'ಜವಾಬ್ದಾರಿಯಿಂದ ಪ್ರಧಾನಿ ಮೋದಿ ನುಣುಚಿಕೊಂಡರು': ಸಂಸತ್ ಹೊರಗೆ ನರವಾಣೆ ಆತ್ಮಚರಿತ್ರೆ ಪ್ರದರ್ಶಿಸಿದ ರಾಹುಲ್ ಗಾಂಧಿ

ನವದೆಹಲಿ: 2020ರಲ್ಲಿ ನಡೆದ ಭಾರತ-ಚೀನಾ ಸಂಘರ್ಷದ ಸಮಯದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ಜವಾಬ್ದಾರಿಯನ್ನು ಕೈಬಿಟ್ಟು ನರವಾಣೆ ಅವರಿಗೆ ವಹಿಸಿದರು ಎಂದು ಬುಧವಾರ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಗಂಭೀರ ಆರೋಪ ಮಾಡಿದ್ದಾರೆ.

ಮಾಜಿ ಸೇನಾ ಮುಖ್ಯಸ್ಥ ಎಂಎಂ ನರವಾಣೆ ಅವರ 'ಬಿಡುಗಡೆಯಾಗದ ಆತ್ಮಚರಿತ್ರೆ'ಯನ್ನು ಉಲ್ಲೇಖಿಸಿ ಸಂಸತ್ ಭವನದ ಆವರಣದಲ್ಲಿ ಸುದ್ದಿಗಾರರನ್ನುದ್ದೇಶಿಸಿ ಮಾತನಾಡಿದ ರಾಹುಲ್ ಗಾಂಧಿ, 'ಕೇಂದ್ರ ಸರ್ಕಾರ ಬೇರೆ ರೀತಿಯಲ್ಲಿ ಹೇಳಿಕೊಂಡರೂ ಈ 'ಪುಸ್ತಕ' ಅಸ್ತಿತ್ವದಲ್ಲಿದೆ ಎಂದು ಭಾರತದ ಯುವಕರು ತಿಳಿದುಕೊಳ್ಳಬೇಕೆಂದು ಅವರು ಬಯಸುತ್ತಾರೆ ಎಂದು ಹೇಳಿದರು.

"ಈ ಪುಸ್ತಕ ಅಸ್ತಿತ್ವದಲ್ಲಿಲ್ಲ ಎಂದು ಸ್ಪೀಕರ್ ಹೇಳಿದ್ದಾರೆ, ಸರ್ಕಾರ ಅದು ಅಸ್ತಿತ್ವದಲ್ಲಿಲ್ಲ ಎಂದು ಹೇಳಿದೆ, ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಈ ಪುಸ್ತಕ ಅಸ್ತಿತ್ವದಲ್ಲಿಲ್ಲ ಎಂದು ಹೇಳಿದ್ದಾರೆ. ಭಾರತದ ಪ್ರತಿಯೊಬ್ಬ ಯುವಕರು ಈ ಪುಸ್ತಕ ಅಸ್ತಿತ್ವದಲ್ಲಿದೆ ಎಂದು ನೋಡಬೇಕು. ಲಡಾಖ್‌ನಲ್ಲಿ ಏನಾಯಿತು ಎಂಬುದರ ಸಂಪೂರ್ಣ ವಿವರವನ್ನು ನರವಾಣೆ ಬರೆದಿದ್ದಾರೆ ಎಂದು ರಾಹುಲ್ ಗಾಂಧಿ ಅವರು ಹೇಳಿದರು.

ಲೋಕಸಭೆಯಲ್ಲಿ ಈ "ಜ್ಞಾಪಕ" ದಿಂದ ಉಲ್ಲೇಖಿಸಲು ಸಾಧ್ಯವಿಲ್ಲ ಎಂದು ಅವರಿಗೆ ಹೇಳಲಾಗಿದೆ. ಮುಖ್ಯ ವಿಷಯವೆಂದರೆ ಪ್ರಧಾನಿ ಹೇಳಿದ್ದು, 'ಸೇನಾ ಮುಖ್ಯಸ್ಥ ಜನರಲ್ ನರವಾಣೆ ಅವರು ರಾಜನಾಥ್ ಸಿಂಗ್ ಅವರಿಗೆ ಕರೆ ಮಾಡಿ 'ಚೀನಾದ ಟ್ಯಾಂಕ್‌ಗಳು ಕೈಲಾಸ ಪರ್ವತದ ಮೇಲೆ ಬಂದಿವೆ. ನಾವು ಏನು ಮಾಡಬೇಕು? ಎಂದು ಕೇಳಿದ್ದಾರೆ. ಇದಕ್ಕೆ ರಾಜನಾಥ್ ಸಿಂಗ್ ಮೊದಲಿಗೆ ಅವರಿಗೆ ಉತ್ತರಿಸಲಿಲ್ಲ. ಅವರು (ನರಾವಣೆ) ಎಸ್ ಜೈಶಂಕರ್, ಎನ್‌ಎಸ್‌ಎ (ಅಜಿತ್ ದೋವಲ್) ಮತ್ತು ರಾಜನಾಥ್ ಸಿಂಗ್ ಅವರನ್ನು ಕೇಳಿದರು. ಆದರೆ ಉತ್ತರ ಸಿಗಲಿಲ್ಲ" ಎಂದು ರಾಹುಲ್ ಗಾಂಧಿ "ಜ್ಞಾಪಕ ಪತ್ರ" ಉಲ್ಲೇಖಿಸಿ ಹೇಳಿದರು.

ಪ್ರಧಾನಿಗೆ ಈ ಪುಸ್ತಕ ನೀಡುತ್ತೇನೆ

ಪ್ರಧಾನಿ ಮೋದಿ ಅವರಿಗೆ ಇಂದು ಲೋಕಸಭೆಗೆ ಬರಲು ಧೈರ್ಯವಿದೆ ಎಂದು ನಾನು ಭಾವಿಸುವುದಿಲ್ಲ. ಏಕೆಂದರೆ ಅವರು ಬಂದರೆ, ನಾನು ಈ ಪುಸ್ತಕವನ್ನು ಅವರಿಗೆ ಹಸ್ತಾಂತರಿಸುತ್ತೇನೆ. ಪ್ರಧಾನಿ ಮೋದಿ ಬಂದರೆ, ನಾನು ವೈಯಕ್ತಿಕವಾಗಿ ಹೋಗಿ ಈ ಪುಸ್ತಕವನ್ನು ನೀಡುತ್ತೇನೆ. ಇದರಿಂದ ಅವರು ಅದನ್ನು ಓದಬಹುದು ಮತ್ತು ದೇಶವು ಸತ್ಯವನ್ನು ತಿಳಿಯಬಹುದು" ಎಂದು ಹೇಳಿದರು.

'ದೇಶದ ಪ್ರತಿಯೊಬ್ಬನೂ ಈ ಪುಸ್ತಕ ನೋಡಬೇಕು'

ಅಂತೆಯೇ ರಾಹುಲ್ ಗಾಂಧಿ, "ಇದು ಪುಸ್ತಕವಲ್ಲ ಎಂದು ಸರ್ಕಾರ ಹೇಳುತ್ತಿದೆ. ಯಾವುದೇ ಪುಸ್ತಕ ಇಲ್ಲ ಎಂದು ಸ್ಪೀಕರ್ ಹೇಳಿದ್ದಾರೆ. ದೇಶದ ಪ್ರತಿಯೊಬ್ಬ ಯುವಕರು ಒಂದು ಪುಸ್ತಕವಿದೆ ಎಂಬುದನ್ನು ನೋಡಬೇಕು. ಇದು ನರವಾಣೆ ಅವರ ಪುಸ್ತಕವಾಗಿದ್ದು, ಅದರಲ್ಲಿ ಅವರು ಸಂಪೂರ್ಣವಾಗಿ ಬರೆದಿದ್ದಾರೆ ಎಂದು ಹೇಳಿದರು.

ಸೇನಾ ಮುಖ್ಯಸ್ಥರು ತಾವು ಒಂಟಿತನ ಅನುಭವಿಸುತ್ತಿದ್ದೇನೆ ಮತ್ತು ಇಡೀ ಸಂಸ್ಥೆಯಿಂದ ಕೈಬಿಡಲ್ಪಟ್ಟಿದ್ದೇನೆ ಎಂದು ಬರೆದಿದ್ದಾರೆ ಎಂದು ರಾಹುಲ್ ಗಾಂಧಿ ಹೇಳಿದರು.

ಎಕ್ಸ್ ನಲ್ಲಿ ಪೋಸ್ಟ್

ಇದೇ ವಿಚಾರವಾಗಿ ಎಕ್ಸ್ ನಲ್ಲಿ ಪೋಸ್ಟ್ ಮಾಡಿರುವ ರಾಹುಲ್ ಗಾಂಧಿ, 'ಇಂದು, ಪ್ರಧಾನಿ ಮೋದಿ ಸಂಸತ್ತಿಗೆ ಬಂದರೆ, ನಾನು ಅವರಿಗೆ ಪುಸ್ತಕವನ್ನು ಉಡುಗೊರೆಯಾಗಿ ನೀಡುತ್ತೇನೆ. ಈ ಪುಸ್ತಕವು ಯಾವುದೇ ವಿರೋಧ ಪಕ್ಷದ ನಾಯಕರದ್ದಲ್ಲ. ಈ ಪುಸ್ತಕವು ಯಾವುದೇ ವಿದೇಶಿ ಲೇಖಕರದ್ದಲ್ಲ. ಈ ಪುಸ್ತಕವು ದೇಶದ ಮಾಜಿ ಸೇನಾ ಮುಖ್ಯಸ್ಥ ಜನರಲ್ ನರವಾಣೆ ಅವರದ್ದು, ಆಶ್ಚರ್ಯಕರ ವಿಷಯವೆಂದರೆ, ಕ್ಯಾಬಿನೆಟ್ ಮಂತ್ರಿಗಳ ಪ್ರಕಾರ, ಈ ಪುಸ್ತಕ ಅಸ್ತಿತ್ವದಲ್ಲಿಲ್ಲ."

"ಚೀನಾ ಸೈನ್ಯವು ನಮ್ಮ ಗಡಿಯನ್ನು ಅಂತಹ ನಿರ್ಣಾಯಕ ಕ್ಷಣದಲ್ಲಿ ಪ್ರವೇಶಿಸಿದಾಗ, ಸೇನಾ ಮುಖ್ಯಸ್ಥರನ್ನು ಕಾಯುವಂತೆ ಮಾಡಲಾಯಿತು ಎಂದು ಈ ಪುಸ್ತಕವು ಸ್ಪಷ್ಟವಾಗಿ ಹೇಳುತ್ತದೆ. ನಿರ್ಧಾರ ತೆಗೆದುಕೊಳ್ಳುವ ಸಮಯ ಬಂದಾಗ, ಪ್ರಧಾನಿ "ನಿಮಗೆ ಸರಿ ಎನಿಸಿದ್ದನ್ನು ನೀವು ಮಾಡಿ" ಎಂದು ಹೇಳಿದರು" ಎಂದು ಗಾಂಧಿ ಹೇಳಿದರು.

"ಬೇರೆ ರೀತಿಯಲ್ಲಿ ಹೇಳುವುದಾದರೆ, ದೇಶದ ಭದ್ರತೆಗೆ ಅತ್ಯಂತ ಗಂಭೀರ ಬಿಕ್ಕಟ್ಟಿನಲ್ಲಿ, ಮೋದಿ ರಾಜಕೀಯ ಜವಾಬ್ದಾರಿಯಿಂದ ನುಣುಚಿಕೊಂಡರು. ದೇಶವು ಪ್ರಶ್ನೆಗಳನ್ನು ಕೇಳುತ್ತಿದೆ. ಸರ್ಕಾರವು ಆ ಪ್ರಶ್ನೆಗಳಿಗೆ ಉತ್ತರಿಸುವುದರಿಂದ ಓಡಿಹೋಗುತ್ತಿದೆ" ಎಂದು ರಾಹುಲ್ ಗಾಂಧಿ ಪೋಸ್ಟ್ ಮಾಡಿದ್ದಾರೆ.