ಸಾವಿರಾರು ಮೈಲಿ ದೂರದಿಂದಲೇ ವಿಮಾನಗಳನ್ನು ಹೊಡೆದುರುಳಿಸಲು ಚೀನಾದಿಂದ ಹೈಪರ್ಸಾನಿಕ್ ಕ್ಷಿಪಣಿ ಅಭಿವೃದ್ಧಿ

 ನವದೆಹಲಿ: ಆಕಾಶದಿಂದ ಆಕಾಶಕ್ಕೆ ಪ್ರಯೋಗಿಸಬಹುದಾದ ಶಸ್ತ್ರಾಸ್ತ್ರಗಳನ್ನು ಉಡಾಯಿಸುವ ಸಾಮರ್ಥ್ಯ ಹೊಂದಿರುವ ಹೈಪರ್ಸಾನಿಕ್ ಗ್ಲೈಡ್ ವಾಹನಗಳನ್ನು (ಎಚ್ಜಿವಿ) ಚೀನಾದ ಸೇನೆಯು ಅಭಿವೃದ್ಧಿಪಡಿಸಿದೆ. ಚೀನಾವು ಭಾರತದ ಪ್ರಮುಖ ನೆರೆ ರಾಷ್ಟ್ರವಾಗಿರುವುದರಿಂದ, ಬೀಜಿಂಗ್‌ನ ಕ್ಷಿಪಣಿ ತಂತ್ರಜ್ಞಾನದ ಪ್ರಗತಿಯು ಪ್ರಾದೇಶಿಕ ಮತ್ತು ಜಾಗತಿಕ ಭದ್ರತೆಯ ದೃಷ್ಟಿಯಿಂದ ಅತ್ಯಂತ ಮಹತ್ವದ್ದಾಗಿದೆ. 

ಕಮಾಂಡ್-ಆಯಂಡ್-ಕಂಟ್ರೋಲ್ ಮಾದರಿಯ ವಿಮಾನಗಳನ್ನು ಸಾವಿರಾರು ಮೈಲಿಗಳ ದೂರದಿಂದಲೇ ಹೊಡೆದುರುಳಿಸಲು ಈ ಆಧುನಿಕ ತಂತ್ರಜ್ಞಾನವನ್ನು ವಿನ್ಯಾಸಗೊಳಿಸಲಾಗಿದೆ ಎಂದು Bloomberg ವರದಿ ಮಾಡಿದೆ.

ಆಕಾಶದಿಂದ ಆಕಾಶಕ್ಕೆ ಚಿಮ್ಮುವ ಕ್ಷಿಪಣಿಗಳನ್ನು ಹೈಪರ್ಸಾನಿಕ್ ಗ್ಲೈಡ್ ವಾಹನದೊಂದಿಗೆ ಸಂಯೋಜಿಸುವ ತಂತ್ರಜ್ಞಾನವನ್ನು ಈವರೆಗೆ ಇತರ ಯಾವುದೇ ದೇಶ ಹೊಂದಿಲ್ಲ.

ಡಿಎಫ್-17 ಕ್ಷಿಪಣಿಗಳ ಮೂಲಕ ನಿಯೋಜಿಸಲಾಗುವ ಹೈಪರ್ಸಾನಿಕ್ ಗ್ಲೈಡ್ ವಾಹನಗಳು ಸುಮಾರು 2,414 ಕಿಲೋಮೀಟರ್ಗಳಷ್ಟು ದೂರ ಕ್ರಮಿಸಬಲ್ಲವು ಎಂದು ವರದಿ ತಿಳಿಸಿದೆ.

ಡಿಎಫ್-27 ಕ್ಷಿಪಣಿಗಳು ಸುಮಾರು 5,000 ಮೈಲಿ ವ್ಯಾಪ್ತಿಯನ್ನು ಹೊಂದಿದ್ದು, ಹವಾಯಿಯಂತಹ ದೂರದ ಪ್ರದೇಶಗಳೂ ಅದರ ವ್ಯಾಪ್ತಿಗೆ ಬರುತ್ತವೆ ಎನ್ನಲಾಗಿದೆ.

ಹೈಪರ್ಸಾನಿಕ್ ಗ್ಲೈಡ್ ವಾಹನಗಳು ವಾತಾವರಣದಲ್ಲಿ ವೇಗವಾಗಿ ಚಲಿಸುವಾಗಲೂ ತಮ್ಮ ದಿಕ್ಕನ್ನು ಬದಲಾಯಿಸುವ ಸಾಮರ್ಥ್ಯವಿರುವ ಸಿಡಿತಲೆಗಳಾಗಿವೆ. ಹಾಗಾಗಿ, ಶತ್ರುಪಡೆಗಳು ಇವುಗಳನ್ನು ತಡೆಹಿಡಿಯುವುದು ಅತ್ಯಂತ ಕಷ್ಟಕರವಾಗಿದೆ.

ಪಶ್ಚಿಮ ಏಶ್ಯದಲ್ಲಿ ಅಮೆರಿಕ-ಇರಾನ್ ನಡುವಿನ ಸಂಘರ್ಷವು ಉತ್ತುಂಗದಲ್ಲಿರುವಾಗ, ಜಾಗತಿಕ ಮಟ್ಟದಲ್ಲಿ ತೀವ್ರ ಆತಂಕದ ವಾತಾವರಣವಿರುವ ಹೊತ್ತಿನಲ್ಲೇ ಈ ವಿಷಯ ಮುನ್ನೆಲೆಗೆ ಬಂದಿದೆ.