ಆಗಸ್ಟ್ 27ಕ್ಕೆ ಶಾಲಾ-ಕಾಲೇಜು, ಬ್ಯಾಂಕ್ ತೆರೆದಿರುತ್ತವೆಯೇ?: ಇಲ್ಲಿದೆ ಮಾಹಿತಿ

ನವದೆಹಲಿ: ಸುಪ್ರೀಂ ಕೋರ್ಟ್ ಮತ್ತು ಅದರ ರಿಜಿಸ್ಟ್ರಿಗೆ ಆಗಸ್ಟ್ 27 (ಗುರುವಾರ) ರಜೆ ಘೋಷಿಸಲಾಗಿದೆ. ಈ ರಜೆಗೆ ಬದಲಾಗಿ ಆಗಸ್ಟ್ 22ರಂದು ಶನಿವಾರ ಪೂರ್ಣ ಪ್ರಮಾಣದ ಕೆಲಸದ ದಿನವಾಗಿರಲಿದೆ ಎಂದು ಸುಪ್ರೀಂ ಕೋರ್ಟ್‌ನ ಆಡಳಿತ ಶಾಖೆ ತಿಳಿಸಿದೆ. 

ಸುಪ್ರೀಂ ಕೋರ್ಟ್ ಅಡ್ವೊಕೇಟ್ಸ್-ಆನ್-ರೆಕಾರ್ಡ್ ಅಸೋಸಿಯೇಷನ್ (SCAORA) ಮನವಿಯನ್ನು ಕೋರ್ಟ್‌ನ ಪೂರ್ಣ ಪೀಠ ಒಪ್ಪಿಕೊಂಡ ಹಿನ್ನೆಲೆಯಲ್ಲಿ ರಜೆಗಳ ಬದಲಾವಣೆ ಮಾಡಲಾಗಿದೆ.

ಕೋರ್ಟ್ ಕ್ಯಾಲೆಂಡರ್ ಪ್ರಕಾರ ಆಗಸ್ಟ್ 26 ಮತ್ತು 28 ಈಗಾಗಲೇ ರಜಾದಿನಗಳಾಗಿದ್ದವು. ಈಗ ಆಗಸ್ಟ್ 27ಕ್ಕೂ ರಜೆ ನೀಡಿದ್ದರಿಂದ, ಆಗಸ್ಟ್ 26ರಿಂದ 28ರವರೆಗೆ ಸುಪ್ರೀಂ ಕೋರ್ಟ್ ರಜೆ ಇರಲಿದೆ.

ಆಗಸ್ಟ್ 27ರ ರಜೆಯನ್ನು ಸರಿದೂಗಿಸಲು ಆಗಸ್ಟ್ 22ರ ಶನಿವಾರದಂದು ಸುಪ್ರೀಂ ಕೋರ್ಟ್ ಪೂರ್ಣ ಪ್ರಮಾಣದಲ್ಲಿ ಕಾರ್ಯನಿರ್ವಹಿಸಲಿದ್ದು, ರಿಜಿಸ್ಟ್ರಿ ಕಚೇರಿಗಳು ಸಂಜೆ 5 ಗಂಟೆಯವರೆಗೆ ತೆರೆದಿರುತ್ತವೆ.

ಸುಪ್ರೀಂ ಕೋರ್ಟ್ ಮತ್ತು ಅದರ ರಿಜಿಸ್ಟ್ರಿಗೆ ನೀಡಲಾಗಿರುವ ಆಗಸ್ಟ್ 27ರ ರಜೆಯು ಸಾರ್ವತ್ರಿಕ ರಜೆಯಲ್ಲ. ಈ ವಿಶೇಷ ರಜೆಯು ದೇಶದ ಇತರೆ ಸಂಸ್ಥೆಗಳ ಮೇಲೆ ಯಾವುದೇ ಪ್ರಭಾವ ಬೀರುವುದಿಲ್ಲ.

* ಸುಪ್ರೀಂ ಕೋರ್ಟ್ ಹಾಗೂ ರಿಜಿಸ್ಟ್ರಿ: ಆಗಸ್ಟ್ 26ರಿಂದ 28ರವರೆಗೆ ಕಾರ್ಯನಿರ್ವಹಿಸುವುದಿಲ್ಲ.

* ಬ್ಯಾಂಕುಗಳು: ಸುಪ್ರೀಂ ಕೋರ್ಟ್‌ನ ಈ ರಜೆಯಿಂದ ಬ್ಯಾಂಕ್ ಸೇವೆಗಳಿಗೆ ಯಾವುದೇ ಅಡಚಣೆ ಇರುವುದಿಲ್ಲ.

* ಷೇರು ಮಾರುಕಟ್ಟೆ: ಎಂದಿನಂತೆ ವಹಿವಾಟು ನಡೆಸಲಿದ್ದು, ಈ ಆದೇಶ ಅನ್ವಯಿಸುವುದಿಲ್ಲ.

* ಖಾಸಗಿ ಕಚೇರಿಗಳು ಹಾಗೂ ಸಂಸ್ಥೆಗಳು: ತೆರೆದಿರುತ್ತವೆ.

* ಶಾಲೆ-ಕಾಲೇಜುಗಳು: ಸಾಮಾನ್ಯ ರಜಾದಿನಗಳ ವೇಳಾಪಟ್ಟಿಯನ್ನೇ ಅನುಸರಿಸಲಿವೆ.

* ಇತರ ನ್ಯಾಯಾಲಯಗಳು (ಹೈಕೋರ್ಟ್ ಮತ್ತು ಕೆಳ ಹಂತದ ಕೋರ್ಟ್‌ಗಳು): ಈ ರಜೆ ಕೇವಲ ದೇಶದ ಅತ್ಯುನ್ನತ ನ್ಯಾಯಾಲಯಕ್ಕೆ (ಸುಪ್ರೀಂ ಕೋರ್ಟ್) ಮಾತ್ರ ಸೀಮಿತವಾಗಿದೆ.