ಅತ್ಯುತ್ತಮ ಗುಣಮಟ್ಟ ಅರ್ಹತಾಪತ್ರ- ನಾಡಿಗೆ ಹಿರಿಮೆ ತಂದ ಆರೋಗ್ಯ ಕೇಂದ್ರಗಳು

           
    ಕಾಸರಗೋಡು: ರಾಷ್ಟ್ರೀಯ ಮಟ್ಟದಲ್ಲಿ ಅತ್ಯುತ್ತಮ ಗುಣಮಟ್ಟ ಕಾಯ್ದುಕೊಂಡಿರುವ ಬಗ್ಗೆ ಅರ್ಹತಾಪತ್ರ ಪಡೆದು ಜಿಲ್ಲೆಯ ಆರೋಗ್ಯ ಕೇಂದ್ರಗಳು ನಾಡಿಗೆ ಹಿರಿಮೆ ತಂದಿವೆ. 
    2018-19 ವರ್ಷದ ರಾಷ್ಟ್ರೀಯ ಕ್ವಾಲಿಟಿ ಅಶ್ಯೂರೆನ್ಸ್ ಸರ್ಟಿಫಿಕೆಟ್ ನಿಟ್ಟಿನಲ್ಲಿ ಶೇ.99 ಅಂಕ ಗಳಿಸಿ ಜಿಲ್ಲೆಯ ಕಯ್ಯೂರು ಕುಟುಂಬ ಆರೋಗ್ಯ ಕೇಂದ್ರ ಪ್ರಥಮ ಸ್ಥಾನ ಪಡೆದಿದೆ. ಶೇ.97 ಅಂಕ ಪಡೆದು ವಲಿಯಪರಂಬ ಪ್ರಾಥಮಿಕ ಆರೋಗ್ಯ ಕೇಂದ್ರ ಮೂರನೇ ಸ್ಥಾನ, ಶೇ.96 ಅಂಕ ಪಡೆದು ಕರಿಂದಳಂ ಕುಟುಂಬ ಆರೋಗ್ಯ ಕೇಂದ್ರ ನಾಲ್ಕನೇ ಸ್ಥಾನ ಪಡೆದಿದೆ. ರಾಜ್ಯದ 7 ಸಂಸ್ಥೆಗಳು ಈ ಅಂಗೀಕಾರಕ್ಕಾಗಿ ಸ್ಪರ್ಧಾ ಕಣದಲ್ಲಿದ್ದುವು.
ಆರೋಗ್ಯ ಸೇವಾ ವಲಯದ ಗುಣಮಟ್ಟವನ್ನು ಗಮನಿಸಿ ಈ ಮಾನ್ಯತೆ ನೀಡಲಾಗುತ್ತದೆ. ಆಸ್ಪತ್ರೆಗಳ ಹೊರರೋಗಿ ವಿಭಾಗ, ಭೌತಿಕ ವ್ಯವಸ್ಥೆಗಳು, ಸಿಬ್ಬಂದಿಯ ದಕ್ಷತೆ, ಅಗತ್ಯದ ಔಷಧಗಳ ಲಭ್ಯತೆ, ಪ್ರಯೋಗಾಲಯ ಸಹಿತ ಸೌಲಭ್ಯಗಳು, ಆರೋಗ್ಯ ಸೇವಾ ಚಟುವಟಿಕೆಗಳು, ದಾಖಲೀಕರಣ, ಜನಜಾಗೃತಿ ಕಾರ್ಯಕ್ರಮಗಳು ಸಹಿತ 300 ಮಾನದಂಡಗಳ ಹಿನ್ನೆಲೆಯಲ್ಲಿ ಈ ಅಂಗೀಕಾರ ಲಭಿಸಿದೆ.
    ಇತ್ತೀಚೆಗೆ ಜಿಲ್ಲಾ ಆಸ್ಪತ್ರೆಗೆ ಕಾಯಕಲ್ಪ ಪ್ರಶಸ್ತಿಯೂ ಲಭಿಸಿತ್ತು. ಜಿಲ್ಲಾ ವೈದ್ಯಾಧಿಕಾರಿ ಡಾ.ಎ.ಪಿ.ದಿನೇಶ್ ಕುಮಾರ್, ಆರೋಗ್ಯ ಕೇರಳಂ ಜಿಲ್ಲಾ ಕಾರ್ಯಕ್ರಮ ಪ್ರಬಂಧಕ ಡಾ.ರಾಮನ್ ಸ್ವಾತಿ ವಾಮನ್, ಜಿಲ್ಲಾ ಕ್ವಾಲಿಟಿ ಅಶ್ಯೂರೆನ್ಸ್ ಅ„ಕಾರಿ ಲಿಬಿಯ ಎಂ.ಸಿರಿಯಕ್  ಅವರ ನೇತೃತ್ವದಲ್ಲಿ ಆಸ್ಪತ್ರೆಯ ವೈದ್ಯಾಧಿಕಾರಿಗಳು, ಸಿಬ್ಬಂದಿ ಮೊದಲಾದವರು ಒಗ್ಗಟ್ಟಿನ ಯತ್ನದ ಫಲವಾಗಿ ಈ ಅಂಗೀಕಾರ ಲಭಿಸಿದೆ.