ರಾಜ್ಯದಲ್ಲಿ ಅರ್ಧ ಗಂಟೆ ವಿದ್ಯುತ್ ಕಡಿತ ಇನ್ನು ಅಧಿಕೃತ: ಸಂಜೆ 6 ರಿಂದ 12 ರವರೆಗೆ ವಿದ್ಯುತ್ ಕಡಿತ ಮುಂದುವರಿಕೆಗೆ ನಿರ್ಧಾರ

ತಿರುವನಂತಪುರಂ: ರಾಜ್ಯದಲ್ಲಿ ಪ್ರತಿದಿನ ಅರ್ಧ ಗಂಟೆ ವಿದ್ಯುತ್ ಕಡಿತಕ್ಕೆ ನಿರ್ಧರಿಸಲಾಗಿದೆ. ಸಂಜೆ 6 ರಿಂದ ಮಧ್ಯರಾತ್ರಿ 12 ರವರೆಗೆ ವಿದ್ಯುತ್ ಕಡಿತಗೊಳಿಸಲು ಕೆ.ಎಸ್.ಇ.ಬಿ.ಯ ಉನ್ನತ ಮಟ್ಟದ ಸಭೆ ನಿರ್ಧರಿಸಿದೆ. ರಾಜ್ಯದಲ್ಲಿ ವಿದ್ಯುತ್ ಬಳಕೆ ಗಗನಕ್ಕೇರುತ್ತಿರುವ ಪರಿಸ್ಥಿತಿಯಲ್ಲಿ ನಿರ್ಬಂಧಗಳನ್ನು ಜಾರಿಗೊಳಿಸಲಾಗುತ್ತಿದೆ, ಅದೂ ಅಧಿಕೃತವಾಗಿ.  

ಪೀಕ್ ಅವರ್‍ನಲ್ಲಿ ಅತಿಯಾದ ಲೋಡ್ ಅನ್ನು ನಿಯಂತ್ರಿಸಲು 30 ನಿಮಿಷಗಳಿಗಿಂತ ಕಡಿಮೆ ಅವಧಿಯ ನಿರ್ಬಂಧಗಳನ್ನು ವಿಧಿಸಲು ಅಧಿಕಾರಿಗಳು ರಾಜ್ಯ ಲೋಡ್ ಡಿಸ್ಪ್ಯಾಚ್ ಕೇಂದ್ರದ ಮುಖ್ಯ ಎಂಜಿನಿಯರ್‍ಗೆ ಅನುಮತಿ ನೀಡಿದ್ದಾರೆ. 'ಪೀಕ್ ಲೋಡ್ ಮ್ಯಾನೇಜ್‍ಮೆಂಟ್' ಹೆಸರಿನಲ್ಲಿ ಈ ನಿಯಂತ್ರಣವನ್ನು ಜಾರಿಗೆ ತರಲಾಗುವುದು, 'ಲೋಡ್ ಶೆಡ್ಡಿಂಗ್' ಎಂಬ ಪದವನ್ನು ತೆಗೆದುಹಾಕಲಾಗುತ್ತದೆ. ಪ್ರತಿ ಪ್ರದೇಶದಲ್ಲಿ ಸುಮಾರು 15 ನಿಮಿಷದಿಂದ 30 ನಿಮಿಷಗಳವರೆಗೆ ವಿದ್ಯುತ್ ಕಡಿತಗೊಳ್ಳುವ ಸಾಧ್ಯತೆಯಿದೆ. ವಿದ್ಯುತ್ ಬೇಡಿಕೆಯಲ್ಲಿ ಕ್ರಮೇಣ ಹೆಚ್ಚಳವು ಪ್ರಸರಣ ಮತ್ತು ವಿತರಣಾ ವಲಯ ಮತ್ತು ಗ್ರಿಡ್‍ನ ಸುರಕ್ಷತೆಯ ಮೇಲೆ ಪರಿಣಾಮ ಬೀರದಂತೆ ನೋಡಿಕೊಳ್ಳುವುದು ಈ ಮುನ್ನೆಚ್ಚರಿಕೆ ಕ್ರಮವಾಗಿದೆ.

ಪ್ರಸ್ತುತ ಬಿಕ್ಕಟ್ಟಿಗೆ ಪ್ರಮುಖ ಕಾರಣವೆಂದರೆ, ಬೇಸಿಗೆಯ ತೀವ್ರ ಬಿಸಿಲಿನಿಂದಾಗಿ ರಾಜ್ಯದಲ್ಲಿ ವಿದ್ಯುತ್ ಬೇಡಿಕೆ ದಾಖಲೆಯ ಗರಿಷ್ಠ ಮಟ್ಟವನ್ನು ತಲುಪಿದೆ. ಹಲವೆಡೆ ತಾಪಮಾನವು 38 ಡಿಗ್ರಿ ಸೆಲ್ಸಿಯಸ್‍ಗೆ ತಲುಪಿರುವುದರಿಂದ, ಎಸಿ ಮತ್ತು ಫ್ಯಾನ್‍ಗಳ ಬಳಕೆ ಗಮನಾರ್ಹವಾಗಿ ಹೆಚ್ಚಾಗಿದೆ. ಇದರ ಜೊತೆಗೆ, ಕೇಂದ್ರೀಯ ಪೂಲ್‍ನಿಂದ ವಿದ್ಯುತ್ ಹಂಚಿಕೆಯಲ್ಲಿ ಸುಮಾರು 200 ಮೆಗಾವ್ಯಾಟ್‍ಗಳ ಕೊರತೆ ಮತ್ತು ಇಡುಕ್ಕಿ ಸೇರಿದಂತೆ ಪ್ರಮುಖ ಅಣೆಕಟ್ಟುಗಳಲ್ಲಿ ನೀರಿನ ಮಟ್ಟದಲ್ಲಿನ ಕುಸಿತವು ಬಿಕ್ಕಟ್ಟನ್ನು ಉಲ್ಬಣಗೊಳಿಸಿದೆ. ಕಳೆದ ಕೆಲವು ದಿನಗಳಿಂದ ರಾಜ್ಯದ ವಿವಿಧ ಭಾಗಗಳಲ್ಲಿ ಜಾರಿಯಲ್ಲಿರುವ ಅಘೋಷಿತ ನಿಬರ್ಂಧಗಳು ಈಗ ಅಧಿಕೃತವಾಗಿ ಮುಂದುವರಿಯಲಿವೆ ಎಂದು ಕೆಎಸ್‍ಇಬಿ ಸೂಚಿಸಿದೆ.

ವಿದ್ಯುತ್ ಬಿಕ್ಕಟ್ಟನ್ನು ನಿವಾರಿಸಲು ಸಾಧ್ಯವಾದಷ್ಟು ಸಹಕರಿಸುವಂತೆ ಕೆಎಸ್‍ಇಬಿ ಸಾರ್ವಜನಿಕರನ್ನು ವಿನಂತಿಸಿದೆ. ಸಂಜೆ 6 ರಿಂದ 12 ರವರೆಗೆ ವಿದ್ಯುತ್ ವಾಹನಗಳ ಚಾಜಿರ್ಂಗ್ ಅನ್ನು ತಪ್ಪಿಸಬೇಕು. ಎಸಿಯ ತಾಪಮಾನವನ್ನು 24 ಡಿಗ್ರಿ ಮತ್ತು 26 ಡಿಗ್ರಿಗಳ ನಡುವೆ ಹೊಂದಿಸಬೇಕು ಮತ್ತು ಅದರ ಬಳಕೆಯನ್ನು ಅಗತ್ಯ ಕೊಠಡಿಗಳಿಗೆ ಮಾತ್ರ ಸೀಮಿತಗೊಳಿಸಬೇಕು.

ಪೀಕ್ ಅವರ್‍ನಲ್ಲಿ ಇಂಡಕ್ಷನ್ ಕುಕ್ಕರ್‍ಗಳು, ವಾಷಿಂಗ್ ಮೆಷಿನ್‍ಗಳು, ಪಂಪ್ ಸೆಟ್‍ಗಳು, ಎಲೆಕ್ಟ್ರಿಕ್ ಹೀಟರ್‍ಗಳು ಮತ್ತು ಇಸ್ತ್ರಿ ಪೆಟ್ಟಿಗೆಗಳಂತಹ ಉಪಕರಣಗಳ ಬಳಕೆಯನ್ನು ಸಾಧ್ಯವಾದಷ್ಟು ತಪ್ಪಿಸಬೇಕು ಎಂದು ಕೆಎಸ್‍ಇಬಿ ಸಲಹೆ ನೀಡಿದೆ.