ರಾಜ್ಯದಲ್ಲಿ ಸಾವಿರಕ್ಕೂ ಹೆಚ್ಚು ಗ್ರಾಮ ಕಚೇರಿಗಳು ಸ್ಮಾರ್ಟ್ : ಕಂದಾಯ ಸಚಿವ ಕೆ. ರಾಜನ್

ಕಾಸರಗೋಡು: ರಾಜ್ಯದ 1666 ಗ್ರಾಮ ಕಚೇರಿಗಳಲ್ಲಿ ಸಾವಿರಕ್ಕೂ ಹೆಚ್ಚು ಗ್ರಾಮ ಕಚೇರಿಗಳು ಸೇವೆಗಳ ಜೊತೆಗೆ ಸ್ಮಾರ್ಟ್ ಆಗಿವೆ ಎಂದು ಕಂದಾಯ ಮತ್ತು ವಸತಿ ಸಚಿವ ಕೆ. ರಾಜನ್ ಹೇಳಿದರು. 

ಮಂಜೇಶ್ವರ ತಾಲ್ಲೂಕಿನ ಇಚ್ಲಂಗೋಡು ಸ್ಮಾರ್ಟ್ ವಿಲೇಜ್ ಕಚೇರಿ ಕಟ್ಟಡ ಸೇರಿದಂತೆ ರಾಜ್ಯದಲ್ಲಿ 27 ಸ್ಮಾರ್ಟ್ ವಿಲೇಜ್ ಕಚೇರಿ ಕಟ್ಟಡಗಳನ್ನು ಸಚಿವರು ಆನ್‍ಲೈನ್‍ನಲ್ಲಿ ಉದ್ಘಾಟಿಸಿ ಮಾತನಾಡಿದರು. 

ರಾಜ್ಯದಲ್ಲಿ 622 ಹೊಸ ಸ್ಮಾರ್ಟ್ ವಿಲೇಜ್ ಕಟ್ಟಡಗಳು ಅಸ್ತಿತ್ವಕ್ಕೆ ಬಂದಿವೆ. 407 ಗ್ರಾಮ ಕಚೇರಿಗಳ ನಿರ್ವಹಣೆಯೂ ನಡೆದಿದೆ. 263 ಸ್ಮಾರ್ಟ್ ವಿಲೇಜ್‍ಗಳ ನಿರ್ಮಾಣ ಕಾರ್ಯ ಪ್ರಗತಿಯಲ್ಲಿದೆ. ಗ್ರಾಮ ಕಚೇರಿಗಳ ಮೂಲಕ 21 ಸೇವೆಗಳು ಡಿಜಿಟಲ್ ಆಗಿವೆ. ಸಾರ್ವಜನಿಕರು ಮತ್ತು ಜನಪ್ರತಿನಿಧಿಗಳ ಬೆಂಬಲ ಪಡೆಯಲು ಗ್ರಾಮ ಮಟ್ಟದ ಜನಪರ ಸಮಿತಿಯನ್ನು ರಚಿಸಲಾಗಿದೆ ಎಂದು ಸಚಿವರು ಹೇಳಿದರು.

50 ಲಕ್ಷ ರೂ. ವೆಚ್ಚದಲ್ಲಿ ನಿರ್ಮಿಸಲಾದ ಇಚ್ಲಂಗೋಡು ಸ್ಮಾರ್ಟ್ ವಿಲೇಜ್ ಕಚೇರಿ ಕಟ್ಟಡವು 118.76 ಚದರ ಮೀಟರ್ ವಿಸ್ತೀರ್ಣದಲ್ಲಿ ವರಾಂಡಾ, ಗ್ರಾಮ ಅಧಿಕಾರಿಗಳ ಕೊಠಡಿ, ಕಚೇರಿ, ಸಹಾಯ ಕೇಂದ್ರ, ದಾಖಲೆ ಕೊಠಡಿ, ಊಟದ ಕೋಣೆ ಮತ್ತು ಶೌಚಾಲಯದಂತಹ ಸೌಲಭ್ಯಗಳನ್ನು ಹೊಂದಿದೆ. ಹೊಸ ಕಟ್ಟಡ ನಿರ್ಮಾಣದ ಜೊತೆಗೆ, ಕೊಳವೆ ಬಾವಿ, ವಿದ್ಯುದ್ದೀಕರಣ ಕೆಲಸ, ಲ್ಯಾನ್ ಸಂಪರ್ಕ ಕೆಲಸ, ಕಚೇರಿ ಕ್ಯುಬಿಕಲ್ ಕೆಲಸ, ಪೀಠೋಪಕರಣಗಳು ಮತ್ತು ನಾಮ ಫಲಕಗಳ ಅಳವಡಿಕೆ ಮತ್ತು ಸುತ್ತು ಗೋಡೆಯ ದುರಸ್ತಿ ಕೆಲಸವೂ ಈ ಕೆಲಸದಲ್ಲಿ ಸೇರಿವೆ. ಕಟ್ಟಡದ ನಿರ್ಮಾಣ ಕಾರ್ಯವನ್ನು ಜಿಲ್ಲಾ ನಿರ್ಮಾಣ ಕೇಂದ್ರ ನಿರ್ವಹಿಸಿತು.

ಶಾಸಕ ಎ.ಕೆ.ಎಂ. ಅಶ್ರಫ್ ಅಧ್ಯಕ್ಷತೆ ವಹಿಸಿದ್ದರು. ಜಿಲ್ಲಾ ನಿರ್ಮಾಣ ಕೇಂದ್ರದ ಪ್ರಧಾನ ವ್ಯವಸ್ಥಾಪಕ ಇ.ಪಿ. ರಾಜಮೋಹನ್ ವರದಿ ಮಂಡಿಸಿದರು. ಮಂಗಲ್ಪಾಡಿ ಗ್ರಾಮ ಪಂಚಾಯತಿ ಅಧ್ಯಕ್ಷ ಗೋಲ್ಡನ್ ಅಬ್ದುಲ್ ರಹಿಮಾನ್, ಜಿಲ್ಲಾ ಪಂಚಾಯತಿ ಸದಸ್ಯ ಅಜೀಜ್ ಕಳತ್ತೂರ್, ಬ್ಲಾಕ್ ಪಂಚಾಯತಿ ಸದಸ್ಯ ಅಜೀಜ್ ಮರಿಕೆ, ಮಂಗಲ್ಪಾಡಿ ಗ್ರಾಮ ಪಂಚಾಯತಿ ಸದಸ್ಯ ಕೆ.ಜಿ. ಬೀಫಾತಿಮಾ ಅಬೂಬಕರ್ ಮತ್ತು ರಾಜಕೀಯ ಪಕ್ಷದ ಪ್ರತಿನಿಧಿಗಳು ಮಾತನಾಡಿದರು. ಹೆಚ್ಚುವರಿ ಜಿಲ್ಲಾ ಮ್ಯಾಜಿಸ್ಟ್ರೇಟ್ ಪಿ.ಅಖಿಲ್ ಸ್ವಾಗತಿಸಿ, ಮಂಜೇಶ್ವರ ತಾಲೂಕು ತಹಶೀಲ್ದಾರ್ ಬಿ.ಸಜಿತ್ ವಂದಿಸಿದರು.