ಶರತ್‍ಲಾಲ್-ಕೃಪೇಶ್ ಸ್ಮಾರಕ- ಕಲೆ ಮತ್ತು ಕ್ರೀಡಾ ತರಬೇತಿ ಕೇಂದ್ರ: ನಿರ್ಮಾಣ ವೆಚ್ಚ ವಹಿಸಿಕೊಂಡ ಕರ್ನಾಟಕ ಕಾಂಗ್ರೆಸ್

ಕಾಸರಗೋಡು: ಪೆರಿಯ ಕಲ್ಲಿಯೋಟ್‍ನಲ್ಲಿ ಹತ್ಯೆಗೀಡಾದ ಯುವ ಕಾಂಗ್ರೆಸ್ ಕಾರ್ಯಕರ್ತರಾದ ಶರತ್‍ಲಾಲ್ ಮತ್ತು ಕೃಪೇಶ್ ಅವರ ಸ್ಮರಣಾರ್ಥ ನಿರ್ಮಿಸಲಾಗುವ ಅತ್ಯಾಧುನಿಕ ಕಲೆ ಮತ್ತು ಕ್ರೀಡಾ ತರಬೇತಿ ಕೇಂದ್ರದ ನಿರ್ಮಾಣ ವೆಚ್ಚವನ್ನು ಕರ್ನಾಟಕ ಕಾಂಗ್ರೆಸ್ ವಹಿಸಿಕೊಂಡಿದೆ. ಶರತ್‍ಲಾಲ್ ಮತ್ತು ಕೃಪೇಶ್ ಅವರ ಏಳನೇ ಹುತಾತ್ಮ ದಿನದ ಸಂದರ್ಭದಲ್ಲಿ ಕಲ್ಲಿಯೋಟ್‍ನಲ್ಲಿ ನಡೆದ ಸ್ಮರಣಾರ್ಥ ಕಾರ್ಯಕ್ರಮದಲ್ಲಿ ಕರ್ನಾಟಕ ಗೃಹ ಸಚಿವ ಜಿ. ಪರಮೇಶ್ವರ್ ಅವರು ಈ ಘೋಷಣೆ ಮಾಡಿದ್ದರು. 

ಯೋಜನೆಗೆ ಎಷ್ಟೇ ಹಣ ಬೇಕಾದರೂ ತಕ್ಷಣ ವಿನ್ಯಾಸ ಸಿದ್ಧಪಡಿಸಿ ನಿರ್ಮಾಣ ಕಾರ್ಯವನ್ನು ಪ್ರಾರಂಭಿಸಬೇಕು ಎಂದು ಅವರು ಸದಸ್ಯರಿಗೆ ಸೂಚಿಸಿದರು. ಕೇಂದ್ರದ ಸುಗಮ ಚಾಲನೆಗೆ ಆದಾಯವನ್ನು ಗಳಿಸಲು ಯೋಜನೆಯ ಭಾಗವಾಗಿ ವಾಣಿಜ್ಯ ಸಂಕೀರ್ಣವನ್ನು ನಿರ್ಮಿಸಬೇಕು ಎಂದು ಅವರು ಅಭಿಪ್ರಾಯಪಟ್ಟರು. ಇಂತಹ ಉಪಕ್ರಮಕ್ಕಾಗಿ ಏಳು ವರ್ಷ ಕಾಯಬೇಕಾಗಿರುವುದು ನೋವಿನ ಸಂಗತಿ ಎಂದು ಅವರು ಹೇಳಿದರು.

ಜಿಲ್ಲಾ ಕಾಂಗ್ರೆಸ್ ಸಮಿತಿಯು ಯೋಜಿಸುತ್ತಿರುವ ಈ ಯೋಜನೆಗಾಗಿ ಕಲ್ಲಿಯೋಟ್ ಪೇಟೆಯಲ್ಲಿ ಈಗಾಗಲೇ 12.75 ಸೆಂಟ್ ಭೂಮಿಯನ್ನು ಖರೀದಿಸಲಾಗಿದೆ. ಕಳೆದ ವರ್ಷದ ಸ್ಮರಣಾರ್ಥ ಸಭೆಯಲ್ಲಿ ಕರ್ನಾಟಕ ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ನೀಡಿದ 25 ಲಕ್ಷ ರೂಪಾಯಿಗಳನ್ನು ಬಳಸಿಕೊಂಡು ಈ ಭೂಮಿಯನ್ನು ಖರೀದಿಸಲಾಗಿದೆ. ಕಲ್ಲಿಯೋಟ್ ಗ್ರಾಮದ ಕಲೆ ಮತ್ತು ಕ್ರೀಡಾ ಕ್ಷೇತ್ರಗಳಲ್ಲಿ ಪ್ರಗತಿ ಸಾಧಿಸುವುದು ಶರತ್‍ಲಾಲ್ ಮತ್ತು ಕೃಪೇಶ್ ಅವರ ಮುಖ್ಯ ಗುರಿಯಾಗಿತ್ತು.

ಪ್ರತಿದಿನ ಸುಮಾರು ಐವತ್ತು ಮಕ್ಕಳಿಗೆ ಕ್ರೀಡಾ ತರಬೇತಿ ನೀಡುತ್ತಿದ್ದ ಕೃಪೇಶ್ ಮತ್ತು ನಾಟಕ ಮತ್ತು ಮೂಕಾಭಿನಯದಂತಹ ಕ್ಷೇತ್ರಗಳಲ್ಲಿ ಸಾಧನೆ ಮಾಡಿದ ಶರತ್‍ಲಾಲ್ ಅವರ ಕನಸುಗಳನ್ನು ಈ ಕೇಂದ್ರದ ಮೂಲಕ ನನಸಾಗಿಸುವುದು ಕೇಂದ್ರದ ಗುರಿಯಾಗಿದೆ. ಇಬ್ಬರ ಚೆಂಡಮೇಳ ಮತ್ತು ಮಕ್ಕಳಿಗಾಗಿ ಅವರು ಪ್ರಾರಂಭಿಸಿದ ಸಂಗೀತ ತರಬೇತಿ ಕೇಂದ್ರವು ಇಂದಿಗೂ ಸ್ಥಳೀಯರ ಮನಸ್ಸಿನಲ್ಲಿ ಅಚ್ಚಳಿಯದೆ ಉಳಿದಿದೆ.

ರಾಜಕೀಯ ದ್ವೇಷದಿಂದಾಗಿ ಯುವ ಕಾಂಗ್ರೆಸ್ ಕಾರ್ಯಕರ್ತರಾದ ಶರತ್‍ಲಾಲ್ ಮತ್ತು ಕೃಪೇಶ್ ಅವರನ್ನು 2009ರ ಫೆಬ್ರವರಿ 17 ರಂದು ಬರ್ಬರವಾಗಿ ಹತ್ಯೆ ಮಾಡಲಾಗಿತ್ತು.  ಹಂತಕರು ಕಲ್ಲಿಯೋಟ್ ಕುರಂಕರ ರಸ್ತೆಯಲ್ಲಿ ಬೈಕ್ ನಿಲ್ಲಿಸಿ ಅವರನ್ನು ಕಡಿದು ಕೊಂದಿದ್ದರು. ಪ್ರಕರಣದ 10 ಆರೋಪಿಗಳಿಗೆ ಸಿಬಿಐ ನ್ಯಾಯಾಲಯವು ಜೋಡಿ ಜೀವಾವಧಿ ಶಿಕ್ಷೆ ವಿಧಿಸಿತ್ತು. ಮಾಜಿ ಶಾಸಕ ಕೆ.ವಿ. ಕುಂಞÂ್ಞ ರಾಮನ್ ಸೇರಿದಂತೆ ನಾಲ್ವರಿಗೆ ಐದು ವರ್ಷಗಳ ಶಿಕ್ಷೆ ವಿಧಿಸಲಾಯಿತು, ಆದರೆ ನಂತರ ಹೈಕೋರ್ಟ್ ಅವರಿಗೆ ಜಾಮೀನು ನೀಡಿತು. ಆದಾಗ್ಯೂ, ಕೊಲೆಯ ಹಿಂದಿನ ಪಿತೂರಿಯಲ್ಲಿ ಭಾಗವಹಿಸಿದ ಅನೇಕರು ಇನ್ನೂ ಕಾನೂನಿನ ಹೊರಗಿದ್ದಾರೆ ಎಂದು ಕುಟುಂಬ ಮತ್ತು ಕಾಂಗ್ರೆಸ್ ನಾಯಕತ್ವ ಆರೋಪಿಸಿದೆ.