ರಾಷ್ಟ್ರೀಯ ಥ್ರೋಬಾಲ್ ಆಯ್ಕೆ ಟ್ರಯಲ್ಸ್‍ಗೆ ಬೆಳ್ಳೂರಿನ ಬಾಲಪ್ರತಿಭೆ ಆಶಿಶ್ ಕೆ.ಪಿ. ಆಯ್ಕೆ

ಮುಳ್ಳೇರಿಯ: ಮಧ್ಯಪ್ರದೇಶದ ಇಂದೋರ್‍ನಲ್ಲಿ ಮೇ 21 ರಿಂದ 23 ರವರೆಗೆ ಆಯೋಜನೆಗೊಂಡಿರುವ 31ನೇ ರಾಷ್ಟ್ರೀಯ ಸಬ್-ಜೂನಿಯರ್ ಥ್ರೋಬಾಲ್ ಚಾಂಪಿಯನ್‍ಶಿಪ್ ಮತ್ತು 35ನೇ ಫೆಡರೇಶನ್ ಕಪ್ ಸೀನಿಯರ್ ಥ್ರೋಬಾಲ್ ರಾಷ್ಟ್ರೀಯ ಚಾಂಪಿಯನ್‍ಶಿಪ್‍ಗೆ ಕೇರಳ ರಾಜ್ಯ ತಂಡವನ್ನು ಪ್ರತಿನಿಧಿಸುವ ಮುಕ್ತ ಆಯ್ಕೆ ಟ್ರಯಲ್ಸ್‍ಗೆ ಕಾಸರಗೋಡು ಜಿಲ್ಲೆಯ ಹೆಮ್ಮೆಯ ಕ್ರೀಡಾಪಟು ಆಶಿಶ್ ಕೆ.ಪಿ. ಅರ್ಹತೆ ಪಡೆದಿದ್ದಾರೆ.

ರಾಷ್ಟ್ರೀಯ ಥ್ರೋಬಾಲ್ ಫೆಡರೇಶನ್‍ನ ಅಧಿಕೃತ ಪ್ರಕಟಣೆಯ ಬೆನ್ನಲ್ಲೇ, ಅಲ್ಪಾವಧಿಯಲ್ಲಿ ರಾಜ್ಯ ಚಾಂಪಿಯನ್‍ಶಿಪ್‍ಗಳನ್ನು ನಡೆಸಲು ಸಾಧ್ಯವಾಗದ ಹಿನ್ನೆಲೆಯಲ್ಲಿ ಕೇರಳ ಥ್ರೋಬಾಲ್ ಅಸೋಸಿಯೇಷನ್ ಮುಕ್ತ ಆಯ್ಕೆ ಪ್ರಕ್ರಿಯೆಯನ್ನು ಹಮ್ಮಿಕೊಂಡಿತ್ತು. ಎರ್ನಾಕುಳಂನ ಪೋರ್ಟ್ ಕೊಚ್ಚಿಯಲ್ಲಿ ನಡೆದ ಈ ಮಹತ್ವದ ಆಯ್ಕೆ ಶಿಬಿರದಲ್ಲಿ ಪಾಲ್ಗೊಳ್ಳಲು ಕಾಸರಗೋಡು ಜಿಲ್ಲೆಯಿಂದ ಅತ್ಯುತ್ತಮ ಕ್ರೀಡಾ ಪ್ರದರ್ಶನ ತೋರಿದ ಆಶಿಶ್ ಕಣಕ್ಕಿಳಿದಿದ್ದಾರೆ.

ಅಗಲ್ಪಾಡಿ ಶ್ರೀ ಅನ್ನಪೂರ್ಣೇಶ್ವರಿ ಪ್ರೌಢ ಶಾಲೆ ವಿದ್ಯಾರ್ಥಿಯಾಗಿರುವ ಆಶಿಶ್ ಕೆ.ಪಿ., ಬೆಳ್ಳೂರು ನಿವಾಸಿ ಪ್ರಸಾದ್ ಕೆ. ಕಲ್ಲೇರಿಮೂಲೆಯವರ ಪುತ್ರ. ಕ್ರೀಡೆಯಲ್ಲಿ ಆರಂಭದಿಂದಲೂ ಅಪಾರ ಆಸಕ್ತಿ ಹೊಂದಿರುವ ಇವರು, ಶಾಲಾ ಮಟ್ಟದಿಂದಲೇ ಥ್ರೋಬಾಲ್ ಆಟದಲ್ಲಿ ಕರಗತ ಮಾಡಿಕೊಂಡ ಕೌಶಲ್ಯಗಳ ಮೂಲಕ ಇಂದು ರಾಜ್ಯ ಮತ್ತು ರಾಷ್ಟ್ರ ಮಟ್ಟದ ಗಮನ ಸೆಳೆಯುವಲ್ಲಿ ಯಶಸ್ವಿಯಾಗಿದ್ದಾರೆ. ಕೇರಳ ಥ್ರೋಬಾಲ್ ಅಸೋಸಿಯೇಷನ್ ನಿಯಮಾವಳಿಗಳ ಪ್ರಕಾರ, ಸಬ್-ಜೂನಿಯರ್ ಮತ್ತು ಫೆಡರೇಶನ್ ಕಪ್ ವಿಭಾಗಗಳ ಅಡಿಯಲ್ಲಿ ಜಿಲ್ಲಾ ಮಟ್ಟದಿಂದ ಗರಿಷ್ಠ ಐದು ಅತ್ಯುತ್ತಮ ಕ್ರೀಡಾಪಟುಗಳಿಗೆ ಮಾತ್ರ ಈ ಮುಕ್ತ ಆಯ್ಕೆ ಟ್ರಯಲ್ಸ್‍ನಲ್ಲಿ ಪಾಲ್ಗೊಳ್ಳಲು ಅವಕಾಶ ಕಲ್ಪಿಸಲಾಗಿತ್ತು. ಕಠಿಣ ಸ್ಪರ್ಧೆಯ ನಡುವೆಯೂ ಆಶಿಶ್ ತಮ್ಮ ಅತ್ಯುತ್ತಮ ತಾಂತ್ರಿಕ ಆಟದ ಪ್ರದರ್ಶನದ ಮೂಲಕ ಜಿಲ್ಲಾ ಸಂಘದ ವಿಶ್ವಾಸ ಗಳಿಸಿ ಮುಂದಿನ ಹಂತಕ್ಕೆ ಆಯ್ಕೆಯಾಗಿದ್ದಾರೆ. ರಾಷ್ಟ್ರೀಯ ಚಾಂಪಿಯನ್‍ಶಿಪ್‍ನ ಸಬ್-ಜೂನಿಯರ್ ಹಾಗೂ ಸೀನಿಯರ್ ಫೆಡರೇಶನ್ ಕಪ್ ಎರಡರಲ್ಲೂ ಕೇರಳದ ಪರವಾಗಿ ಕಣಕ್ಕಿಳಿಯುವ ಸದವಕಾಶ ಈ ಪ್ರತಿಭೆಗೆ ಒಲಿದುಬಂದಿದ್ದು, ಗಡಿನಾಡಿನ ಕ್ರೀಡಾ ವಲಯದಲ್ಲಿ  ಸುವರ್ಣ ಅಕ್ಷರಗಳಲ್ಲಿ ಬರೆದಿಡುವಂತಹ ಸಾಧನೆಯಾಗಿದೆ. ಪ್ರಸ್ತುತ ಆಯ್ಕೆ ಶಿಬಿರದ ಅಂತಿಮ ಪ್ರಕ್ರಿಯೆಗಳು ಮುಕ್ತಾಯದ ಹಂತದಲ್ಲಿದ್ದು, ರಾಷ್ಟ್ರೀಯ ಮಟ್ಟದಲ್ಲಿ ಆಶಿಶ್ ಕೇರಳ ತಂಡಕ್ಕೆ ಮತ್ತು ತಮ್ಮ ಜಿಲ್ಲೆಗೆ ಕೀರ್ತಿ ತರಲಿದ್ದಾರೆ ಎಂಬ ಆಶಾಭಾವನೆ ವ್ಯಕ್ತವಾಗಿದೆ. ಬೆಳ್ಳೂರಿನ ಕಲ್ಲೇರಿಮೂಲೆಯ ಕ್ರೀಡಾ ಮಣಿ ಆಶಿಶ್ ಅವರ ಈ ಹೆಮ್ಮೆಯ ಸಾಧನೆಗೆ ಶಾಲಾ ಆಡಳಿತ ಮಂಡಳಿ, ಕ್ರೀಡಾಭಿಮಾನಿಗಳು ಹಾಗೂ ಗಡಿನಾಡಿನ ಜನತೆ ಹಾರ್ದಿಕ ಅಭಿನಂದನೆಗಳನ್ನು ಸಲ್ಲಿಸಿ, ರಾಷ್ಟ್ರೀಯ ಪಂದ್ಯಾವಳಿಯಲ್ಲಿ ಜಯಭೇರಿ ಬಾರಿಸಲಿ ಎಂದು ಶುಭ ಹಾರೈಸಿದ್ದಾರೆ.