ಅಸ್ಸಾಂ ಚುನಾವಣೆ: ಸಿಎಂ ಹಿಮಂತ ಬಿಸ್ವ ಶರ್ಮಾ ಪತ್ನಿ ಬಳಿ 3 ಮುಸ್ಲಿಂ ದೇಶಗಳ ಪಾಸ್‌ಪೋರ್ಟ್? ವಿವಾದ ಸೃಷ್ಟಿ

 ಗುವಾಹಟಿ: ಅಸ್ಸಾಂ ವಿಧಾನಸಭಾ ಚುನಾವಣಾ ಕಣದಲ್ಲಿ ಸಿಎಂ ಹಿಮಂತ ಬಿಸ್ವ ಶರ್ಮಾ ಅವರ ಪತ್ನಿಯ ಪಾಸ್ಪೋರ್ಟ್ ಭಾರಿ ಸದ್ದು ಮಾಡುತ್ತಿದೆ.

ಹಿಮಂತ ಬಿಸ್ವ ಶರ್ಮಾ ಅವರ ಪತ್ನಿಯ ಪಾಸ್ಪೋರ್ಟ್ ಗೆ ಸಂಬಂಧಿಸಿದಂತೆ ವಿಪಕ್ಷ ಕಾಂಗ್ರೆಸ್ ಗಂಭೀರ ಆರೋಪ ಮಾಡಿತ್ತು. ಕಾಂಗ್ರೆಸ್ ನ ಆರೋಪಗಳಿಗೆ ಸಂಬಂಧಿಸಿದಂತೆ ಸಿಎಂ ಹಿಮಂತ ಸ್ಪಷ್ಟನೆ ನೀಡಿದ್ದಾರೆ.

ಅಸ್ಸಾಂ ಮುಖ್ಯಮಂತ್ರಿ ಹಿಮಂತ ಬಿಸ್ವ ಶರ್ಮಾ ತಮ್ಮ ಪತ್ನಿಯ ಪಾಸ್‌ಪೋರ್ಟ್‌ ಕುರಿತು ಕಾಂಗ್ರೆಸ್ ನೀಡಿದ ಮಾಹಿತಿಯಲ್ಲಿ 6 “ತಪ್ಪುಗಳಿವೆ” ಎಂದು ಹೇಳಿದ್ದಾರೆ.

ಹೆಸರಿನ ಅಸಂಗತತೆ, ಯುಎಇ ಐಡಿ ಮತ್ತು ರಾಷ್ಟ್ರೀಯತೆ ಸಂಬಂಧಿತ ತಪ್ಪುಗಳು ಸೇರಿದಂತೆ ಆರು ಅಂಶಗಳನ್ನು ಅವರು ಎತ್ತಿಹಿಡಿದಿದ್ದಾರೆ. ಇವುಗಳನ್ನು ಹಿಮಂತ ಬಿಸ್ವ ಶರ್ಮಾ “ಅಸಡ್ಡೆಯಾಗಿ, ಅಸಮರ್ಪಕವಾಗಿ ಮಾಡಲಾದ ಡಿಜಿಟಲ್ ತಿರುಚುವಿಕೆ” ಎಂದು ಆರೋಪಿಸಿದ್ದಾರೆ. ಸಾಮಾಜಿಕ ಜಾಲತಾಣ ಘಿ ನಲ್ಲಿ ಶರ್ಮಾ ಅವರು, ಈ ಆರು ವೈಷಮ್ಯಗಳನ್ನು ವಿವರಿಸಿ, ತಪ್ಪುಮಾಹಿತಿ ಹಬ್ಬಿಸುತ್ತಿರುವವರ ವಿರುದ್ಧ ಕ್ರಮ ಕೈಗೊಳ್ಳಲಾಗುವುದು ಎಂದು ಎಚ್ಚರಿಸಿದ್ದಾರೆ. “ಸತ್ಯ ಜಯಶೀಲವಾಗುತ್ತದೆ ಎಂದು ಹೇಳಿದ್ದಾರೆ.

ತಪ್ಪುಮಾಹಿತಿ ಹಬ್ಬಿಸುವವರು ಹೊಣೆ ಹೊರಬೇಕು. ಪವನ್ ಖೇರಾ ಅವರ ಸುಳ್ಳಿನ ಅಭಿಯಾನ ಅಂತ್ಯ ಹಂತಕ್ಕೆ ಬಂದಿದೆ ಎಂಬುದು ನನ್ನ ನಂಬಿಕೆ. ಕೊನೆಯಲ್ಲಿ ಖೇರಾ ಜೈಲಿಗೆ ಹೋಗಲಿದ್ದಾರೆ,” ಎಂದು ಅವರು ಪೋಸ್ಟ್‌ನಲ್ಲಿ ಬರೆದಿದ್ದಾರೆ. ಶರ್ಮಾ ಅವರು ತಾವು ಮತ್ತು ತಮ್ಮ ಪತ್ನಿ, ಆರೋಪಗಳನ್ನು ಮಾಡಿದ ಕಾಂಗ್ರೆಸ್ ನಾಯಕ ಪವನ್ ಖೇರಾ ವಿರುದ್ಧ ಮಾನಹಾನಿ ಮೊಕದ್ದಮೆ ಹೂಡುವುದಾಗಿ ಕೂಡ ತಿಳಿಸಿದ್ದಾರೆ.

ಇದಕ್ಕೂ ಮುಂಚಿನ ಮತ್ತೊಂದು ಪೋಸ್ಟ್‌ನಲ್ಲಿ ಶರ್ಮಾ ಅವರು, “ಇಂದು ಪವನ್ ಖೇರಾ ನಡೆಸಿದ ಪತ್ರಿಕಾಗೋಷ್ಠಿ ಕಾಂಗ್ರೆಸ್ ಪಕ್ಷದ ಆಳವಾದ ನಿರಾಶೆ ಮತ್ತು ಗಾಬರಿಯನ್ನು ತೋರಿಸುತ್ತದೆ. ಅಸ್ಸಾಂ ಐತಿಹಾಸಿಕ ಜನಾದೇಶದ ಕಡೆಗೆ ಸ್ಪಷ್ಟವಾಗಿ ಸಾಗುತ್ತಿರುವಾಗ, ಇಂತಹ ಆತುರದ, ಆಧಾರರಹಿತ ದಾಳಿಗಳು ಅವರ ಕುಸಿಯುತ್ತಿರುವ ನೆಲೆಯನ್ನು ಮಾತ್ರ ಬಯಲಿಗೆಳೆಯುತ್ತವೆಯಷ್ಟೆ. ಅವರ ಪ್ರತಿಯೊಂದು ಆರೋಪವನ್ನೂ ನಾನು ಸ್ಪಷ್ಟವಾಗಿ ತಳ್ಳಿಹಾಕುತ್ತೇನೆ. ಇವು ದುರುದ್ದೇಶಪೂರಿತ, ಕಲ್ಪಿತ ಮತ್ತು ರಾಜಕೀಯ ಪ್ರೇರಿತ ಸುಳ್ಳುಗಳು; ಅಸ್ಸಾಂ ಜನರನ್ನು ತಪ್ಪು ದಾರಿಗೆಳೆವ ಉದ್ದೇಶದಿಂದ ಮಾಡಲ್ಪಟ್ಟಿವೆ,” ಎಂದು ಹೇಳಿದ್ದಾರೆ.

ಇದಕ್ಕೂ ಮುನ್ನ, ಕಾಂಗ್ರೆಸ್ ಪಕ್ಷ ಶರ್ಮಾ ಅವರ ಪತ್ನಿ ಮೂರು ದೇಶಗಳ ಪಾಸ್‌ಪೋರ್ಟ್‌ಗಳನ್ನು ಹೊಂದಿದ್ದಾರೆ ಮತ್ತು ಅವರ ಆಸ್ತಿಗಳ ಬಗ್ಗೆ ಶರ್ಮಾ ತಮ್ಮ ಚುನಾವಣಾ ಪ್ರಮಾಣಪತ್ರದಲ್ಲಿ ಮಾಹಿತಿ ಮರೆಮಾಡಿದ್ದಾರೆ ಎಂದು ಆರೋಪಿಸಿತ್ತು. ಪತ್ರಿಕಾಗೋಷ್ಠಿಯಲ್ಲಿ ಪವನ್ ಖೇರಾ ಅವರು ತಮ್ಮ ಆರೋಪಗಳಿಗೆ ಬೆಂಬಲವಾಗಿ ಕೆಲವು ದಾಖಲೆಗಳನ್ನು ಪ್ರದರ್ಶಿಸಿ, ಈ ಮಾಹಿತಿಯನ್ನು ಮರೆಮಾಡಿದ ಕಾರಣಕ್ಕೆ ಚುನಾವಣಾ ಆಯೋಗ ಶರ್ಮಾ ಅವರ ನಾಮಪತ್ರವನ್ನು ರದ್ದುಪಡಿಸಬೇಕು ಎಂದು ಆಗ್ರಹಿಸಿದರು.

“ಅಸ್ಸಾಂ ಮುಖ್ಯಮಂತ್ರಿ ಹಿಮಂತ ಬಿಸ್ವ ಶರ್ಮಾ ಮತ್ತು ಅವರ ಪತ್ನಿಯ ಮೇಲೆ ಭೂ ಕಬಳಿಕೆ, ದೇವಾಲಯದ ದೇಣಿಗೆಗಳ ದುರುಪಯೋಗ, ಸರ್ಕಾರದ ಅನುದಾನಗಳ ಅಕ್ರಮ ಬಳಕೆ ಸೇರಿದಂತೆ ಹಲವು ಆರೋಪಗಳು ಕಾಲಕಾಲಕ್ಕೆ ಕೇಳಿಬಂದಿವೆ” ಎಂದು ಖೇರಾ ಹೇಳಿದರು. “ಅಸ್ಸಾಂ ಮುಖ್ಯಮಂತ್ರಿ ಅವರ ಪತ್ನಿ ರಿನಿಕಿ ಭೂಯನ್ ಶರ್ಮಾ ಮೂರು ಪಾಸ್‌ಪೋರ್ಟ್‌ಗಳನ್ನು ಹೊಂದಿದ್ದಾರೆ,” ಎಂದು ಅವರು ಆರೋಪಿಸಿದರು.

ಖೇರಾ ಅವರ ಪ್ರಕಾರ, ರಿನಿಕಿ ಭೂಯನ್ ಶರ್ಮಾ ಅವರಿಗೆ 2022ರ ಮಾರ್ಚ್ 14ರಂದು ಜಾರಿಗೊಂಡು 2027ರ ಮಾರ್ಚ್ 13ರವರೆಗೆ ಮಾನ್ಯವಾಗಿರುವ ಯುಎಇ ಪಾಸ್‌ಪೋರ್ಟ್ ಇದೆ. ಎರಡನೇ ಪಾಸ್‌ಪೋರ್ಟ್ ಆಂಟಿಗುವಾ ಮತ್ತು ಬರ್ಬುಡಾ ದೇಶದದ್ದಾಗಿದೆ. ಇದು 2021ರ ಆಗಸ್ಟ್ 26ರಂದು ನೀಡಲ್ಪಟ್ಟು 2031ರ ಆಗಸ್ಟ್ 25ರವರೆಗೆ ಮಾನ್ಯವಾಗಿದೆ. ಮೂರನೇ ಪಾಸ್‌ಪೋರ್ಟ್ ಈಜಿಪ್ಟ್ ದೇಶದದ್ದು; 2022ರ ಫೆಬ್ರವರಿ 13ರಂದು ಜಾರಿಗೊಂಡು 2029ರ ಫೆಬ್ರವರಿ 12ರವರೆಗೆ ಮಾನ್ಯವಾಗಿದೆ ಎಂದು ಅವರು ಹೇಳಿದರು.

“ಹಿಮಂತ ಬಿಸ್ವ ಶರ್ಮಾ ಅವರ ರಾಜಕೀಯ ಸಂಪೂರ್ಣವಾಗಿ ಮುಸ್ಲಿಮರ ವಿರುದ್ಧದ ದ್ವೇಷದ ಮೇಲೆ ನಿಂತಿದೆ; ಆದರೆ ಅವರ ಪತ್ನಿ ಎರಡು ಮುಸ್ಲಿಂ ರಾಷ್ಟ್ರಗಳ ಪಾಸ್‌ಪೋರ್ಟ್‌ಗಳನ್ನು ಹೊಂದಿದ್ದಾರೇಕೆ?” ಎಂದು ಖೇರಾ ಪ್ರಶ್ನಿಸಿದರು. “ಚುನಾವಣೆಯಲ್ಲಿ ಸೋಲು ಕಂಡರೆ ದೇಶದಿಂದ ಪರಾರಿಯಾಗಲು ಮುಂಚಿತ ಸಿದ್ಧತೆ ಮಾಡಿಕೊಳ್ಳುತ್ತಿದ್ದಾರೇ?” ಎಂದು ಅವರು ಮತ್ತೊಂದು ಪ್ರಶ್ನೆ ಎತ್ತಿದರು. ಇದಲ್ಲದೆ, ಶರ್ಮಾ ಅವರ ಪತ್ನಿ ದುಬೈನಲ್ಲಿ ಎರಡು ಆಸ್ತಿಗಳನ್ನು ಮತ್ತು ಅಮೆರಿಕದ ವ್ಯೊಮಿಂಗ್ ರಾಜ್ಯದಲ್ಲಿ ನೋಂದಾಯಿತ ಕಂಪನಿಯೊಂದನ್ನು ಹೊಂದಿದ್ದಾರೆ, ಆದರೆ ಇವುಗಳನ್ನು ತಮ್ಮ ಚುನಾವಣಾ ಪ್ರಮಾಣಪತ್ರದಲ್ಲಿ ಶರ್ಮಾ ಬಹಿರಂಗಪಡಿಸಿಲ್ಲ ಎಂದು ಖೇರಾ ಆರೋಪಿಸಿದರು.