ಮತ ಚಲಾಯಿಸದವರನ್ನು ಶಿಕ್ಷಿಸಲು ಸಾಧ್ಯವಿಲ್ಲ: ಸುಪ್ರೀಂ ಕೋರ್ಟ್

ನವದೆಹಲಿ: ಚುನಾವಣಾ ದಿನದಂದು ಮತಗಟ್ಟೆಗೆ ತೆರಳದೆ ಇರಲು ನಿರ್ಧರಿಸಿದ ಮತದಾರರನ್ನು ಶಿಕ್ಷಿಸುವುದು ಅಥವಾ ಬಂಧಿಸುವುದು ಸಾಧ್ಯವಿಲ್ಲ ಎಂದು ಸುಪ್ರೀಂ ಕೋರ್ಟ್ ಗುರುವಾರ ಹೇಳಿದೆ.

ಭಾರತದ ಮುಖ್ಯ ನ್ಯಾಯಮೂರ್ತಿ (ಸಿಜೆಐ) ಸೂರ್ಯ ಕಾಂತ್ ನೇತೃತ್ವದ ಪೀಠವು, ಮತದಾನವು ಹಕ್ಕಾಗಿದ್ದು, ಅದನ್ನು ಬಳಸುವುದೇ ಅಥವಾ ಬಳಸದೇ ಇರುವುದೇ ಎಂಬ ನಿರ್ಧಾರ ಮತದಾರರದ್ದೇ ಎಂದು ಸ್ಪಷ್ಟಪಡಿಸಿತು.

ಪ್ರಜಾಪ್ರಭುತ್ವದಲ್ಲಿ ಮತ ಚಲಾಯಿಸುವುದು ನಿರೀಕ್ಷಿತವಾದರೂ, ಅದನ್ನು ಬಲವಂತಪಡಿಸಲು ಸಾಧ್ಯವಿಲ್ಲ ಎಂದು ನ್ಯಾಯಾಲಯ ತಿಳಿಸಿತು.

ಚುನಾವಣಾ ದಿನದಂದು ಮತದಾನ ಮಾಡದವರ ವಿರುದ್ಧ ದಂಡ ಅಥವಾ ನಿರ್ಬಂಧ ವಿಧಿಸುವಂತೆ ಕೋರಿ ಅಜಯ್ ಗೋಯೆಲ್ ಸಲ್ಲಿಸಿದ್ದ ಅರ್ಜಿಯನ್ನು ಪೀಠ ವಿಚಾರಣೆ ನಡೆಸಿತು.

ವಿಚಾರಣೆ ವೇಳೆ ಸಿಜೆಐ ದಿನಗೂಲಿ ಕಾರ್ಮಿಕರು ಮತ್ತು ವಲಸೆ ಕಾರ್ಮಿಕರ ಉದಾಹರಣೆ ನೀಡಿದರು. ತಮ್ಮ ದಿನನಿತ್ಯದ ಆದಾಯ ಕಳೆದುಕೊಂಡು ಮತ ಚಲಾಯಿಸಲು ತಮ್ಮ ರಾಜ್ಯಕ್ಕೆ ಹೋಗುವಂತೆ ಅವರನ್ನು ಬಲವಂತಗೊಳಿಸಬೇಕೇ ಎಂಬ ಪ್ರಶ್ನೆಯನ್ನು ಎತ್ತಿದರು. "ಅವರು ಹೋಗದಿದ್ದರೆ ಅವರನ್ನು ಬಂಧಿಸಬೇಕೇ?" ಎಂದು ಪ್ರಶ್ನಿಸಿದ ಅವರು, ಇಂತಹ ಕ್ರಮಗಳು ಪ್ರಜಾಪ್ರಭುತ್ವದ ತತ್ವಗಳಿಗೆ ವಿರುದ್ಧ ಎಂದು ಹೇಳಿದರು.

"ಎಲ್ಲರೂ ಮತ ಚಲಾಯಿಸಬೇಕು ಎಂಬ ನಿರೀಕ್ಷೆ ಇರಬಹುದು. ಆದರೆ ಅವರು ಹೋಗದಿದ್ದರೆ, ಅದು ಅವರ ಆಯ್ಕೆ," ಎಂದು ಪೀಠ ತಿಳಿಸಿತು. ಮತದಾನದ ಬಗ್ಗೆ ಜಾಗೃತಿ ಮೂಡಿಸುವುದೇ ಸರಿಯಾದ ಮಾರ್ಗ, ಬಲವಂತವಲ್ಲ ಎಂದು ನ್ಯಾಯಾಲಯ ಹೇಳಿದೆ.

ಅರ್ಜಿಯನ್ನು ವಿಲೇವಾರಿ ಮಾಡಿದ ಪೀಠವು, ಈ ವಿಷಯದಲ್ಲಿ ಅರ್ಜಿದಾರರು ಸಂಬಂಧಪಟ್ಟ ಅಧಿಕಾರಿಗಳನ್ನು ಸಂಪರ್ಕಿಸಬಹುದು ಎಂದು ಸೂಚಿಸಿದೆ.