ಅಪರಿಚಿತ ವ್ಯಕ್ತಿಯಿಂದ ಹ್ಯಾಕಿಂಗ್; ದಿಲ್ಲಿ ಹೈಕೋರ್ಟ್‌ ನ ಆನ್‌ ಲೈನ್ ಕಲಾಪದಲ್ಲಿ ಮೂರು ಬಾರಿ ಅಶ್ಲೀಲ ವೀಡಿಯೊ, ಸಂಗೀತ ಪ್ರಸಾರ!

ನವದೆಹಲಿ: ದೆಹಲಿ ಹೈಕೋರ್ಟ್‌ನ ಮುಖ್ಯ ನ್ಯಾಯಮೂರ್ತಿಯವರು ಬುಧವಾರ ವೀಡಿಯೊ ಕಾನ್ಫರೆನ್ಸ್ ಮೂಲಕ ಕಲಾಪಗಳನ್ನು ನಡೆಸುತ್ತಿದ್ದ ವೇಳೆ, ಒಂದಲ್ಲ, ಎರಡಲ್ಲ ಮೂರು ಬಾರಿ ಅಶ್ಲೀಲ ವೀಡಿಯೊ ದೃಶ್ಯಗಳು ಹಾಗೂ ಸಂಗೀತ ಪ್ರಸಾರವಾದ ಘಟನೆ ಬೆಳಕಿಗೆ ಬಂದಿದೆ.

 ಅಪರಿಚಿತ ವ್ಯಕ್ತಿಯೊಬ್ಬನು ವೀಡಿಯೊ ಕಾನ್ಫರೆನ್ಸಿಂಗ್ ವ್ಯವಸ್ಥೆಗೆ ಪ್ರವೇಶ ಪಡೆದು ಈ ಅಶ್ಲೀಲ ದೃಶ್ಯಗಳನ್ನು ಪ್ರಸಾರ ಮಾಡಿದ್ದಾನೆ ಎಂದು ಹೇಳಲಾಗಿದೆ.

ಮುಖ್ಯ ನ್ಯಾಯಮೂರ್ತಿ ದೇವೇಂದ್ರ ಕುಮಾರ್ ಉಪಾಧ್ಯಾಯ ಹಾಗೂ ನ್ಯಾಯಮೂರ್ತಿ ತೇಜಸ್ ಕರಿಯಾ ಅವರನ್ನೊಳಗೊಂಡ ವಿಭಾಗೀಯ ಪೀಠ ವಿಚಾರಣೆ ನಡೆಸುತ್ತಿದ್ದಾಗ, ಮಧ್ಯಾಹ್ನ 12:56ರ ವೇಳೆಗೆ ಮೊದಲ ಘಟನೆ ನಡೆದಿದೆ.

ತಕ್ಷಣವೇ ವೀಡಿಯೊ ಕಾನ್ಫರೆನ್ಸ್ ಕಲಾಪವನ್ನು ಸ್ಥಗಿತಗೊಳಿಸಲಾಯಿತು. ಕೆಲವೇ ನಿಮಿಷಗಳಲ್ಲಿ ಕಲಾಪವನ್ನು ಮರುಾರಂಭಿಸಲಾಯಿತು. ಆದರೆ ನಂತರ ಮತ್ತೊಮ್ಮೆ ಅಶ್ಲೀಲ ವೀಡಿಯೊ ಪ್ರಸಾರವಾಯಿತು.

ಈ ವೇಳೆ ಕನಿಷ್ಠ ಎರಡು ಪರದೆಗಳಲ್ಲಿ ಅಶ್ಲೀಲ ದೃಶ್ಯಗಳು ಕಾಣಿಸಿಕೊಂಡವು. ಬಳಿಕ ಬಳಕೆದಾರನು "ನಿಮ್ಮನ್ನು ಹ್ಯಾಕ್ ಮಾಡಲಾಗಿದೆ" ಎಂಬ ಸಂದೇಶವನ್ನೂ ಪ್ರಸಾರ ಮಾಡಿದ್ದಾನೆ.

ಮೂರನೇ ಬಾರಿ ಸಂಗೀತವನ್ನು ಪ್ರಸಾರ ಮಾಡುವ ಮೂಲಕ ಕಲಾಪಕ್ಕೆ ಅಡ್ಡಿಪಡಿಸಲಾಯಿತು. ಇದರಿಂದ ಮುಖ್ಯ ನ್ಯಾಯಮೂರ್ತಿಯವರು ವಿಚಾರಣೆಯನ್ನು ಸಂಪೂರ್ಣ ಸ್ಥಗಿತಗೊಳಿಸಿದರು.

ಈ ಘಟನೆಗೆ ಸಂಬಂಧಿಸಿ ಕ್ರಮ ಕೈಗೊಳ್ಳುವಂತೆ ಮುಖ್ಯ ನ್ಯಾಯಮೂರ್ತಿ ಉಪಾಧ್ಯಾಯ ಅವರು ರಿಜಿಸ್ಟ್ರಾರ್ ಜನರಲ್ ಅವರಿಗೆ ಸೂಚಿಸಿದರು. ನ್ಯಾಯಾಲಯದ ಕಲಾಪಗಳ ವೀಡಿಯೊ ದಾಖಲಿಸುವುದನ್ನು ನಿಷೇಧಿಸಿದ್ದು, ಯಾರಾದರೂ ಇಂತಹ ದೃಶ್ಯಗಳನ್ನು ದಾಖಲಿಸಿ ಪ್ರಸಾರ ಮಾಡಿದರೆ ಕಾನೂನು ಕ್ರಮ ಕೈಗೊಳ್ಳಲಾಗುವುದು ಎಂದು ಎಚ್ಚರಿಸಲಾಗಿದೆ.