ಸ್‌ಗಳನ್ನ ಹಾಕಿ ಸೇವಿಸಿ. ಆದಷ್ಟು ಹಣ್ಣುಗಳನ್ನ ಹಾಗೇ ತಿನ್ನಲು ಪ್ರಯತ್ನಿಸಿದರೆ ಆರೋಗ್ಯದ ದೃಷ್ಟಿಯಿಂದ ತುಂಬ ಒಳ್ಳೆಯದು. ಹಾಗಂತ ಜ್ಯೂಸ್‌ಗಳು ಬೇಡ್ವೇ ಬೇಡ ಎಂದಲ್ಲ. ಆದರೆ ಪ್ರಮಾಣ ಕಡಿಮೆ ಇರಬೇಕು.