ಬೆಂಕಿಗೆ ತುತ್ತಾದ ವಾಣಿಜ್ಯ ಹಡಗು: ಭಾರತೀಯ ಸೇನೆ ನೆರವು

ನವದೆಹಲಿ: 'ಪಲ್ಲಾವು ದೇಶದ ಧ್ವಜ ಹೊಂದಿದ 'ಎಂಟಿ ಯಿ ಛೆಂಗ್‌-6' ವಾಣಿಜ್ಯ ಹಡಗಿನ ಎಂಜಿನ್‌ನಲ್ಲಿ ಸೋಮವಾರ ದೊಡ್ಡ ಪ್ರಮಾಣದ ಬೆಂಕಿ ಕಾಣಿಸಿಕೊಂಡಿದ್ದು, ನೆರವಿಗಾಗಿ ಭಾರತೀಯ ನೌಕಾಪಡೆಯ ಹಡಗನ್ನು ನಿಯೋಜಿಸಲಾಗಿದೆ' ಎಂದು ಸೇನಾ ವಕ್ತಾರರು ತಿಳಿಸಿದ್ದಾರೆ.

ಗುಜರಾತ್‌ನ ಕಾಂಡ್ಲಾ ಬಂದರಿನ ಮುಖಾಂತರ ಒಮನ್‌ನ ಶಿನಾಸ್‌ನತ್ತ ತೆರಳುತ್ತಿದ್ದ ಹಡಗಿನಲ್ಲಿ ಭಾರತೀಯ ಮೂಲದ 14 ಮಂದಿ ಸಿಬ್ಬಂದಿ ಕೆಲಸ ಮಾಡುತ್ತಿದ್ದರು.

'ಭಾನುವಾರ ರಾತ್ರಿ ವೇಳೆ ಹಡಗಿನಿಂದ ನೆರವು ಯಾಚಿಸಿ ಕರೆಬಂದ ತಕ್ಷಣವೇ ಗಲ್ಫ್‌ ಆಫ್‌ ಒಮನ್‌ನಲ್ಲಿ ನಿಯೋಜಿಸಿದ್ದ 'ಐಎನ್‌ಎಸ್‌ ತಬರ್‌' ಅನ್ನು ರಕ್ಷಣಾ ಕಾರ್ಯಾಚರಣೆಗೆ ನಿಯೋಜಿಸಲಾಯಿತು' ಎಂದು ನೌಕಾಪಡೆ ವಕ್ತಾರರು ತಿಳಿಸಿದ್ದಾರೆ.

'ಹಡಗಿನಲ್ಲಿ ದೊಡ್ಡ ಪ್ರಮಾಣದಲ್ಲಿ ಅಗ್ನಿ ಅನಾಹುತ ಸಂಭವಿಸಿದ್ದು, ವಿದ್ಯುತ್‌ ಸಂಪರ್ಕ ಸಂಪೂರ್ಣವಾಗಿ ಕಡಿತಗೊಂಡಿದೆ. ಸೇನಾ ನೌಕೆಯಲ್ಲಿದ್ದ ಅಗ್ನಿಶಾಮಕ ತಂಡ ಹಾಗೂ ಹೆಲಿಕಾಪ್ಟರ್‌ ನೆರವಿನಿಂದ ಸಿಬ್ಬಂದಿಯನ್ನು ರಕ್ಷಿಸಲಾಗಿದೆ. 13 ಮಂದಿ ನೌಕಾಪಡೆ ಯೋಧರು ಹಾಗೂ 5 ಮಂದಿ ಸಿಬ್ಬಂದಿ ಬೆಂಕಿ ನಂದಿಸುವಲ್ಲಿ ನಿರತರಾಗಿದ್ದಾರೆ' ಎಂದು ಹೇಳಿದ್ದಾರೆ.