ಕುಷ್ಠರೋಗ ನಿವಾರಣೆ ಪಕ್ಷಾಚರಣೆಜಿಲ್ಲೆಯಲ್ಲಿ ಆರಂಭ

                             
           ಕಾಸರಗೋಡು: ಕುಷ್ಠರೋಗ ನಿವಾರಣೆ ಪಕ್ಷಾಚರಣೆ ಜಿಲ್ಲೆಯಲ್ಲಿ ಆರಂಭಗೊಡಿದೆ. ಸಾರ್ವಜನಿಕರಲ್ಲಿ ಕುಷ್ಠರೋಗ ವಿರುದ್ಧ ಜಾಗೃತಿ ಮೂಡಿಸುವ ಮತ್ತು ಸಮಾಜದಲ್ಲಿ ಅಳಿದುಳಿದಿರುವ ರೋಗಿಗಳನ್ನು ಪತ್ತೆಮಾಡಿ ಅವರನ್ನು ಸಂಪೂರ್ಣ ಚಿಕಿತ್ಸೆಗೊಳಪಡಿಸಿ, ಈ ರೋಗವನ್ನು ಬುಡಸಮೇತ ಕಿತ್ತೆಸೆಯುವ ಉದ್ದೇಶದಿಂದ ಈ ಪಕ್ಷಾಚರಣೆಗೆ ಚಾಲನೆ ಲಭಿಸಿದೆ. ಫೆ.12 ವರೆಗೆ ಜಿಲ್ಲೆಯಲ್ಲಿ ಈ ಸಂಬಂಧ ವಿವಿಧ ಚಟುವಟಿಕೆಗಳು ನಡೆಯಲಿವೆ. ಪಕ್ಷಾಚರಣೆಯ ಜಿಲ್ಲಾ ಮಟ್ಟದ ಉದ್ಘಾಟನೆ ಗುರುವಾರ ಅಂಬಲತ್ತರ ಸರಕಾರಿ ಹೈಯರ್ ಸೆಕೆಂಡರಿ ಶಾಲೆಯಲ್ಲಿ ಜರುಗಿತು. ಪುಲ್ಲೂರು-ಪೆರಿಯಗ್ರಾಮಪಂಚಾಯತ್ ಅಧ್ಯಕ್ಷೆ ಶಾರದಾ ಎಸ್.ನಾಯರ್ ನೆರವೇರಿಸಿದರು.
         ಜಿಲ್ಲೆಯಲ್ಲಿ 35 ರೋಗಿಗಳು :
  ಜಿಲ್ಲೆಯಲ್ಲಿ 35 ಮಂದಿ ಕುಷ್ಠರೋಗದ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಇವರಲ್ಲಿ ಮೂವರು ಮಕ್ಕಳು ಮತ್ತು ಇತರ ರಾಜ್ಯಗಳ ಕಾರ್ಮಿಕರೂ ಸೇರಿದ್ದಾರೆ ಎಂದು ಜಿಲ್ಲಾ ಆರೋಗ್ಯ ಇಲಾಖೆಯ ವರದಿ ತಿಳಿಸುತ್ತದೆ. ರೋಗದಿಂದ ಅಂಗವಿಕಲತೆ ಹೊಂದಿರುವ ಮೂವರನ್ನೂ ಈ ವರ್ಷ ಜಿಲ್ಲೆಯಲ್ಲಿ ಪತ್ತೆಮಾಡಲಾಗಿದೆ ಎಂದು ವರದಿ ಸೂಚಿಸುತ್ತದೆ. ಈ ಬಾರಿಯ ಪಕ್ಷಾಚರಣೆ ಜಿಲ್ಲೆಯನ್ನು ಸಂಪೂರ್ಣ ಕುಷ್ಠರೋಗ ಮುಕ್ತಗೊಳಿಸುವ ಉದ್ದೇಶಹೊಂದಿದೆ.