Asian Games 2026 | ಟೇಬಲ್ ಟೆನ್ನಿಸ್, ಸ್ಕ್ವ್ಯಾಷ್‌ ನಲ್ಲಿ ಭಾರತಕ್ಕೆ ಪದಕ ಖಚಿತ

ನವದೆಹಲಿ:   ಏಷ್ಯನ್ ಗೇಮ್ಸ್‌ ನ 7ನೇ ದಿನ ಟೇಬಲ್ ಟೆನ್ನಿಸ್ ಮತ್ತು ಸ್ಕ್ವ್ಯಾಷ್‌ ನಲ್ಲಿ ಭಾರತಕ್ಕೆ ಪದಕ ಖಚಿತವಾಗಿದೆ. ಎರಡೂ ಕ್ರೀಡೆಗಳ ಮಿಶ್ರ ಡಬಲ್ಸ್‌ ನಲ್ಲಿ ಭಾರತೀಯ ಜೋಡಿಗಳು ಸೆಮಿಫೈನಲ್ ಪ್ರವೇಶಿಸಿವೆ. 

ಟೇಬಲ್ ಟೆನ್ನಿಸ್ ಮಿಶ್ರ ಡಬಲ್ಸ್‌ ನಲ್ಲಿ ಮನುಷ್ ಮತ್ತು ದಿಯಾ ನಾಲ್ಕನೇ ಗೇಮ್‌ ನಲ್ಲಿ 11-5 ಅಂತರದಲ್ಲಿ ಗೆಲುವು ಸಾಧಿಸಿದರು.

ಇದರಿಂದ ಪಂದ್ಯವನ್ನು ಗೆದ್ದ ಅವರು ಕನಿಷ್ಠ ಕಂಚಿನ ಪದಕ ಖಚಿತಪಡಿಸಿಕೊಂಡರು.

ಎಂಟು ವರ್ಷಗಳ ಹಿಂದೆ ಜಕಾರ್ತಾದಲ್ಲಿ ಶರತ್ ಕಮಲ್ ಮತ್ತು ಮಣಿಕಾ ಬಾತ್ರಾ ಕಂಚಿನ ಪದಕ ಗೆದ್ದಿದ್ದರು. ಅವರ ಬಳಿಕ ಏಷ್ಯನ್ ಗೇಮ್ಸ್‌ ನಲ್ಲಿ ಭಾರತಕ್ಕೆ ಮಿಶ್ರ ಡಬಲ್ಸ್‌ನಲ್ಲಿ ದೊರೆಯುತ್ತಿರುವ ಎರಡನೇ ಪದಕ ಇದಾಗಿದೆ. ಈ ಕ್ರೀಡಾಕೂಟದಲ್ಲಿ ಭಾರತೀಯ ಟೇಬಲ್ ಟೆನ್ನಿಸ್ ತಂಡಕ್ಕೆ ದೊರೆಯುತ್ತಿರುವ ಒಟ್ಟಾರೆ ನಾಲ್ಕನೇ ಪದಕವೂ ಇದಾಗಿದೆ.

ಮನುಷ್ ಮತ್ತು ದಿಯಾ ಅವರು ಭಾರತೀಯ ಕಾಲಮಾನ ಮಧ್ಯಾಹ್ನ 3.45ಕ್ಕೆ ನಡೆಯಲಿರುವ ಸೆಮಿಫೈನಲ್‌ ನಲ್ಲಿ ಚೀನಾದ ವಾಂಗ್ ಚುಕಿನ್ ಮತ್ತು ಸುನ್ ಯಿಂಗ್‌ಶಾ ಅವರನ್ನು ಎದುರಿಸಲಿದ್ದಾರೆ. ವಾಂಗ್ ಚುಕಿನ್ ಮತ್ತು ಸುನ್ ಯಿಂಗ್‌ ಶಾ ವಿಶ್ವದ 2ನೇ ಶ್ರೇಯಾಂಕದ ಜೋಡಿಯಾಗಿದ್ದಾರೆ.

ಈ ಪಂದ್ಯವನ್ನು ಗೆದ್ದು ಫೈನಲ್ ಪ್ರವೇಶಿಸುವ ಮೂಲಕ ಏಷ್ಯನ್ ಗೇಮ್ಸ್ ಟೇಬಲ್ ಟೆನ್ನಿಸ್‌ ನಲ್ಲಿ ಈವರೆಗೆ ಯಾವುದೇ ಭಾರತೀಯ ಆಟಗಾರರು ಮಾಡದ ಸಾಧನೆ ದಾಖಲಿಸುವ ಗುರಿಯನ್ನು ಮನುಷ್-ದಿಯಾ ಹೊಂದಿದ್ದಾರೆ.

ವೇಲವನ್ ಸೆಂಥಿಲ್‌ಕುಮಾರ್/ ಜೋಶ್ನಾ ಚಿನ್ನಪ್ಪ Photo : x.com/the_bridge_in

ಸ್ಕ್ವ್ಯಾಷ್‌ ನಲ್ಲೂ ಪದಕ

ಸ್ಕ್ವ್ಯಾಷ್‌ ನಲ್ಲಿ 40 ವರ್ಷದ ಜೋಶ್ನಾ ಚಿನ್ನಪ್ಪ ಮತ್ತು ವೇಲವನ್ ಸೆಂಥಿಲ್‌ಕುಮಾರ್ ಮಿಶ್ರ ಡಬಲ್ಸ್ ಸೆಮಿಫೈನಲ್ ಪ್ರವೇಶಿಸಿದ್ದಾರೆ. ಇದರೊಂದಿಗೆ ಭಾರತಕ್ಕೆ ಕನಿಷ್ಠ ಕಂಚಿನ ಪದಕ ಖಚಿತವಾಗಿದೆ.

ಭಾರತೀಯ ಜೋಡಿ ಫಿಲಿಪೈನ್ಸ್‌ ನ ವಿರುದ್ಧ 11-3, 11-5 ಅಂತರದಲ್ಲಿ ಸುಲಭ ಗೆಲುವು ಸಾಧಿಸಿತು.

16 ವರ್ಷಗಳ ಹಿಂದೆ ಏಷ್ಯನ್ ಗೇಮ್ಸ್‌ ನಲ್ಲಿ ಪದಕ ಗೆದ್ದಿದ್ದ ಚಿನ್ನಪ್ಪ ಅವರಿಗೆ ಇದೀಗ ಅದಕ್ಕಿಂತ ಉತ್ತಮ ಸಾಧನೆ ಮಾಡುವ ಅವಕಾಶ ಸಿಕ್ಕಿದೆ.

ಶನಿವಾರ ನಡೆಯಲಿರುವ ಸೆಮಿಫೈನಲ್‌ ನಲ್ಲಿ ಚಿನ್ನಪ್ಪ ಮತ್ತು ವೇಲವನ್ ಅವರು ಹಾಂಗ್‌ ಕಾಂಗ್‌ ನ ಲೀ ಕಾ ಯಿ ಮತ್ತು ಟಾಂಗ್ ಮಿಂಗ್ ಹಾಂಗ್ ಅವರನ್ನು ಎದುರಿಸಲಿದ್ದಾರೆ.