ಕೆಎಸ್‍ಇಬಿಯ ರಾಜ್ಯದ ಮೊದಲ ಬ್ಯಾಟರಿ ವಿದ್ಯುತ್ ಸಂಗ್ರಹ ಘಟಕ ಮುಳ್ಳೇರಿಯಾದಲ್ಲಿ ಸಿದ್ಧ

ಮುಳ್ಳೇರಿಯ: ಕೇರಳ ರಾಜ್ಯ ವಿದ್ಯುತ್ ಮಂಡಳಿಯ (ಕೆಎಸ್‍ಇಬಿ) ರಾಜ್ಯದ ಮೊದಲ ಬ್ಯಾಟರಿ ಎನರ್ಜಿ ಸ್ಟೋರೇಜ್ ಸಿಸ್ಟಮ್ (ಃಇSS) ಮುಳ್ಳೇರಿಯಾದಲ್ಲಿ ನಿರ್ಮಾಣಗೊಂಡಿದೆ. 15 ಮೆಗಾವಾಟ್ ಸಾಮಥ್ರ್ಯದ ಈ ವಿದ್ಯುತ್ ಸಂಗ್ರಹ ಘಟಕದ ನಿರ್ಮಾಣ ಕಾರ್ಯ ಪೂರ್ಣಗೊಂಡಿದ್ದು, ಪ್ರಾಯೋಗಿಕವಾಗಿ ವಿದ್ಯುತ್ ಪೂರೈಕೆಯೂ ಆರಂಭವಾಗಿದೆ.

ಮುಳ್ಳೇರಿಯಾ ಸಬ್‍ಸ್ಟೇಷನ್‍ಗೆ ಹೊಂದಿಕೊಂಡಿರುವ ಕೆಎಸ್‍ಇಬಿಯ ಒಂದು ಎಕರೆ ಜಾಗದಲ್ಲಿ ಈ ಘಟಕವನ್ನು ಸ್ಥಾಪಿಸಲಾಗಿದೆ. ಒಟ್ಟು 14 ಬ್ಯಾಟರಿ ಕಂಟೈನರ್‍ಗಳು, ಏಳು ಪವರ್ ಕನ್ವರ್ಟರ್ ವ್ಯವಸ್ಥೆಗಳು ಹಾಗೂ ಎರಡು ಟ್ರಾನ್ಸ್‍ಫಾರ್ಮರ್‍ಗಳನ್ನು ಇದು ಒಳಗೊಂಡಿದೆ.

ರಾತ್ರಿ ವಿದ್ಯುತ್ ಬೇಡಿಕೆ ಪೂರೈಸಲು ಸಹಕಾರಿ:

ಹಗಲಿನಲ್ಲಿ ಲಭ್ಯವಾಗುವ ಹೆಚ್ಚುವರಿ ವಿದ್ಯುತ್ ಅನ್ನು ಬ್ಯಾಟರಿಗಳಲ್ಲಿ ಸಂಗ್ರಹಿಸಿ, ರಾತ್ರಿ ವಿದ್ಯುತ್ ಬೇಡಿಕೆ ಹೆಚ್ಚಾಗುವ ಸಮಯದಲ್ಲಿ ಮತ್ತೆ ಗ್ರಿಡ್‍ಗೆ ಪೂರೈಸುವುದು ಈ ಯೋಜನೆಯ ಮುಖ್ಯ ಉದ್ದೇಶವಾಗಿದೆ.

ಕಳೆದ ಎರಡು ದಿನಗಳಿಂದ ರಾತ್ರಿ ವೇಳೆ 60 ಮೆಗಾವಾಟ್‍ಅವರ್‍ನಷ್ಟು ವಿದ್ಯುತ್ ಪೂರೈಕೆಯನ್ನು ಪರೀಕ್ಷಾರ್ಥವಾಗಿ ನಡೆಸಲಾಗಿದೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ. ಕೆಎಸ್‍ಇಬಿಯ ಕಲಮಶ್ಶೇರಿಯ ರಾಜ್ಯ ಲೋಡ್ ಡಿಸ್ಪ್ಯಾಚ್ ಕೇಂದ್ರದಿಂದ ಅನುಮತಿ ದೊರೆತ ಬಳಿಕ ಘಟಕವನ್ನು ಅಧಿಕೃತವಾಗಿ ಉದ್ಘಾಟಿಸಲಾಗುತ್ತದೆ.

15 ಮೆಗಾವಾಟ್ ಸಾಮಥ್ರ್ಯದ ಈ ಘಟಕವು ನಾಲ್ಕು ಗಂಟೆಗಳ ಕಾಲ ವಿದ್ಯುತ್ ಪೂರೈಸುವ ರೀತಿಯಲ್ಲಿ ಕಾರ್ಯನಿರ್ವಹಿಸಲಿದೆ.

ಕೆಎಸ್‍ಇಬಿಗೆ ವೆಚ್ಚದ ಉಳಿತಾಯದ ನಿರೀಕ್ಷೆ:

ಹಗಲಿನಲ್ಲಿ ಕಡಿಮೆ ದರದಲ್ಲಿ ವಿದ್ಯುತ್ ಖರೀದಿಸಿ ಸಂಗ್ರಹಿಸುವ ಮೂಲಕ, ರಾತ್ರಿ ಹೆಚ್ಚಿನ ದರದಲ್ಲಿ ಹೊರಗಿನಿಂದ ವಿದ್ಯುತ್ ಖರೀದಿಸುವ ಅಗತ್ಯವನ್ನು ಕಡಿಮೆ ಮಾಡುವುದು ಯೋಜನೆಯ ಉದ್ದೇಶವಾಗಿದೆ. ಅಂಬಲತ್ತರ ಮತ್ತು ಪೈವಳಿಕೆ ಕೊಮ್ಮಂಗಳ ಪ್ರದೇಶಗಳ ಸೌರ ವಿದ್ಯುತ್ ಪಾರ್ಕ್‍ಗಳಿಂದ ಉತ್ಪಾದನೆಯಾಗುವ ವಿದ್ಯುತ್ ಅನ್ನು ಕೂಡ ಈ ವ್ಯವಸ್ಥೆಯಲ್ಲಿ ಸಂಗ್ರಹಿಸಬಹುದು.

ಸಂಗ್ರಹಿಸಿದ ವಿದ್ಯುತ್ ಅನ್ನು ರಾತ್ರಿ ಪೂರೈಸುವುದಕ್ಕಾಗಿ ಒಪ್ಪಂದದ ಪ್ರಕಾರ ಪ್ರತಿ ಯೂನಿಟ್‍ಗೆ ?4.38ರಂತೆ ಒಪೇರ ಗ್ರೀನ್ ಯಾನ್ ಪ್ರೈವೇಟ್ ಲಿಮಿಟೆಡ್ ಕಂಪನಿಗೆ ಕೆಎಸ್‍ಇಬಿ ಪಾವತಿಸಬೇಕಾಗಿದೆ. ರಾತ್ರಿ ಸಮಯದಲ್ಲಿ ಹೆಚ್ಚಿನ ದರಕ್ಕೆ ವಿದ್ಯುತ್ ಖರೀದಿಸುವುದನ್ನು ಕಡಿಮೆ ಮಾಡಲು ಈ ವ್ಯವಸ್ಥೆ ನೆರವಾಗುವ ನಿರೀಕ್ಷೆಯಿದೆ.

ಈ ಯೋಜನೆಗೆ ಕೆಎಸ್‍ಇಬಿ ಜಾಗವನ್ನು ಒದಗಿಸಿದ್ದು, ಘಟಕದ ನಿರ್ಮಾಣಕ್ಕಾಗಿ ಮಂಡಳಿ ನೇರವಾಗಿ ಹಣ ವೆಚ್ಚ ಮಾಡಿಲ್ಲ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.

ಮೈಲಾಟಿಯ 125 ಮೆಗಾವಾಟ್ ಘಟಕದ ಕಾಮಗಾರಿ ಬಾಕಿ

ಕಾಸರಗೋಡು ಜಿಲ್ಲೆಯ ಮೈಲಾಟಿಯಲ್ಲಿ 125 ಮೆಗಾವಾಟ್ ಸಾಮಥ್ರ್ಯದ ಮತ್ತೊಂದು ಬ್ಯಾಟರಿ ವಿದ್ಯುತ್ ಸಂಗ್ರಹ ಘಟಕ ನಿರ್ಮಿಸಲು ಯೋಜಿಸಲಾಗಿದ್ದು, ಅಲ್ಲಿ ಬ್ಯಾಟರಿಗಳು ಇನ್ನೂ ತಲುಪದ ಕಾರಣ ಕಾಮಗಾರಿ ಪೂರ್ಣಗೊಂಡಿಲ್ಲ.

ಮುಳ್ಳೇರಿಯಾ ಘಟಕಕ್ಕೆ ಚೀನಾದಿಂದ ಆಮದು ಮಾಡಲಾದ ಬ್ಯಾಟರಿ ಘಟಕಗಳನ್ನು ಬಳಸಲಾಗಿದೆ. ನಿಗದಿತ ಅವಧಿಯೊಳಗೆ ನಿರ್ಮಾಣ ಪೂರ್ಣಗೊಂಡಿದ್ದು, ಸುತ್ತುಬೇಲಿ ಅಳವಡಿಸುವಂತಹ ಕೆಲವು ಸಣ್ಣಪುಟ್ಟ ಕೆಲಸಗಳು ಮಾತ್ರ ಬಾಕಿ ಉಳಿದಿವೆ. ಒಂದು ತಿಂಗಳೊಳಗೆ ಘಟಕದ ಉದ್ಘಾಟನೆ ನಡೆಯುವ ಸಾಧ್ಯತೆಯಿದೆ ಎಂದು ವರದಿಯಾಗಿದೆ.

ರಾಜ್ಯದಲ್ಲಿ ವಿದ್ಯುತ್ ಬಳಕೆ ಹೆಚ್ಚುತ್ತಿರುವ ಸಂದರ್ಭದಲ್ಲಿ, ಹಗಲಿನ ಹೆಚ್ಚುವರಿ ವಿದ್ಯುತ್ ಅನ್ನು ಸಂಗ್ರಹಿಸಿ ರಾತ್ರಿ ಬೇಡಿಕೆ ಪೂರೈಸುವ ಈ ವ್ಯವಸ್ಥೆಯು ವಿದ್ಯುತ್ ಪೂರೈಕೆಯ ನಿರ್ವಹಣೆಗೆ ನೆರವಾಗುವ ನಿರೀಕ್ಷೆಯಿದೆ.