ಹಾರ್ಮುಝ್‌ ಜಲಸಂಧಿಯಲ್ಲಿ ಭಾರತೀಯ ಧ್ವಜ ಹೊಂದಿರುವ ಸೂಪರ್‌ ಟ್ಯಾಂಕರ್‌ಗಳ ಮೇಲೆ ದಾಳಿ : ವರದಿ

ನವದೆಹಲಿ: ಜಗತ್ತಿನ ಅತ್ಯಂತ ಪ್ರಮುಖ ತೈಲ ಮಾರ್ಗಗಳಲ್ಲಿ ಒಂದಾದ ಹಾರ್ಮುಝ್ ಜಲಸಂಧಿ ಪ್ರದೇಶದಲ್ಲಿ ಉದ್ವಿಗ್ನತೆ ಮತ್ತಷ್ಟು ತೀವ್ರಗೊಂಡಿದ್ದು, ನೌಕಾಸಂಚಾರ ಅಸ್ತವ್ಯಸ್ತವಾಗಿದೆ. ಶನಿವಾರ ಇರಾನಿನ ಗನ್‌ ಬೋಟ್‌ಗಳಿಂದ ನಡೆದ ಗುಂಡಿನ ದಾಳಿಯ ಹಿನ್ನೆಲೆಯಲ್ಲಿ, ಭಾರತೀಯ ಧ್ವಜ ಹೊಂದಿರುವ ಸೂಪರ್‌ ಟ್ಯಾಂಕರ್ ಸೇರಿದಂತೆ ಹಲವಾರು ಹಡಗುಗಳು ಹಿಂತಿರುಗಿದವು ಎಂದು ಅಂತರರಾಷ್ಟ್ರೀಯ ಮಾಧ್ಯಮಗಳು ವರದಿ ಮಾಡಿವೆ.

ಅಸೋಸಿಯೇಟೆಡ್ ಪ್ರೆಸ್ ಪ್ರಕಾರ, ಹಾರ್ಮುಝ್ ಮೂಲಕ ಸುಮಾರು 2 ಮಿಲಿಯನ್ ಬ್ಯಾರೆಲ್ ಇರಾಕಿ ಕಚ್ಚಾ ತೈಲವನ್ನು ಸಾಗಿಸುತ್ತಿದ್ದ ಭಾರತೀಯ ಟ್ಯಾಂಕರ್ ಮೇಲೆ ಗುಂಡಿನ ದಾಳಿ ನಡೆದಿದೆ. ದಾಳಿಯ ನಂತರ ಟ್ಯಾಂಕರ್ ದಿಕ್ಕು ಬದಲಿಸಿ ಹಿಂತಿರುಗಿದೆ.

ಯುಕೆ ಮ್ಯಾರಿಟೈಮ್ ಟ್ರೇಡ್ ಆಪರೇಷನ್ಸ್ (UKMTO) ಮಾಹಿತಿ ಪ್ರಕಾರ, ಇರಾನ್‌ ನ ರೆವಲ್ಯೂಷನರಿ ಗಾರ್ಡ್‌ ಗೆ ಸೇರಿದ ಎರಡು ಗನ್‌ ಬೋಟ್‌ಗಳು ಜಲಸಂಧಿ ದಾಟುತ್ತಿದ್ದ ಟ್ಯಾಂಕರ್‌ ಗಳ ಮೇಲೆ ಗುಂಡು ಹಾರಿಸಿವೆ. ದಾಳಿಯಲ್ಲಿ ಹಡಗು ಮತ್ತು ಸಿಬ್ಬಂದಿ ಸುರಕ್ಷಿತವಾಗಿದ್ದಾರೆ ಎಂದು ತಿಳಿದುಬಂದಿದ್ದರೂ, ಹಡಗಿನ ಗುರುತು ಅಥವಾ ಗಮ್ಯಸ್ಥಾನವನ್ನು ಅಧಿಕಾರಿಗಳು ಬಹಿರಂಗಪಡಿಸಿಲ್ಲ.

ಘಟನೆಯ ನಂತರ ಭಾರತೀಯ ಧ್ವಜ ಹೊಂದಿರುವ ಸೂಪರ್‌ ಟ್ಯಾಂಕರ್ ಸೇರಿ ಹಲವು ಹಡಗುಗಳು ತಮ್ಮ ಮಾರ್ಗವನ್ನು ಬದಲಿಸಿವೆ ಎಂದು TankerTrackers.com ತಿಳಿಸಿದೆ. ಇದೇ ವೇಳೆ, ಗ್ರೀಕ್ ಟ್ಯಾಂಕರ್‌ ಗಳೂ ದಿನದ ಆರಂಭದಲ್ಲೇ ಹಿಂತಿರುಗಿವೆ.

ಅಮೆರಿಕ-ಇರಾನ್ ಮಾತುಕತೆಗಳು ಇನ್ನೂ ಸ್ಪಷ್ಟ ಫಲಿತಾಂಶ ನೀಡದಿರುವುದು ಪರಿಸ್ಥಿತಿಯನ್ನು ಮತ್ತಷ್ಟು ಗೊಂದಲಕರವಾಗಿಸಿದೆ. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ನೇತೃತ್ವದ ಆಡಳಿತ ಕೈಗೊಂಡ 'ಆಪರೇಷನ್ ಎಪಿಕ್ ಫ್ಯೂರಿ' ಕ್ರಮ ಹಾಗೂ ಅದಕ್ಕೆ ಪ್ರತಿಯಾಗಿ ಇರಾನ್ ಕೈಗೊಂಡ ಕ್ರಮಗಳಿಂದ ಕಳೆದ ಏಳು ವಾರಗಳಿಂದ ಉದ್ವಿಗ್ನತೆ ಹೆಚ್ಚಾಗಿದೆ.

ಬ್ಲೂಮ್‌ಬರ್ಗ್ ವರದಿ ಪ್ರಕಾರ, ಟೆಹ್ರಾನ್‌ ನಿಂದ ಸ್ಪಷ್ಟ ಸಂದೇಶಗಳ ಕೊರತೆಯಿಂದ ಭಾರತೀಯ ಕಚ್ಚಾ ತೈಲ ಸಾಗಣೆ ಹಡಗುಗಳು ಜಾಗರೂಕರಾಗಿದ್ದು, ಹಾರ್ಮುಝ್ ಮಾರ್ಗವನ್ನು ತಾತ್ಕಾಲಿಕವಾಗಿ ತಪ್ಪಿಸುತ್ತಿವೆ. ಹಡಗು ಮಾಲೀಕರು ಈ ಮಾರ್ಗದ ಸುರಕ್ಷತೆ ಕುರಿತು ಆತಂಕ ವ್ಯಕ್ತಪಡಿಸಿದ್ದಾರೆ.

ರಾಯಿಟರ್ಸ್ ವರದಿ ಪ್ರಕಾರ, ಶನಿವಾರ ಕನಿಷ್ಠ ಎರಡು ವಾಣಿಜ್ಯ ಹಡಗುಗಳು ಗುಂಡಿನ ದಾಳಿಗೆ ಒಳಗಾಗಿವೆ. ಇದರಿಂದ ಜಗತ್ತಿನ ಅತ್ಯಂತ ಜನನಿಬಿಡ ತೈಲ ಕಾರಿಡಾರ್‌ ಗಳಲ್ಲಿ ಒಂದಾದ ಹಾರ್ಮುಝ್‌ ನಲ್ಲಿ ಸಂಚಾರ ತೀವ್ರವಾಗಿ ನಿರ್ಬಂಧಿತವಾಗಿದೆ.

ಇದೇ ವೇಳೆ, ಇಸ್ರೇಲ್-ಲೆಬನಾನ್ ನಡುವಿನ 10 ದಿನಗಳ ಕದನ ವಿರಾಮದ ನಂತರ ಭಾಗಶಃ ಒಪ್ಪಂದದ ನಿರೀಕ್ಷೆಗಳು ಮೂಡಿದ್ದರೂ, ಇತ್ತೀಚಿನ ಘಟನೆಗಳಿಂದ ಮತ್ತೆ ಅನಿಶ್ಚಿತತೆ ಹೆಚ್ಚಾಗಿದೆ.