ತೆರಿಗೆದಾರರಿಗೆ ಬಿಗ್ ಅಪ್‌ಡೇಟ್: 15G ಮತ್ತು 15H ಫಾರ್ಮ್‌ಗಳು ಇನ್ಮುಂದೆ ಇತಿಹಾಸ! ಹೊಸ 'ಫಾರ್ಮ್ 121' ಜಾರಿ; ಏನಿದರ ವಿಶೇಷತೆ?

ನವದೆಹಲಿ: ಬ್ಯಾಂಕ್ ಡೆಪಾಸಿಟ್ ಅಥವಾ ಇತರ ಹೂಡಿಕೆಗಳ ಮೇಲಿನ ಬಡ್ಡಿಗೆ ಟಿಡಿಎಸ್ (TDS) ಕಡಿತವಾಗದಂತೆ ತಡೆಯಲು ಸಲ್ಲಿಕೆಯಾಗುತ್ತಿದ್ದ ಫಾರ್ಮ್ 15G ಮತ್ತು 15H ಗೆ ಈಗ ವಿದಾಯ ಹೇಳಲಾಗಿದೆ. ಇವೆರಡರ ಬದಲಿಗೆ ಇನ್ನು ಮುಂದೆ ಒಂದೇ ಫಾರ್ಮ್ ಅಂದರೆ 'ಫಾರ್ಮ್ 121' (Form 121) ಅನ್ನು ಕೇಂದ್ರ ನೇರ ತೆರಿಗೆಗಳ ಮಂಡಳಿ (CBDT) ಜಾರಿಗೆ ತಂದಿದೆ.

ಈ ಮೊದಲು ಸಾಮಾನ್ಯ ನಾಗರಿಕರು 15G ಮತ್ತು ಹಿರಿಯ ನಾಗರಿಕರು 15H ಫಾರ್ಮ್ ಬಳಸುತ್ತಿದ್ದರು. ಆದರೆ ಈಗ ಗೊಂದಲ ನಿವಾರಿಸಲು ಎಲ್ಲರಿಗೂ ಅನ್ವಯವಾಗುವಂತೆ ಏಕೈಕ 'ಫಾರ್ಮ್ 121' ಅನ್ನು ಪರಿಚಯಿಸಲಾಗಿದೆ.

ಹೊಸ ಫಾರ್ಮ್ ಅನ್ನು ಸಂಪೂರ್ಣವಾಗಿ ಡಿಜಿಟಲ್ ರೂಪದಲ್ಲಿ ವಿನ್ಯಾಸಗೊಳಿಸಲಾಗಿದ್ದು, ಇದನ್ನು ಇ-ಫೈಲಿಂಗ್ ಪೋರ್ಟಲ್ ಮೂಲಕ ಸುಲಭವಾಗಿ ಸಲ್ಲಿಸಬಹುದು.

ಯಾರ ವಾರ್ಷಿಕ ಆದಾಯವು ತೆರಿಗೆ ಮಿತಿಗಿಂತ ಕಡಿಮೆ ಇದೆಯೋ (Basic Exemption Limit), ಅಂತಹವರು ತಮ್ಮ ಬಡ್ಡಿ ಆದಾಯದ ಮೇಲೆ ಬ್ಯಾಂಕುಗಳು ಟಿಡಿಎಸ್ ಕಡಿತ ಮಾಡದಂತೆ ತಡೆಯಲು ಈ ಫಾರ್ಮ್ ಸಲ್ಲಿಸಬೇಕಾಗುತ್ತದೆ.

ಈ ಫಾರ್ಮ್ ಮೂಲಕ ತೆರಿಗೆದಾರರು ತಮ್ಮ ಒಟ್ಟು ಆದಾಯ ತೆರಿಗೆ ಪಾವತಿಸುವ ವ್ಯಾಪ್ತಿಗೆ ಬರುವುದಿಲ್ಲ ಎಂದು ಸ್ವಯಂ ಘೋಷಣೆ ಮಾಡಿಕೊಳ್ಳಲು ಅವಕಾಶವಿದೆ.

ಸಾಮಾನ್ಯ ಮತ್ತು ಹಿರಿಯ ನಾಗರಿಕರಿಗೆ ಪ್ರತ್ಯೇಕ ಫಾರ್ಮ್‌ಗಳ ಅಗತ್ಯವಿಲ್ಲದ ಕಾರಣ ಆಯ್ಕೆಯಲ್ಲಿ ಆಗುತ್ತಿದ್ದ ತಪ್ಪುಗಳು ಇನ್ನು ಮುಂದೆ ಸಂಭವಿಸುವುದಿಲ್ಲ.

ಬ್ಯಾಂಕುಗಳು ಮತ್ತು ಹಣಕಾಸು ಸಂಸ್ಥೆಗಳು ಈ ಹೊಸ ಫಾರ್ಮ್ ಅನ್ನು ತಕ್ಷಣವೇ ಪ್ರಕ್ರಿಯೆಗೊಳಿಸಲು (Processing) ಡಿಜಿಟಲ್ ವ್ಯವಸ್ಥೆ ಅಳವಡಿಸಿಕೊಳ್ಳಲಾಗಿದೆ. ಹಸ್ತಚಾಲಿತವಾಗಿ ಫಾರ್ಮ್ ತುಂಬಿ ಬ್ಯಾಂಕಿಗೆ ಅಲೆಯುವ ಕೆಲಸ ತಪ್ಪಲಿದ್ದು, ಆನ್‌ಲೈನ್ ಮೂಲಕವೇ ಕ್ಷಣಾರ್ಧದಲ್ಲಿ ಕೆಲಸ ಮುಗಿಸಬಹುದು.

​ಆದಾಯ ತೆರಿಗೆ ಇಲಾಖೆಯ ಹೊಸ ನಿಯಮಗಳ ಪ್ರಕಾರ, ಏಪ್ರಿಲ್ 1, 2026 ರಿಂದ ಆರಂಭವಾಗುವ ಹೊಸ ಆರ್ಥಿಕ ವರ್ಷದಿಂದ ಈ ಬದಲಾವಣೆಗಳು ಪೂರ್ಣ ಪ್ರಮಾಣದಲ್ಲಿ ಜಾರಿಗೆ ಬರಲಿವೆ. ಅಲ್ಲಿಯವರೆಗೆ ಹಳೆಯ ಫಾರ್ಮ್‌ಗಳನ್ನು ಬಳಸಲು ಅವಕಾಶವಿದ್ದರೂ, ಹೊಸ ಹೂಡಿಕೆದಾರರು ಫಾರ್ಮ್ 121 ಗೆ ಒಗ್ಗಿಕೊಳ್ಳುವುದು ಉತ್ತಮ ಎಂದು ತೆರಿಗೆ ತಜ್ಞರು ಸಲಹೆ ನೀಡಿದ್ದಾರೆ.