ಲಾರೆನ್ಸ್ ಬಿಷ್ಣೋಯ್ ಮತ್ತು ಭಾರತ ಮೂಲದ ಗ್ಯಾಂಗ್‌ ಗಳ ವಿರುದ್ಧ ಅಮೆರಿಕದ 'ಆಪರೇಷನ್ ಹಾರ್ಡ್ ಬಾಲ್', ಏನಿದು ಕಾರ್ಯಾಚರಣೆ ?

 ಭಾರತ ಮೂಲದ ಅಂತರರಾಷ್ಟ್ರೀಯ ಸಂಘಟಿತ ಅಪರಾಧ ಜಾಲಗಳ ವಿರುದ್ಧ ಇತಿಹಾಸದಲ್ಲೇ ಅತಿ ದೊಡ್ಡ ಕ್ರಮ ಕೈಗೊಂಡಿರುವುದಾಗಿ ಅಮೆರಿಕದ ಅಧಿಕಾರಿಗಳು ಘೋಷಿಸಿದ್ದಾರೆ. 'ಆಪರೇಷನ್ ಹಾರ್ಡ್ ಬಾಲ್' ಹೆಸರಿನ ಈ ಜಂಟಿ ಅಂತರರಾಷ್ಟ್ರೀಯ ಕಾರ್ಯಾಚರಣೆಯಡಿಯಲ್ಲಿ ಅಮೆರಿಕ, ಕೆನಡಾ ಮತ್ತು ಯುರೋಪ್‌ ನ ಕೆಲವು ಭಾಗಗಳ ಕಾನೂನು ಜಾರಿ ಸಂಸ್ಥೆಗಳು 24 ಶಂಕಿತರನ್ನು ಬಂಧಿಸಿವೆ.

ಅಮೆರಿಕದ ನ್ಯಾಯಾಲಯಗಳಲ್ಲಿ ದಾಖಲಾಗಿರುವ ಮೂರು ಪ್ರತ್ಯೇಕ ಫೆಡರಲ್ ದೋಷಾರೋಪಣೆ ಪಟ್ಟಿಗಳಲ್ಲಿ, ಪ್ರಸ್ತುತ ಜೈಲಿನಲ್ಲಿರುವ ಗ್ಯಾಂಗ್‌ಸ್ಟರ್ ಲಾರೆನ್ಸ್ ಬಿಷ್ಣೋಯ್ ಮತ್ತು ಆತನ ಆಪ್ತ ಸತಿಂದರ್ ಜೀತ್ ಸಿಂಗ್ ಅಲಿಯಾಸ್ ಗೋಲ್ಡಿ ಬ್ರಾರ್ ಸೇರಿದಂತೆ ಒಟ್ಟು 37 ಜನರ ವಿರುದ್ಧ ಆರೋಪ ಹೊರಿಸಲಾಗಿದೆ. ರೋಹಿತ್ ಗೋಡಾರಾ, ಜಗ್ಗು ಭಗವಾನ್‌ಪುರಿಯಾ, ರವೀಂದರ್ ಸಿಂಗ್ ಧಾಂಡಾ ಮತ್ತು ಸಂಘಟಿತ ಅಪರಾಧ ಸಿಂಡಿಕೇಟ್‌ ಗಳ ಇತರ ಹಲವು ಶಂಕಿತ ಸದಸ್ಯರನ್ನು ಈ ದೋಷಾರೋಪಣೆ ಪಟ್ಟಿಯಲ್ಲಿ ಹೆಸರಿಸಲಾಗಿದೆ.

ಅಮೆರಿಕದ ತನಿಖಾಧಿಕಾರಿಗಳ ಪ್ರಕಾರ, ಈ ಕ್ರಿಮಿನಲ್ ಸಂಸ್ಥೆಗಳು ಕೇವಲ ಭಾರತಕ್ಕೆ ಮಾತ್ರ ಸೀಮಿತವಾಗಿರದೆ ಅಮೆರಿಕ, ಕೆನಡಾ, ಯುಕೆ, ಯುರೋಪ್, ಆಸ್ಟ್ರೇಲಿಯಾ ಮತ್ತು ನ್ಯೂಜಿಲೆಂಡ್‌ನಾದ್ಯಂತ ಸಕ್ರಿಯವಾಗಿದ್ದವು. ಈ ದೇಶಗಳಲ್ಲಿರುವ ಭಾರತೀಯ ಸಮುದಾಯವನ್ನು ಗುರಿಯಾಗಿಸಿಕೊಂಡು ಕೊಲೆ, ಸುಪಾರಿ ಕೊಲೆ, ಸುಲಿಗೆ, ಮಾದಕ ವಸ್ತು ಸಾಗಣೆ, ಶಸ್ತ್ರಾಸ್ತ್ರ ಸಾಗಣೆ, ಅಪಹರಣ, ಮಾನವ ಸಾಗಣೆ ಮತ್ತು ಮನಿ ಲಾಂಡರಿಂಗ್ ಕೃತ್ಯಗಳಲ್ಲಿ ಈ ಜಾಲಗಳು ತೊಡಗಿದ್ದವು ಎಂದು ಆರೋಪಿಸಲಾಗಿದೆ.

ಏನಿದು 'ಆಪರೇಷನ್ ಹಾರ್ಡ್ ಬಾಲ್'?

ಅಮೆರಿಕದ ನ್ಯಾಯಾಂಗ ಇಲಾಖೆಯ (ಆoಎ) ಪ್ರಕಾರ, "ಆಪರೇಷನ್ ಹಾರ್ಡ್ ಬಾಲ್" ಎಂಬುದು ಭಾರತೀಯ ಅಪರಾಧ ಸಿಂಡಿಕೇಟ್‌ಗಳ ವಿರುದ್ಧ ವರ್ಷಗಳಿಂದ ನಡೆಸಲಾದ ಫೆಡರಲ್ ತನಿಖೆಯ ಫಲಿತಾಂಶವಾಗಿದೆ. ಈ ಗ್ಯಾಂಗ್‌ಗಳು ಜಾಗತಿಕವಾಗಿ ಬ್ಲ್ಯಾಕ್‌ಮೇಲ್, ಸುಲಿಗೆ, ಸುಪಾರಿ ಕೊಲೆಗಳು, ಗುಂಡಿನ ದಾಳಿ ಮತ್ತು ಅಂತರರಾಷ್ಟ್ರೀಯ ಗಡಿಗಳಲ್ಲಿ ಭಾರೀ ಪ್ರಮಾಣದ ಮಾದಕ ವಸ್ತುಗಳ ಸಾಗಣೆಯಂತಹ ಅಪರಾಧಗಳಲ್ಲಿ ತೊಡಗಿದ್ದವು. ಇವುಗಳ ಪ್ರಭಾವವು ವಿಶೇಷವಾಗಿ ವಿದೇಶಗಳಲ್ಲಿರುವ ಭಾರತೀಯ ಸಮುದಾಯದ ಮೇಲೆ ಹೆಚ್ಚಾಗಿ ಕಂಡುಬಂದಿತ್ತು.

ಮೂರು ಪ್ರತ್ಯೇಕ ಸಂಘಟಿತ ಅಪರಾಧ ಗುಂಪುಗಳಿಗೆ ಸೇರಿದ ಒಟ್ಟು 37 ಆರೋಪಿಗಳ ವಿರುದ್ಧ ಫೆಡರಲ್ ದೋಷಾರೋಪಣೆ ಪಟ್ಟಿಯನ್ನು ಸಿದ್ಧಪಡಿಸಲಾಗಿದೆ. ಇವರಲ್ಲಿ ಇಬ್ಬರು ಭಾರತದ ಜೈಲುಗಳಲ್ಲೇ ಇದ್ದುಕೊಂಡು ತಮ್ಮ ಜಾಗತಿಕ ಅಪರಾಧ ಜಾಲವನ್ನು ಮುನ್ನಡೆಸುತ್ತಿದ್ದರು. ಈ 37 ಜನರ ಪೈಕಿ 24 ಆರೋಪಿಗಳನ್ನು ಬಂಧಿಸಲಾಗಿದೆ (ಅಮೆರಿಕದಲ್ಲಿ 13, ಕೆನಡಾದಲ್ಲಿ ಮೂರು, ಸ್ಪೇನ್‌ನಲ್ಲಿ ಒಬ್ಬರು ಮತ್ತು ಈ ಕಾರ್ಯಾಚರಣೆಗೂ ಮುನ್ನವೇ ಏಳು ಜನರನ್ನು ಈಗಾಗಲೇ ಪೊಲೀಸ್ ಕಸ್ಟಡಿಗೆ ತೆಗೆದುಕೊಳ್ಳಲಾಗಿತ್ತು). ಇನ್ನುಳಿದ 10 ಆರೋಪಿಗಳು ತಲೆಮರೆಸಿಕೊಂಡಿದ್ದಾರೆ (ಅಮೆರಿಕದಲ್ಲಿ ಏಳು, ಭಾರತದಲ್ಲಿ ಇಬ್ಬರು ಮತ್ತು ಯುರೋಪ್‌ನಲ್ಲಿ ಒಬ್ಬರು).

ಭಾರೀ ಪ್ರಮಾಣದ ಮಾದಕ ವಸ್ತು ಮತ್ತು ಶಸ್ತ್ರಾಸ್ತ್ರ ವಶ

ತನಿಖೆಯ ಸಂದರ್ಭದಲ್ಲಿ ಅಧಿಕಾರಿಗಳು ಸುಮಾರು 1,000 ಕಿಲೋಗ್ರಾಂ ಕೊಕೇನ್, 1 ಕಿಲೋಗ್ರಾಂ ಹೆರಾಯಿನ್, 40,000 ಡಾಲರ್ ನಗದು ಮತ್ತು 12 ಬಂದೂಕುಗಳನ್ನು ವಶಪಡಿಸಿಕೊಂಡಿದ್ದಾರೆ. ಇದರೊಂದಿಗೆ ಕ್ಯಾಲಿಫೋರ್ನಿಯಾದ ಸ್ಯಾಕ್ರಮೆಂಟೊ ಪ್ರದೇಶದ 23 ಸ್ಥಳಗಳಲ್ಲಿ ಮತ್ತು ಲಾಸ್ ಏಂಜಲೀಸ್ ಪ್ರದೇಶದ 11 ಸ್ಥಳಗಳಲ್ಲಿ ಏಕಕಾಲದಲ್ಲಿ ಶೋಧ ಕಾರ್ಯಾಚರಣೆ ನಡೆಸಲಾಗಿದೆ.

"ಭಯ, ಡ್ರಗ್ಸ್ ಮತ್ತು ಹಿಂಸಾಚಾರವನ್ನು ಹರಡುವ ಅಂತರರಾಷ್ಟ್ರೀಯ ಕ್ರಿಮಿನಲ್ ಗ್ಯಾಂಗ್‌ಗಳು ಕಾನೂನಿನ ಸಂಪೂರ್ಣ ಬಲವನ್ನು ಎದುರಿಸಬೇಕಾಗುತ್ತದೆ" ಎಂದು ಅಮೆರಿಕದ ಸಹಾಯಕ ಅಟಾರ್ನಿ ಬಿಲ್ ಎಸ್ಸೈಲಿ ತಿಳಿಸಿದ್ದಾರೆ.

"ಅಮೆರಿಕ, ಕೆನಡಾ, ಯುರೋಪ್ ಮತ್ತು ಏಷ್ಯಾದ ಕಾನೂನು ಜಾರಿ ಸಂಸ್ಥೆಗಳು ಒಟ್ಟಾಗಿ ಕೆಲಸ ಮಾಡುತ್ತಿದ್ದು, ಈ ಕ್ರಿಮಿನಲ್ ಸಂಸ್ಥೆಗಳು ಎಲ್ಲಿಯೇ ಸಕ್ರಿಯವಾಗಿದ್ದರೂ ಅವುಗಳನ್ನು ಪತ್ತೆಹಚ್ಚಿ ಧ್ವಂಸಗೊಳಿಸಲು ದೃಢನಿಶ್ಚಯ ಮಾಡಿವೆ. ಈ ರೌಡಿಗಳಿಗೆ ಎಲ್ಲೂ ಸುರಕ್ಷಿತ ಆಶ್ರಯ ಸಿಗುವುದಿಲ್ಲ" ಎಂದು ಅವರು ಎಚ್ಚರಿಸಿದ್ದಾರೆ.

ಲಾರೆನ್ಸ್ ಬಿಷ್ಣೋಯ್ ಮೇಲಿರುವ ಆರೋಪಗಳು

ಮೆರಿಕ ದೋಷಾರೋಪಣೆ ಪಟ್ಟಿಯ ಪ್ರಕಾರ, 33 ವರ್ಷದ ಲಾರೆನ್ಸ್ ಬಿಷ್ಣೋಯ್ ಕಳೆದ ಹಲವು ವರ್ಷಗಳಿಂದ ಭಾರತದಲ್ಲಿ ಜೈಲಿನಲ್ಲಿದ್ದರೂ, ಅಲ್ಲಿಂದಲೇ ತನ್ನ ಕ್ರಿಮಿನಲ್ ಸಂಸ್ಥೆಯನ್ನು ಮುನ್ನಡೆಸುತ್ತಿದ್ದನು.

ಕೊಲೆ, ರಾಜಕೀಯ ಹತ್ಯೆಗಳು, ಸುಲಿಗೆ, ಅಪಹರಣಗಳು, ಮಾದಕ ವಸ್ತು ಸಾಗಣೆ, ಮಾನವ ಸಾಗಣೆ ಮತ್ತು ಗುಂಡಿನ ದಾಳಿಗಳನ್ನು ಯೋಜಿಸಿದ ಮತ್ತು ನಿರ್ದೇಶಿಸಿದ ಆರೋಪ ಆತನ ಮೇಲಿದೆ.

ಸಾಮಾಜಿಕ ಮಾಧ್ಯಮಗಳಲ್ಲಿ 'ದೇಶಭಕ್ತ'

ಸಾಮಾಜಿಕ ಮಾಧ್ಯಮಗಳು ಮತ್ತು ಮಾಧ್ಯಮ ಸಂದರ್ಶನಗಳ ಮೂಲಕ ಬಿಷ್ಣೋಯ್ ತನ್ನನ್ನು ತಾನು "ದೇಶಭಕ್ತ", "ರಾಷ್ಟ್ರವಾದಿ" ಮತ್ತು "ತೀವ್ರ ಧಾರ್ಮಿಕ ನಂಬಿಕೆಯುಳ್ಳವನು" ಎಂದು ಬಿಂಬಿಸಿಕೊಳ್ಳುತ್ತಿದ್ದನು ಎಂದು ಅಮೆರಿಕದ ತನಿಖಾಧಿಕಾರಿಗಳು ಹೇಳಿದ್ದಾರೆ. ಭಾರತ, ಅಮೆರಿಕ ಮತ್ತು ಇತರ ದೇಶಗಳಲ್ಲಿನ ಯುವಕರನ್ನು ತನ್ನ ಕ್ರಿಮಿನಲ್ ಜಾಲಕ್ಕೆ ಸೇರಿಸಿಕೊಳ್ಳಲು ಆತ ಈ ಸಾರ್ವಜನಿಕ ಚಿತ್ರಣವನ್ನು ಬಳಸಿಕೊಂಡಿದ್ದಾನೆ ಎಂದು ಅಧಿಕಾರಿಗಳು ಆರೋಪಿಸಿದ್ದಾರೆ.

ಆದರೆ ಬಿಷ್ಣೋಯ್ ರಹಸ್ಯವಾಗಿ ಹಲವು ಖಂಡಗಳಲ್ಲಿ ಹರಡಿರುವ ದೊಡ್ಡ ಕ್ರಿಮಿನಲ್ ಸಾಮ್ರಾಜ್ಯವನ್ನು ನಡೆಸುತ್ತಿದ್ದನು. ತನ್ನ ಜೈಲಿನ ಕೋಣೆಗೆ ಕಳ್ಳಸಾಗಣೆ ಮಾಡಲಾದ ಮೊಬೈಲ್ ಫೋನ್‌ಗಳು ಮತ್ತು ಇಂಟರ್ನೆಟ್ ಕರೆ (ಗಿoIP) ಸಾಧನಗಳ ಮೂಲಕ, ಜಗತ್ತಿನಾದ್ಯಂತ ತನ್ನ ಗ್ಯಾಂಗ್ ಸದಸ್ಯರು ಮಾಡುವ ರಾಜಕೀಯ ಹತ್ಯೆಗಳು, ಕೊಲೆಗಳು, ಗುಂಡಿನ ದಾಳಿ, ಸುಲಿಗೆ, ಅಪಹರಣ, ಮಾದಕ ವಸ್ತು ಸಾಗಣೆ ಮತ್ತು ಮಾನವ ಸಾಗಣೆಯಂತಹ ಅಪರಾಧಗಳನ್ನು ಆತ ವೈಯಕ್ತಿಕವಾಗಿ ನಿರ್ದೇಶಿಸುತ್ತಿದ್ದನು ಎಂದು ನ್ಯಾಯಾಂಗ ಇಲಾಖೆ ತಿಳಿಸಿದೆ.

ಗೋಲ್ಡಿ ಬ್ರಾರ್ ಮತ್ತು ರೋಹಿತ್ ಗೋಡಾರಾ ಪಾತ್ರ

ಪಂಜಾಬ್ ಮೂಲದ 32 ವರ್ಷದ ಸತಿಂದರ್ ಜೀತ್ ಸಿಂಗ್ ಅಲಿಯಾಸ್ "ಗೋಲ್ಡಿ ಬ್ರಾರ್", ಉತ್ತರ ಅಮೆರಿಕದಲ್ಲಿ ಬಿಷ್ಣೋಯ್‌ ನ ಪ್ರಮುಖ ಕಾರ್ಯಾಚರಣಾ ಕಮಾಂಡರ್ ಆಗಿ ಕಾರ್ಯನಿರ್ವಹಿಸುತ್ತಿದ್ದನು ಎಂದು ದೋಷಾರೋಪಣೆ ಪಟ್ಟಿಯಲ್ಲಿದೆ. ಅದೇ ರೀತಿ ರಾಜಸ್ಥಾನದ 37 ವರ್ಷದ ರೋಹಿತ್ ಗೋಡಾರಾ ಯುರೋಪ್‌ ನಲ್ಲಿನ ಕಾರ್ಯಾಚರಣೆಗಳನ್ನು ನಿರ್ವಹಿಸುತ್ತಿದ್ದರೆ, ಪಂಜಾಬ್‌ ನ 58 ವರ್ಷದ ಸುಖ್‌ರಾಜ್ ಸಿಂಗ್ ಕಾಂಗ್ ಈ ಗ್ಯಾಂಗ್‌ನ ಭಾರತದ ಕಾರ್ಯಾಚರಣೆಗಳನ್ನು ನೋಡಿಕೊಳ್ಳುತ್ತಿದ್ದನು.

ಈ ಮೂವರೂ ಬಿಷ್ಣೋಯ್‌ನ ಅತ್ಯಂತ ನಂಬಿಕಸ್ಥ ಸಹಚರರಾಗಿದ್ದು, ಆತನ ಆದೇಶಗಳನ್ನು ಕಾರ್ಯಗತಗೊಳಿಸುವ ಮತ್ತು ವಿವಿಧ ದೇಶಗಳಲ್ಲಿ ನಡೆಯುವ ಹಿಂಸಾತ್ಮಕ ಕ್ರಿಮಿನಲ್ ಚಟುವಟಿಕೆಗಳ ಉಸ್ತುವಾರಿ ವಹಿಸುವ ಜವಾಬ್ದಾರಿಯನ್ನು ಹೊಂದಿದ್ದರು ಎಂದು ಹೇಳಲಾಗಿದೆ.

ನಿಜ್ಜಾರ್ ಹತ್ಯೆಯ ಉಲ್ಲೇಖ

ಈ ದೋಷಾರೋಪಣೆ ಪಟ್ಟಿಯಲ್ಲಿ ಜೂನ್ 2023 ರಲ್ಲಿ ಕೆನಡಾದ ಸರ್ರೆಯಲ್ಲಿ ನಡೆದ ಹರ್ದೀಪ್ ಸಿಂಗ್ ನಿಜ್ಜಾರ್ ಹತ್ಯೆಯ ಬಗ್ಗೆಯೂ ಉಲ್ಲೇಖಿಸಲಾಗಿದೆ. ಈ ಕೊಲೆಯನ್ನು ಲಾರೆನ್ಸ್ ಬಿಷ್ಣೋಯ್ ಮತ್ತು ಗೋಲ್ಡಿ ಬ್ರಾರ್ ಆದೇಶದ ಮೇರೆಗೆ ಮಾಡಲಾಗಿದೆ ಎಂದು ಅಮೆರಿಕದ ಪ್ರಾಸಿಕ್ಯೂಟರ್ಸ್ ಆರೋಪಿಸಿದ್ದಾರೆ. ಆದರೆ, ಇವೆಲ್ಲವೂ ದೋಷಾರೋಪಣೆ ಪಟ್ಟಿಯಲ್ಲಿರುವ ಆರೋಪಗಳಾಗಿದ್ದು, ಅಂತಿಮವಾಗಿ ನ್ಯಾಯಾಲಯದಲ್ಲಿ ಈ ಬಗ್ಗೆ ತೀರ್ಮಾನವಾಗಲಿದೆ.

ಭಾರತೀಯ ನಟನ ನಿವಾಸದ ಬಳಿ ಗುಂಡಿನ ದಾಳಿ

ದೋಷಾರೋಪಣೆ ಪಟ್ಟಿಯ ಪ್ರಕಾರ, ನವೆಂಬರ್ 2023 ರಲ್ಲಿ ಕೆನಡಾದಲ್ಲಿ ವಾಸಿಸುತ್ತಿರುವ ಪ್ರಮುಖ ಭಾರತೀಯ ನಟ ಮತ್ತು ಗಾಯಕರೊಬ್ಬರ ನಿವಾಸದ ಬಳಿ ನಡೆದ ಗುಂಡಿನ ದಾಳಿಯ ಹೊಣೆಯನ್ನು ಬಿಷ್ಣೋಯ್ ಗ್ಯಾಂಗ್ ಹೊತ್ತುಕೊಂಡಿತ್ತು. ಈ ಘಟನೆಯ ನಂತರ, ನಮ್ಮಿಂದ ನಿನ್ನನ್ನು ಯಾರೂ ಉಳಿಸಲು ಸಾಧ್ಯವಿಲ್ಲ ಎಂದು ಪಂಜಾಬಿ ಭಾಷೆಯಲ್ಲಿ ಬೆದರಿಕೆ ಸಂದೇಶವನ್ನು ಸಾಮಾಜಿಕ ಮಾಧ್ಯಮದಲ್ಲಿ ಪೋಸ್ಟ್ ಮಾಡಲಾಗಿತ್ತು.

ವಾಟ್ಸಾಪ್ ಮೂಲಕ ಕೋಟ್ಯಂತರ ರೂಪಾಯಿ ಸುಲಿಗೆ

ಉದ್ಯಮಿಗಳು ಮತ್ತು ಪ್ರಭಾವಿ ವ್ಯಕ್ತಿಗಳಿಗೆ ಬೆದರಿಕೆ ಹಾಕಲು ಈ ಗ್ಯಾಂಗ್ ವಾಟ್ಸಾಪ್ ಮತ್ತು ಇತರ ಎನ್‌ಕ್ರಿಪ್ಟ್ ಮಾಡಲಾದ ಸಂದೇಶ ರವಾನೆ ಆಯಪ್‌ಗಳನ್ನು ಬಳಸುತ್ತಿತ್ತು ಎಂದು ತನಿಖಾಧಿಕಾರಿಗಳು ಆರೋಪಿಸಿದ್ದಾರೆ. ಲಾಸ್ ಏಂಜಲೀಸ್ ಮತ್ತು ಥೌಸಂಡ್ ಓಕ್ಸ್‌ ನಲ್ಲಿರುವ ಸಂತ್ರಸ್ತರನ್ನು ಗುರಿಯಾಗಿಸಿಕೊಂಡು ಕೋಟ್ಯಂತರ ರೂಪಾಯಿ ಸುಲಿಗೆ ಮಾಡಲು ಯತ್ನಿಸಲಾಗಿತ್ತು. ಒಂದು ಪ್ರಕರಣದಲ್ಲಿ ಈ ಗ್ಯಾಂಗ್ ಸುಮಾರು 5 ಮಿಲಿಯನ್ ಅಮೆರಿಕನ್ ಡಾಲರ್ (ಸುಮಾರು 50 ಲಕ್ಷ ಅಮೆರಿಕನ್ ಡಾಲರ್) ಹಣಕ್ಕೆ ಬೇಡಿಕೆ ಇಟ್ಟಿತ್ತು.

ಆದಾಯದ ಮೂಲ

ದೋಷಾರೋಪಣೆ ಪಟ್ಟಿಯ ಪ್ರಕಾರ, ಅಂತರರಾಷ್ಟ್ರೀಯ ಮಾದಕ ವಸ್ತು ಸಾಗಣೆಯು ಈ ಗ್ಯಾಂಗ್‌ನ ಪ್ರಮುಖ ಆದಾಯದ ಮೂಲವಾಗಿತ್ತು. ನವೆಂಬರ್ 2024 ರಲ್ಲಿ ಅಮೆರಿಕದಿಂದ ಕೆನಡಾಕ್ಕೆ ಸಾಗಿಸಲಾಗುತ್ತಿದ್ದ 49 ಕಿಲೋಗ್ರಾಂ ಕೊಕೇನ್ ಅನ್ನು ಅಧಿಕಾರಿಗಳು ವಶಪಡಿಸಿಕೊಂಡಿದ್ದರು.

ಮಾರ್ಚ್ 2024 ಮತ್ತು ಜುಲೈ 2025 ರ ನಡುವೆ, ಬಿಷ್ಣೋಯ್ ಜಾಲವು ಪ್ರತಿಸ್ಪರ್ಧಿ ಮಾದಕ ವಸ್ತು ಸಾಗಣೆದಾರರಿಂದ ಸುಮಾರು 520 ಕಿಲೋಗ್ರಾಂ ಕೊಕೇನ್ ಅನ್ನು ಕದ್ದಿತ್ತು ಎಂದು ದೋಷಾರೋಪಣೆಯಲ್ಲಿ ಆರೋಪಿಸಲಾಗಿದೆ.

ಈ ಕಾನೂನುಬಾಹಿರ ಚಟುವಟಿಕೆಗಳಿಂದ ಬಂದ ಹಣವು ಅವರ ಕ್ರಿಮಿನಲ್ ಜಾಲದ ವಿಸ್ತರಣೆಗೆ ನೆರವಾಗಿತ್ತು ಎಂದು ತನಿಖಾಧಿಕಾರಿಗಳು ನಂಬಿದ್ದಾರೆ ಎಂದು ನ್ಯಾಯಾಂಗ ಇಲಾಖೆ ತಿಳಿಸಿದೆ.

ಈ ದೋಷಾರೋಪಣೆಯಲ್ಲಿ ಬಿಷ್ಣೋಯ್, ಬ್ರಾರ್, ಗೋಡಾರಾ ಮತ್ತು ಇತರ ಆರು ಆರೋಪಿಗಳ ವಿರುದ್ಧ ಅಕ್ರಮ ಚಟುವಟಿಕೆಗಳ ಸಂಚು, ಸುಲಿಗೆಯ ಮೂಲಕ ವಾಣಿಜ್ಯಕ್ಕೆ ಅಡ್ಡಿಪಡಿಸುವ ಸಂಚು, ಆರು ಸುಲಿಗೆ ಯತ್ನದ ಪ್ರಕರಣಗಳು ಹಾಗೂ ಕೊಕೇನ್ ಮತ್ತು ಮೆಥಾಂಫೆಟಮೈನ್‌ ನಂತಹ ಮಾದಕ ವಸ್ತುಗಳ ವಿತರಣೆಯ ಸಂಚಿನ ಆರೋಪಗಳನ್ನು ಹೊರಿಸಲಾಗಿದೆ.

ಜಗ್ಗು ಭಗವಾನ್‌ಪುರಿಯಾ ಜಾಗತಿಕ ಜಾಲ

ಎರಡನೇ ದೋಷಾರೋಪಣೆ ಪಟ್ಟಿಯಲ್ಲಿ 38 ವರ್ಷದ ಜಗ್ಗು ಭಗವಾನ್‌ಪುರಿಯಾ ಮತ್ತು ಆತನ 16 ಸಹಚರರ ವಿರುದ್ಧ ಆರೋಪ ಹೊರಿಸಲಾಗಿದೆ. ಅಮೆರಿಕದ ಅಧಿಕಾರಿಗಳ ಪ್ರಕಾರ, ಪಂಜಾಬ್ ನಿವಾಸಿಯಾದ ಭಗವಾನ್‌ಪುರಿಯಾ ಮೊದಲು ಬಿಷ್ಣೋಯ್‌ನ ಸಹಚರನಾಗಿದ್ದು, ನಂತರ ಆತನ ಪ್ರತಿಸ್ಪರ್ಧಿಯಾದನು ಮತ್ತು ತನ್ನದೇ ಆದ ಕ್ರಿಮಿನಲ್ ಸಾಮ್ರಾಜ್ಯವನ್ನು ಸ್ಥಾಪಿಸಿದನು. ಆತನ ಗ್ಯಾಂಗ್ ಜಗತ್ತಿನಾದ್ಯಂತ 1,000 ಕ್ಕೂ ಹೆಚ್ಚು ಸದಸ್ಯರನ್ನು ಹೊಂದಿದ್ದು, ಅಮೆರಿಕವೊಂದರಲ್ಲೇ 100 ಕ್ಕೂ ಹೆಚ್ಚು ಸದಸ್ಯರು ಸಕ್ರಿಯರಾಗಿದ್ದಾರೆ ಎಂದು ಹೇಳಲಾಗಿದೆ.

ಕೆನಡಾ, ಯುಕೆ, ಯುರೋಪ್, ಆಸ್ಟ್ರೇಲಿಯಾ ಮತ್ತು ನ್ಯೂಝಿಲೆಂಡ್‌ ನಲ್ಲೂ ಸಕ್ರಿಯವಾಗಿರುವ ಈ ಗುಂಪಿನ ವಿರುದ್ಧ ಕೊಲೆ, ಸುಪಾರಿ ಕೊಲೆ, ಅಪಹರಣ, ಮಾದಕ ವಸ್ತು ಸಾಗಣೆ, ಶಸ್ತ್ರಾಸ್ತ್ರ ಸಾಗಣೆ ಮತ್ತು ಸುಲಿಗೆಯಂತಹ ಗಂಭೀರ ಆರೋಪಗಳಿವೆ.

ಭಾರತದಲ್ಲಿ ಭ್ರಷ್ಟಾಚಾರದ ಆರೋಪಗಳು

ಭಗವಾನ್‌ಪುರಿಯಾ ಜಾಲವು ತನ್ನ ಅಧಿಕಾರವನ್ನು ವಿಸ್ತರಿಸಲು ಭ್ರಷ್ಟ ಕಾನೂನು ಜಾರಿ ಅಧಿಕಾರಿಗಳನ್ನು ಬಳಸಿಕೊಂಡಿದೆ ಎಂದು ದೋಷಾರೋಪಣೆಯಲ್ಲಿ ಆರೋಪಿಸಲಾಗಿದೆ. ಈ ಗ್ಯಾಂಗ್ ತನ್ನ ಪ್ರತಿಸ್ಪರ್ಧಿಗಳ ವಿರುದ್ಧ ಸುಳ್ಳು ಕ್ರಿಮಿನಲ್ ಪ್ರಕರಣಗಳನ್ನು ದಾಖಲಿಸುವಂತೆ ವ್ಯವಸ್ಥೆ ಮಾಡಿ, ನಂತರ ರಾಜಿ ಮಾಡಿಕೊಳ್ಳುವ ನೆಪದಲ್ಲಿ ಅವರಿಂದ ಹಣ ಸುಲಿಗೆ ಮಾಡುತ್ತಿತ್ತು ಎನ್ನಲಾಗಿದೆ.

"ಭಗವಾನ್‌ಪುರಿಯಾ ಗುಂಪು ತನ್ನ ಪ್ರತಿಸ್ಪರ್ಧಿಗಳನ್ನು ಹಾಗೂ ಪೊಲೀಸರಿಗೆ ಮಾಹಿತಿ ನೀಡುತ್ತಿದ್ದಾರೆ ಎಂದು ಶಂಕಿಸಲಾದ ವ್ಯಕ್ತಿಗಳನ್ನು ಗುರಿಯಾಗಿಸಿಕೊಳ್ಳಲು ಈ ಸುಳ್ಳು ಮಾಹಿತಿಯನ್ನು ಬಳಸುತ್ತಿತ್ತು. ಭ್ರಷ್ಟ ಭಾರತೀಯ ಪೊಲೀಸ್ ಅಧಿಕಾರಿಗಳ ನೆರವಿನೊಂದಿಗೆ ಅವರ ವಿರುದ್ಧ ಆಧಾರರಹಿತ ಕ್ರಿಮಿನಲ್ ಮೊಕದ್ದಮೆಗಳನ್ನು ಹೂಡಿ, ಸುಲಿಗೆ ಮಾಡುತ್ತಿತ್ತು" ಎಂದು ನ್ಯಾಯಾಂಗ ಇಲಾಖೆ ತಿಳಿಸಿದೆ.

ಈ ಗುಂಪು ಲಾಸ್ ಏಂಜಲೀಸ್ ಮತ್ತು ಇನ್‌ಲ್ಯಾಂಡ್ ಎಂಪೈರ್‌ನಲ್ಲಿರುವ ಮಾದಕ ವಸ್ತು ಸಾಗಣೆಯ ಸಬ್-ನೆಟ್‌ವರ್ಕ್ಸ್ ಮೂಲಕ ಹಾಗೂ ಕಾನೂನುಬಾಹಿರ ಶಸ್ತ್ರಾಸ್ತ್ರ ವ್ಯಾಪಾರದ ಮೂಲಕ ತನ್ನ ಚಟುವಟಿಕೆಗಳಿಗೆ ಹಣಕಾಸು ಕ್ರೋಢೀಕರಿಸುತ್ತಿತ್ತು ಎಂದು ಆರೋಪಿಸಲಾಗಿದೆ.

ಈ ಜಾಲದ ಒಬ್ಬ ಆರೋಪಿ ಅಮೆರಿಕದಲ್ಲೇ ಇದ್ದುಕೊಂಡು, ಭಾರತದಲ್ಲಿದ್ದ ಒಂದು ಕುಟುಂಬದ ವಿರುದ್ಧ ಸುಳ್ಳು ಕೊಲೆ ಪ್ರಕರಣ ದಾಖಲಾಗುವಂತೆ ನಿರ್ದೇಶಿಸಿದ್ದನು ಎನ್ನಲಾಗಿದೆ.

ಕೆನಡಾ-ಅಮೆರಿಕ ಮಾದಕ ವಸ್ತು ಜಾಲದ ಹಿಂದಿದ್ದ 'ರೋಲೆಕ್ಸ್' ಪತ್ತೆ ಮೂರನೇ ದೋಷಾರೋಪಣೆ ಪಟ್ಟಿಯನ್ನು ಕೆನಡಾದ ವ್ಯಾಂಕೋವರ್‌ನ 57 ವರ್ಷದ ರವೀಂದರ್ ಸಿಂಗ್ ಧಾಂಡಾ ಅಲಿಯಾಸ್ "ರಾಂಡಿ", "ರೋಲೆಕ್ಸ್" ಮತ್ತು "ಜಾನ್ ವಿಕ್", ಬ್ರಿಟಿಷ್ ಕೊಲಂಬಿಯಾದ ಸರ್ರೆಯ 50 ವರ್ಷದ ಜಸ್ ಕರ್ನ್ ಬಘ್ರಿ ಅಲಿಯಾಸ್ "ಬಾಬಾ", ಬ್ರಿಟಿಷ್ ಕೊಲಂಬಿಯಾದ ಕ್ರೆಸ್ಟನ್‌ನ 43 ವರ್ಷದ ಗುರ್ತೇಜ್ ಸಿಂಗ್ ಸ್ಮಾಗ್ ಅಲಿಯಾಸ್ "ಸಿಂಬಾ" ಮತ್ತು ಇತರ ಎಂಟು ಜನರ ವಿರುದ್ಧ ದಾಖಲಿಸಲಾಗಿದೆ.

ಈ ಜಾಲವು ಪ್ರತಿ ವಾರ ಅಮೆರಿಕದಿಂದ ಕೆನಡಾಕ್ಕೆ ನೂರಾರು ಕಿಲೋಗ್ರಾಂ ಕೊಕೇನ್ ಮತ್ತು ಮೆಥಾಂಫೆಟಮೈನ್ ಅನ್ನು ಸಾಗಿಸುತ್ತಿತ್ತು ಎಂದು ತನಿಖಾಧಿಕಾರಿಗಳು ಆರೋಪಿಸಿದ್ದಾರೆ. ಗಡಿ ದಾಟಿಸಲು ಕೃಷಿ ಸಾಗಣೆ ವಾಹನಗಳು ಸೇರಿದಂತೆ ದೀರ್ಘಾವಧಿಯ ವಾಣಿಜ್ಯ ಟ್ರಕ್‌ ಗಳಲ್ಲಿ ಈ ಮಾದಕ ವಸ್ತುಗಳನ್ನು ಬಚ್ಚಿಡಲಾಗುತ್ತಿತ್ತು ಎನ್ನಲಾಗಿದೆ.

ಜುಲೈ 2023 ಮತ್ತು ನವೆಂಬರ್ 2024 ರ ನಡುವೆ 430.1 ಕಿಲೋಗ್ರಾಂಗಳಿಗಿಂತ ಹೆಚ್ಚು ಕೊಕೇನ್ ಸಾಗಾಟ ಮಾಡಿರುವುದಾಗಿ ದೋಷಾರೋಪಣೆಯಲ್ಲಿ ತಿಳಿಸಲಾಗಿದೆ.

ಜೀವಾವಧಿ ಶಿಕ್ಷೆಯಾಗುವ ಸಾಧ್ಯತೆ

ಇವೆಲ್ಲವೂ ಕೇವಲ ಕ್ರಿಮಿನಲ್ ಆರೋಪಗಳಾಗಿದ್ದು, ನ್ಯಾಯಾಲಯದಲ್ಲಿ ಅಪರಾಧ ಸಾಬೀತಾಗುವವರೆಗೆ ಎಲ್ಲಾ ಆರೋಪಿಗಳನ್ನು ನಿರ್ದೋಷಿಗಳು ಎಂದೇ ಪರಿಗಣಿಸಲಾಗುತ್ತದೆ ಎಂದು ನ್ಯಾಯಾಂಗ ಇಲಾಖೆ ಸ್ಪಷ್ಟಪಡಿಸಿದೆ.

ಒಂದು ವೇಳೆ ಅಪರಾಧ ಸಾಬೀತಾದರೆ, ಹಲವು ಆರೋಪಿಗಳಿಗೆ ಕನಿಷ್ಠ 10 ವರ್ಷಗಳಿಂದ ಹಿಡಿದು ಜೀವಾವಧಿ ಜೈಲು ಶಿಕ್ಷೆಯಾಗುವ ಸಾಧ್ಯತೆಯಿದೆ.

ಅಂತರರಾಷ್ಟ್ರೀಯ ಸಹಕಾರ ಈ ತನಿಖೆಯಲ್ಲಿ ಫೆಡರಲ್ ಬ್ಯೂರೋ ಆಫ್ ಇನ್ವೆಸ್ಟಿಗೇಷನ್, ರಾಯಲ್ ಕೆನಡಿಯನ್ ಮೌಂಟೆಡ್ ಪೊಲೀಸ್ , ಲಾಸ್ ಏಂಜಲೀಸ್ ಪೊಲೀಸ್ ಇಲಾಖೆ , ಯುಎಸ್ ಕಸ್ಟಮ್ಸ್ ಮತ್ತು ಬಾರ್ಡರ್ ಪ್ರೊಟೆಕ್ಷನ್, ಡ್ರಗ್ ಎನ್‌ಫೋರ್ಸ್‌ಮೆಂಟ್ ಅಡ್ಮಿನಿಸ್ಟ್ರೇಷನ್ , ಸ್ಪೇನ್‌ನ ಅಧಿಕಾರಿಗಳು ಸೇರಿದಂತೆ ಹಲವು ಅಂತರರಾಷ್ಟ್ರೀಯ ಕಾನೂನು ಜಾರಿ ಸಂಸ್ಥೆಗಳು ಒಟ್ಟಾಗಿ ಕಾರ್ಯನಿರ್ವಹಿಸಿವೆ.

ಈ ಕಾರ್ಯಾಚರಣೆಯು ಕೇವಲ ಆರಂಭವಷ್ಟೇ ಎಂದು ಅಮೆರಿಕದ ನ್ಯಾಯಾಂಗ ಇಲಾಖೆ ತಿಳಿಸಿದ್ದು, ಅಂತರರಾಷ್ಟ್ರೀಯ ಸಂಘಟಿತ ಅಪರಾಧ ಜಾಲಗಳ ವಿರುದ್ಧದ ಜಂಟಿ ಕಾರ್ಯಾಚರಣೆ ಮುಂದುವರಿಯಲಿದೆ ಎಂದು ಹೇಳಿದೆ.