ಭೂಕಂಪದ ಆರ್ಭಟಕ್ಕೆ ಸ್ಮಶಾನವಾದ ವೆನೆಜುವೆಲಾ: ಸಾವಿನ ಸಂಖ್ಯೆ 1ಲಕ್ಷ ತಲುಪುವ ಭೀತಿ

ವೆನೆಜುವೆಲಾ:  ಲ್ಯಾಟಿನ್ ಅಮೆರಿಕದ ವೆನೆಜುವೆಲಾ ದೇಶವು ತನ್ನ ಇತಿಹಾಸದಲ್ಲೇ ಅತ್ಯಂತ ಭೀಕರ ಮತ್ತು ವಿನಾಶಕಾರಿ ನೈಸರ್ಗಿಕ ವಿಕೋಪಕ್ಕೆ ಸಾಕ್ಷಿಯಾಗಿದೆ. ಕೇವಲ 39 ಸೆಕೆಂಡುಗಳ ಅಂತರದಲ್ಲಿ ಸಂಭವಿಸಿದ 7.2 ಮತ್ತು 7.5 ತೀವ್ರತೆಯ ಅವಳಿ ಭೂಕಂಪಗಳು ದೇಶದ ರಾಜಧಾನಿ ಕಾರಕಾಸ್ ಸೇರಿದಂತೆ ಪ್ರಮುಖ ನಗರಗಳನ್ನು ಸ್ಮಶಾನವನ್ನಾಗಿ ಪರಿವರ್ತಿಸಿವೆ.

ಈ ದುರಂತದಲ್ಲಿ ಇದುವರೆಗೆ 40ಕ್ಕೂ ಹೆಚ್ಚು ಮಂದಿ ಸಾವನ್ನಪ್ಪಿದ್ದು, 700ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ. ಆದರೆ, ಅವಶೇಷಗಳ ಅಡಿಯಲ್ಲಿ ಸಾವಿರಾರು ಮಂದಿ ಸಿಲುಕಿರುವ ಶಂಕೆ ಇರುವುದರಿಂದ ಸಾವಿನ ಸಂಖ್ಯೆ ಲಕ್ಷದ ಗಡಿ ತಲುಪಬಹುದು ಎಂದು ಅಮೆರಿಕದ ಭೂಗರ್ಭ ಸಮೀಕ್ಷಾ ಇಲಾಖೆ ಆತಂಕ ವ್ಯಕ್ತಪಡಿಸಿದೆ.

ಸದ್ಯದ ಅಧಿಕೃತ ಮಾಹಿತಿಯ ಪ್ರಕಾರ 40 ಮಂದಿ ಮೃತಪಟ್ಟಿದ್ದರೂ, ನೈಜ ಪರಿಸ್ಥಿತಿ ಭಯಾನಕವಾಗಿದೆ. ಅಮೆರಿಕದ ಭೂಗರ್ಭ ಸಮೀಕ್ಷಾ ಇಲಾಖೆಯ 'ಪೇಜರ್' ಮುನ್ಸೂಚನೆಯು ಈ ದುರಂತದಲ್ಲಿ ಸಾವಿನ ಸಂಖ್ಯೆ 10 ಸಾವಿರದಿಂದ 1 ಲಕ್ಷದವರೆಗೆ ಇರಬಹುದು ಎಂದು ಅಂದಾಜಿಸಿದೆ. ಇದಕ್ಕೆ ಪ್ರಮುಖ ಕಾರಣವೆಂದರೆ ಸಂಪರ್ಕ ಸಾಧನಗಳು ಮತ್ತು ಇಂಟರ್ನೆಟ್ ಸಂಪೂರ್ಣ ಕಡಿತಗೊಂಡಿರುವುದು. ಮೊದಲ ಎರಡು ಕಂಪನಗಳ ನಂತರ 4.9 ರಿಂದ 6.4 ತೀವ್ರತೆಯ 20ಕ್ಕೂ ಹೆಚ್ಚು ಆಫ್ಟರ್‌ಶಾಕ್‌ಗಳು (ನಂತರದ ಕಂಪನಗಳು) ಸಂಭವಿಸುತ್ತಿರುವುದು ರಕ್ಷಣಾ ಕಾರ್ಯಕ್ಕೆ ಭಾರಿ ಅಡಚಣೆ ತಂದಿದೆ.

ಭೂಕಂಪದ ಸಂಭವನೀಯತೆ ಮತ್ತು ತೀವ್ರತೆ

ವೆನೆಜುವೆಲಾದ ಯಾರಾಕುಯ್ ಪ್ರಾಂತ್ಯದ ವೆರೋಸ್ ಮುನ್ಸಿಪಾಲಿಟಿಯನ್ನು ಕೇಂದ್ರವಾಗಿಟ್ಟುಕೊಂಡು ಮೊದಲ ಭೂಕಂಪನ (7.2 ತೀವ್ರತೆ) ಸಂಭವಿಸಿತು. ಇದರ ಬೆನ್ನಲ್ಲೇ ಸಂಭವಿಸಿದ 7.5 ತೀವ್ರತೆಯ ಎರಡನೇ ಭೂಕಂಪನವು ಭೂಮಿಯನ್ನು ಅಕ್ಷರಶಃ ಅಲ್ಲಾಡಿಸಿಬಿಟ್ಟಿತು. ಈ ಕಂಪನಗಳ ತೀವ್ರತೆಯು ಎಷ್ಟು ಪ್ರಬಲವಾಗಿತ್ತೆಂದರೆ, ನೆರೆಯ ಕೊಲಂಬಿಯಾ, ಬ್ರೆಜಿಲ್ ಹಾಗೂ ಕೆರಿಬಿಯನ್ ದ್ವೀಪಗಳಾದ ಅರುಬಾ ಮತ್ತು ಬೊನೈರ್‌ನಲ್ಲಿಯೂ ಭೂಮಿ ನಡುಗಿದೆ. ದುರಂತ ಸಂಭವಿಸಿದ ಜೂನ್ 24 ವೆನೆಜುವೆಲಾದಲ್ಲಿ 'ಬ್ಯಾಟಲ್ ಆಫ್ ಕರಾಬೊಬೊ' ಸರಣಿಯ ರಾಷ್ಟ್ರೀಯ ರಜಾ ದಿನವಾಗಿತ್ತು. ಜನರು ತಮ್ಮ ಮನೆಗಳಲ್ಲಿ ವಿಶ್ರಾಂತಿ ಪಡೆಯುತ್ತಿದ್ದ ಸಂದರ್ಭದಲ್ಲಿ ಭೂಕಂಪ ಸಂಭವಿಸಿದ್ದು ದೊಡ್ಡ ಮಟ್ಟದ ಹಾನಿಗೆ ಕಾರಣವಾಯಿತು. ಕಚೇರಿಗಳು ಮತ್ತು ಶಾಲಾ-ಕಾಲೇಜುಗಳು ಮುಚ್ಚಿದ್ದರಿಂದ ಜನರು ಮನೆಗಳಲ್ಲೇ ಇದ್ದರು, ಬಹುಮಹಡಿ ವಸತಿ ಸಮುಚ್ಚಯಗಳು ಕುಸಿದು ಬಿದ್ದಾಗ ಹೆಚ್ಚಿನ ಸಂಖ್ಯೆಯಲ್ಲಿ ಕುಟುಂಬಗಳು ಅವಶೇಷಗಳಡಿಯಲ್ಲಿ ಸಿಲುಕಿಕೊಂಡವು.

ನಗರಗಳ ನಾಶ

ರಾಜಧಾನಿ ಕಾರಕಾಸ್ ನಗರವು ಧೂಳಿನ ಮಯವಾಗಿದೆ. ನೂರಾರು ಗಗನಚುಂಬಿ ಕಟ್ಟಡಗಳು ಇಸ್ಪೀಟ್ ಎಲೆಗಳಂತೆ ಕುಸಿದು ಬಿದ್ದಿದ್ದು, ರಸ್ತೆಗಳು ಮತ್ತು ಹೆದ್ದಾರಿಗಳು ಸೀಳಿಹೋಗಿವೆ. ಕಾರಕಾಸ್‌ನ ಶ್ರೀಮಂತ ಪ್ರದೇಶವಾದ ಅಲ್ಟಾಮಿರಾದಲ್ಲಿ ದೊಡ್ಡ ವಸತಿ ಸಂಕೀರ್ಣಗಳು ನೆಲಸಮವಾಗಿವೆ. ಕರಾವಳಿ ಬಂದರು ನಗರವಾದ ಲಾ ಗುವೈರಾ ಕೂಡ ತತ್ತರಿಸಿದ್ದು, ಪ್ರಸಿದ್ಧ 'ಎಡ್ವರ್ಡ್ಸ್ ಹೋಟೆಲ್ ಬೂಟಿಕ್' ಸೇರಿದಂತೆ ಕಡಲತೀರದ ಹಲವು ಪ್ರಮುಖ ಕಟ್ಟಡಗಳು ಸಂಪೂರ್ಣವಾಗಿ ನಾಶವಾಗಿವೆ. ದೇಶದ ಮುಖ್ಯ ಹೆಬ್ಬಾಗಿಲಾದ 'ಸೈಮನ್ ಬೊಲಿವರ್ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣ'ದ ಕಟ್ಟಡಕ್ಕೆ ತೀವ್ರ ಹಾನಿಯಾಗಿರುವುದರಿಂದ ವಿಮಾನಗಳ ಸಂಚಾರವನ್ನು ಸಂಪೂರ್ಣವಾಗಿ ಸ್ಥಗಿತಗೊಳಿಸಲಾಗಿದೆ.

ತುರ್ತು ಪರಿಸ್ಥಿತಿ ಘೋಷಣೆ

ಪರಿಸ್ಥಿತಿಯ ಗಂಭೀರತೆಯನ್ನು ಅರಿತ ವೆನೆಜುವೆಲಾದ ಮಧ್ಯಂತರ ಅಧ್ಯಕ್ಷೆ ಡೆಲ್ಸಿ ರೊಡ್ರಿಗಸ್ ಅವರು ದೇಶಾದ್ಯಂತ ತುರ್ತು ಪರಿಸ್ಥಿತಿಯನ್ನು ಘೋಷಿಸಿದ್ದಾರೆ. ರಾಷ್ಟ್ರೀಯ ಅಸೆಂಬ್ಲಿ ಮುಖ್ಯಸ್ಥರು ಮತ್ತು ಆಂತರಿಕ ಸಚಿವರೊಂದಿಗೆ ಸಭೆ ನಡೆಸಿದ ಅವರು, ರಕ್ಷಣಾ ಪಡೆಗಳು ಮತ್ತು ರೆಡ್ ಕ್ರಾಸ್ ಸಂಸ್ಥೆಗಳನ್ನು ಯುದ್ಧೋಪಾದಿಯಲ್ಲಿ ಕಾರ್ಯಾಚರಣೆಗೆ ನಿಯೋಜಿಸಿದ್ದಾರೆ. ಶಾಲೆಗಳು ಮತ್ತು ಅಗತ್ಯವಲ್ಲದ ಎಲ್ಲಾ ಸರ್ಕಾರಿ ಕಾರ್ಯಗಳನ್ನು ಮುಂದಿನ ಆದೇಶದವರೆಗೆ ಸ್ಥಗಿತಗೊಳಿಸಲಾಗಿದೆ. ಸಾರ್ವಜನಿಕ ಮತ್ತು ಖಾಸಗಿ ಆರೋಗ್ಯ ಜಾಲಗಳನ್ನು ತುರ್ತು ಸೇವೆಗಾಗಿ ಸಜ್ಜುಗೊಳಿಸಲಾಗಿದೆ. ಜೆಸಿಬಿಗಳು ಮತ್ತು ಅತ್ಯಾಧುನಿಕ ಯಂತ್ರಗಳ ನೆರವಿನಿಂದ ಕತ್ತಲೆಯಲ್ಲಿಯೂ ರಕ್ಷಣಾ ಕಾರ್ಯ ಮುಂದುವರಿದಿದೆ. "ಇದು ಒಂದು ಹಾರರ್ ಸಿನಿಮಾದಂತಿದೆ" ಎಂದು ನಿವಾಸಿಗಳು ಕಣ್ಣೀರಿಡುತ್ತಿದ್ದಾರೆ. ಅವಶೇಷಗಳ ಅಡಿಯಲ್ಲಿ ಸಿಲುಕಿರುವವರ ರಕ್ಷಣೆಗೆ ಜನರು ಬರಿಗೈಯಲ್ಲೇ ಮಣ್ಣು ಸರಿಸುತ್ತಿರುವುದು ಮನಕಲಕುವ ದೃಶ್ಯವಾಗಿದೆ. ಆಂತರಿಕ ಸಚಿವ ಡಿಯೋಸ್ಡಾಡೋ ಕ್ಯಾಬೆಲ್ಲೊ ಅವರು ಸಾರ್ವಜನಿಕರಲ್ಲಿ ಶಾಂತಿ ಮತ್ತು ಒಗ್ಗಟ್ಟು ಕಾಪಾಡಿಕೊಳ್ಳುವಂತೆ ಮನವಿ ಮಾಡಿದ್ದಾರೆ.

ಅಂತಾರಾಷ್ಟ್ರೀಯ ಸಮುದಾಯದ ನೆರವು ಅಗತ್ಯ

ವೆನೆಜುವೆಲಾದ ಈ ದುರಂತವು ಇಡೀ ಪ್ರಪಂಚವನ್ನೇ ಬೆಚ್ಚಿಬೀಳಿಸಿದೆ. ವಿಮಾನ ನಿಲ್ದಾಣ ಮತ್ತು ಸಂಪರ್ಕ ವ್ಯವಸ್ಥೆ ಹಾನಿಯಾಗಿರುವುದರಿಂದ ಹೊರದೇಶದ ಸಹಾಯ ಪಡೆಯುವುದು ಕಷ್ಟಸಾಧ್ಯವಾಗಿದೆ. ಆದರೂ, ವಿಶ್ವಸಂಸ್ಥೆ ಮತ್ತು ನೆರೆಯ ದೇಶಗಳು ತಕ್ಷಣವೇ ನೆರವಿಗೆ ಧಾವಿಸುವ ಅಗತ್ಯವಿದೆ. ಮುಂದಿನ ಗಂಟೆಗಳಲ್ಲಿ ರಕ್ಷಣಾ ಕಾರ್ಯಾಚರಣೆ ಮತ್ತಷ್ಟು ವೇಗ ಪಡೆದರೆ ಮಾತ್ರ ಬದುಕುಳಿದವರನ್ನು ಉಳಿಸಿಕೊಳ್ಳಲು ಸಾಧ್ಯ. ವೆನೆಜುವೆಲಾದ ಇತಿಹಾಸದಲ್ಲಿ ಇದೊಂದು ಕರಾಳ ದಿನ. ಪ್ರಕೃತಿಯ ಕ್ರೂರ ಆಟಕ್ಕೆ ಸಾವಿರಾರು ಕುಟುಂಬಗಳು ವಿನಾಶಗೊಂಡಿವೆ ಎಂದು ಹೇಳಲಾಗಿವೆ.