ವಿದ್ಯಾರ್ಥಿ-ಶಿಕ್ಷಕರು ಸಾಕ್ಷರರಲ್ಲದ 5-8 ವ್ಯಕ್ತಿಗಳಿಗೆ ಅಕ್ಷರ ಕಲಿಸುವುದು ಕಡ್ಡಾಯ: ULLAS ಮಾರ್ಗಸೂಚಿ!

ನವದೆಹಲಿ: ಶಿಕ್ಷಣ ಸಚಿವಾಲಯವು ದೇಶಾದ್ಯಂತ ಇರುವ ಶಿಕ್ಷಕ ಶಿಕ್ಷಣ ಸಂಸ್ಥೆಗಳಲ್ಲಿ (TEIs) ವ್ಯಾಸಂಗ ಮಾಡುತ್ತಿರುವ ವಿದ್ಯಾರ್ಥಿ-ಶಿಕ್ಷಕರಿಗೆ ಹೊಸ ಮಾರ್ಗಸೂಚಿಗಳನ್ನು ಹೊರಡಿಸಿದೆ.

ಇದರ ಪ್ರಕಾರ, ಅವರು ತಮ್ಮ ಕೋರ್ಸ್‌ಗಳ ಅವಧಿಯನ್ನು ಅವಲಂಬಿಸಿ, ಅಕ್ಷರಸ್ಥರಲ್ಲದ ಐದರಿಂದ ಎಂಟು ವ್ಯಕ್ತಿಗಳಿಗೆ ಸಾಕ್ಷರರಾಗಲು ಸಹಾಯ ಮಾಡಬೇಕಾಗುತ್ತದೆ. ತಾವು ಕಲಿಸಿದ ವ್ಯಕ್ತಿಗಳು ಕಡ್ಡಾಯ ಪರೀಕ್ಷೆಯಲ್ಲಿ ಉತ್ತೀರ್ಣರಾಗಿ, ಅಧಿಕೃತವಾಗಿ 'ಸಾಕ್ಷರರು' ಎಂದು ಪ್ರಮಾಣೀಕರಿಸಲ್ಪಟ್ಟ ನಂತರವೇ, ಈ ವಿದ್ಯಾರ್ಥಿ-ಶಿಕ್ಷಕರಿಗೆ ಶ್ರೇಣಿಗಳನ್ನು (grades) ನೀಡಲಾಗುತ್ತದೆ.

'ದಿ ನ್ಯೂ ಇಂಡಿಯನ್ ಎಕ್ಸ್‌ಪ್ರೆಸ್' ಪತ್ರಿಕೆಯು, ಶಾಲಾ ಶಿಕ್ಷಣ ಮತ್ತು ಸಾಕ್ಷರತಾ ಸಚಿವಾಲಯವು ಸಿದ್ಧಪಡಿಸಿದ 32 ಪುಟಗಳ ದಾಖಲೆಯನ್ನು ಪಡೆದುಕೊಂಡಿದೆ. 'ಉಲ್ಲಾಸ್' (ULLAS - ಸಮಾಜದಲ್ಲಿ ಎಲ್ಲರಿಗೂ ಆಜೀವ ಕಲಿಕೆಯ ತಿಳುವಳಿಕೆ) - 'ನವ ಭಾರತ ಸಾಕ್ಷರತಾ ಕಾರ್ಯಕ್ರಮ'ದ ಅಡಿಯಲ್ಲಿ ಶಿಕ್ಷಕ ಶಿಕ್ಷಣ ಸಂಸ್ಥೆಗಳಿಗೆ ಈ ಮಾರ್ಗಸೂಚಿಗಳನ್ನು ರೂಪಿಸಲಾಗಿದೆ.

ಭಾರತದಲ್ಲಿ 15,509 ಮಾನ್ಯತೆ ಪಡೆದ ಶಿಕ್ಷಕ ಶಿಕ್ಷಣ ಸಂಸ್ಥೆಗಳಿದ್ದು, ಇವುಗಳಲ್ಲಿ ಒಟ್ಟು 17,84,326 ಸೀಟುಗಳಿವೆ. ಈ ಸಂಸ್ಥೆಗಳು 'ರಾಷ್ಟ್ರೀಯ ಶಿಕ್ಷಕ ಶಿಕ್ಷಣ ಮಂಡಳಿ'ಯ (NCTE) ವ್ಯಾಪ್ತಿಗೆ ಬರುತ್ತವೆ. NCTE ಮಾನ್ಯತೆ ಪಡೆದ ಎಲ್ಲಾ ಶಿಕ್ಷಕ ಶಿಕ್ಷಣ ಕಾರ್ಯಕ್ರಮಗಳಲ್ಲಿ ದಾಖಲಾದ ವಿದ್ಯಾರ್ಥಿ-ಶಿಕ್ಷಕರು, ಸ್ವಯಂಸೇವಕ ಶಿಕ್ಷಕರಾಗಿ ಕಡ್ಡಾಯವಾಗಿ ಪಾಲ್ಗೊಳ್ಳುವುದನ್ನು ಖಚಿತಪಡಿಸಿಕೊಳ್ಳುವುದು ಈ ಮಾರ್ಗಸೂಚಿಗಳ ಉದ್ದೇಶವಾಗಿದೆ. ಈ ಕೋರ್ಸ್‌ಗಳಲ್ಲಿ ಇಂಟಿಗ್ರೇಟೆಡ್ ಟೀಚರ್ ಎಜುಕೇಶನ್ ಪ್ರೋಗ್ರಾಂ (ITEP), D.El.Ed, B.P.Ed, B.Ed, M.Ed ಮತ್ತು M.P.Ed ಸೇರಿವೆ.

ಪ್ರತಿಯೊಬ್ಬ ವಿದ್ಯಾರ್ಥಿ-ಶಿಕ್ಷಕರು ತಮ್ಮ ಕೋರ್ಸ್‌ಗೆ ಅನುಗುಣವಾಗಿ ಕನಿಷ್ಠ 5 ರಿಂದ 8 ವ್ಯಕ್ತಿಗಳಿಗೆ ಕಲಿಸುವುದು ಕಡ್ಡಾಯವಾಗಿದೆ. ಅಲ್ಲದೆ, ಅವರು 'ಅಡಿಪಾಯ ಸಾಕ್ಷರತೆ ಮತ್ತು ಸಂಖ್ಯಾ ಜ್ಞಾನ ಮೌಲ್ಯಮಾಪನ ಪರೀಕ್ಷೆ'ಯಲ್ಲಿ (FLNAT) ಭಾಗವಹಿಸುವಂತೆ ನೋಡಿಕೊಳ್ಳಬೇಕು ಮತ್ತು 'ಉಲ್ಲಾಸ್' (ULLAS) ಅಡಿಯಲ್ಲಿ ಅವರು ಸಾಕ್ಷರರೆಂದು ಪ್ರಮಾಣೀಕರಿಸಲ್ಪಡುವಂತೆ ಮಾಡಬೇಕು" ಎಂದು ದಾಖಲೆಯು ತಿಳಿಸುತ್ತದೆ.

ನಿಗದಿಪಡಿಸಿದ ಟಾರ್ಗೆಟ್ ಪ್ರಕಾರ, ಎರಡು ವರ್ಷಗಳ ಶಿಕ್ಷಣ ಕೋರ್ಸ್‌ಗಳನ್ನು ಓದುತ್ತಿರುವ ವಿದ್ಯಾರ್ಥಿಗಳು ಕನಿಷ್ಠ ಐದು ಜನರಿಗೆ, ಮೂರು ವರ್ಷಗಳ ಕೋರ್ಸ್‌ಗಳಲ್ಲಿರುವವರು ಕನಿಷ್ಠ ಆರು ಜನರಿಗೆ ಮತ್ತು ನಾಲ್ಕು ವರ್ಷಗಳ ಕೋರ್ಸ್‌ಗಳಲ್ಲಿರುವವರು ಎಂಟು ಜನರಿಗೆ ಸಾಕ್ಷರರಾಗಲು ಸಹಾಯ ಮಾಡಬೇಕು. ತಮ್ಮ ಕೋರ್ಸ್ ಪೂರ್ಣಗೊಳ್ಳುವಷ್ಟರಲ್ಲಿ ಈ ಗುರಿಯನ್ನು ಸಾಧಿಸುವುದು ಕಡ್ಡಾಯವಾಗಿದೆ.

2022-23ರ ಆರ್ಥಿಕ ವರ್ಷದಲ್ಲಿ ಪ್ರಾರಂಭಿಸಲಾದ 'ಉಲ್ಲಾಸ್' (ULLAS) ಯೋಜನೆಯು , ಮೂಲಭೂತ ಸಾಕ್ಷರತೆ ಮತ್ತು ಸಂಖ್ಯಾ ಜ್ಞಾನವನ್ನು ಹೊಂದಿರದ 15 ವರ್ಷ ಮತ್ತು ಅದಕ್ಕಿಂತ ಹೆಚ್ಚಿನ ವಯಸ್ಸಿನ ಯುವಕರು ಹಾಗೂ ವಯಸ್ಕರಿಗೆ, ಎಲ್ಲರನ್ನೂ ಒಳಗೊಂಡ ಆಜೀವ ಕಲಿಕೆಯ ಅವಕಾಶಗಳನ್ನು ಒದಗಿಸುವ ಗುರಿಯನ್ನು ಹೊಂದಿದೆ. ಶಿಕ್ಷಕ ಶಿಕ್ಷಣವನ್ನು ಒಂದು ಸಾಕ್ಷರತಾ ಆಂದೋಲನವನ್ನಾಗಿ ಪರಿವರ್ತಿಸುವುದು ಈ ಉಪಕ್ರಮದ ಉದ್ದೇಶವಾಗಿದೆ ಎಂದು ಮಾರ್ಗಸೂಚಿಗಳು ತಿಳಿಸುತ್ತವೆ.

ವಿದ್ಯಾರ್ಥಿ-ಶಿಕ್ಷಕರು ಅಕ್ಷರಸ್ಥರಲ್ಲದ ಪ್ರತಿಯೊಬ್ಬ ಕಲಿಯುವವರ ಪ್ರೊಫೈಲ್ ಅನ್ನು ಸಿದ್ಧಪಡಿಸಬೇಕು; ಇದರಲ್ಲಿ ಅವರ ವಿವರಗಳು ಮತ್ತು ಕಲಿಕೆಯ ಪಯಣದ ದಾಖಲೆಗಳನ್ನು ನಮೂದಿಸಬೇಕಾಗುತ್ತದೆ. ಕಲಿಕಾರ್ಥಿಗಳನ್ನು ಗುರುತಿಸಲು ಶಾಲೆಗಳು, ಸ್ಥಳೀಯ ಸಂಸ್ಥೆಗಳು, ಸರ್ಕಾರೇತರ ಸಂಸ್ಥೆಗಳು ಮತ್ತು ಸಮುದಾಯ ಸಂಘಟನೆಗಳೊಂದಿಗೆ ಕೆಲಸ ಮಾಡುವಂತೆ ಶಿಕ್ಷಕ ಶಿಕ್ಷಣ ಸಂಸ್ಥೆಗಳನ್ನು ಈ ಮಾರ್ಗಸೂಚಿಗಳು ನಿರೀಕ್ಷಿಸುತ್ತವೆ.

ಅಲ್ಲದೆ, "ಬೋಧನೆ-ಕಲಿಕೆಯ ಅನುಭವವನ್ನು ಹಂಚಿಕೊಳ್ಳುವ ಕುರಿತು ಹಾಗೂ ಕಲಿಕಾರ್ಥಿಗಳ ಪ್ರಗತಿ ವರದಿಗಳ ಬಗ್ಗೆ ಒಂದು ಸಂಕ್ಷಿಪ್ತ, ಚಿಂತನಾತ್ಮಕ ವರದಿಯನ್ನು" ಸಿದ್ಧಪಡಿಸುವಂತೆಯೂ ಈ ದಾಖಲೆಯು ಸೂಚಿಸುತ್ತದೆ.