ಕ್ಯಾನ್ಸರ್‌ ವಿರುದ್ಧ ಹೋರಾಡುತ್ತಲೇ ಭಾರತೀಯ ಮೂಲದ ಅಮೆರಿಕನ್ ಖ್ಯಾತ ಸಂಶೋಧಕಿ ರಚನಾ ಶ್ರಾಫ್ 47ನೇ ವಯಸ್ಸಿನಲ್ಲಿ ನಿಧನ

ಅರಿಜೋನಾ: ಕ್ಯಾನ್ಸರ್‌ ರೋಗಿಗಳಿಗೆ ಹೊಸ ಚಿಕಿತ್ಸಾ ಆಯ್ಕೆಗಳನ್ನು ಒದಗಿಸಲು ತಮ್ಮ ಬದುಕನ್ನೇ ಮುಡಿಪಾಗಿಟ್ಟಿದ್ದ ಭಾರತೀಯ ಮೂಲದ ಅಮೆರಿಕನ್ ಕ್ಯಾನ್ಸರ್ ಸಂಶೋಧಕಿ ಡಾ. ರಚನಾ ಶ್ರಾಫ್ (47) ನಿಧನರಾಗಿದ್ದಾರೆ. ಕ್ಯಾನ್ಸರ್‌ ಚಿಕಿತ್ಸೆಯಲ್ಲಿ ಅಂತರರಾಷ್ಟ್ರೀಯ ಖ್ಯಾತಿ ಗಳಿಸಿದ್ದ ಅವರು, ತಾವು ಸಂಶೋಧನೆ ನಡೆಸುತ್ತಿದ್ದ ಕಾಯಿಲೆಯ ಆಕ್ರಮಣಕಾರಿ ರೂಪದ ವಿರುದ್ಧ ಹೋರಾಡುತ್ತಲೇ ಕೊನೆಯುಸಿರೆಳೆದಿದ್ದಾರೆ. 

ಅರಿಜೋನಾ ವಿಶ್ವವಿದ್ಯಾಲಯದ ಕ್ಯಾನ್ಸರ್ ಕೇಂದ್ರದ ಸಹ ನಿರ್ದೇಶಕಿಯಾಗಿದ್ದ ಶ್ರಾಫ್, ಮೇದೋಜ್ಜೀರಕ ಗ್ರಂಥಿ, ಪಿತ್ತರಸ ನಾಳ ಹಾಗೂ ಇತರ ಹೆಪಟೊಬಿಲಿಯರಿ ಕ್ಯಾನ್ಸರ್‌ ಗಳ ಚಿಕಿತ್ಸೆಯಲ್ಲಿ ಪರಿಣತಿ ಹೊಂದಿದ್ದರು. ಅವರ ನಿಧನದ ಸುದ್ದಿಯನ್ನು ಅರಿಜೋನಾ ವಿಶ್ವವಿದ್ಯಾಲಯ ಪ್ರಕಟಿಸಿದ್ದು, ಅಮೆರಿಕನ್ ಸೊಸೈಟಿ ಆಫ್ ಕ್ಲಿನಿಕಲ್ ಆಂಕೊಲಾಜಿ (ASCO) ಕೂಡ ಸಂಶೋಧನೆ ಮತ್ತು ರೋಗಿಗಳ ಆರೈಕೆಗೆ ಅವರು ನೀಡಿದ ಕೊಡುಗೆಗಳನ್ನು ಸ್ಮರಿಸಿದೆ.

'ಪೀಪಲ್' ನಿಯತಕಾಲಿಕೆಯ ವರದಿಯ ಪ್ರಕಾರ, ಈ ವರ್ಷದ ಮೇ ತಿಂಗಳಲ್ಲಿ ಅವರ ದುಗ್ಧರಸ ಗ್ರಂಥಿಯೊಂದು ಊದಿಕೊಂಡಿರುವುದು ಗಮನಕ್ಕೆ ಬಂದಿತ್ತು. ಹೆಚ್ಚಿನ ಪರೀಕ್ಷೆಗಳಲ್ಲಿ ಕ್ಯಾನ್ಸರ್ ದೇಹದ ಇತರ ಭಾಗಗಳಿಗೂ ಹರಡಿರುವುದು ತಿಳಿದುಬಂದಿತ್ತು. ಬಳಿಕ ಅವರಿಗೆ ಮುಂದುವರಿದ ಹಂತದ ಅಡಿನೊಕಾರ್ಸಿನೋಮ ಇರುವುದು ಪತ್ತೆಯಾಗಿತ್ತು.

ರೋಗ ಪತ್ತೆಯಾದರೂ ಸಂಶೋಧನೆ ನಿಲ್ಲಿಸಲಿಲ್ಲ

ಕ್ಯಾನ್ಸರ್‌ ಪತ್ತೆಯಾದ ಬಳಿಕವೂ ಶ್ರಾಫ್ ತಮ್ಮ ಸಂಶೋಧನಾ ಕಾರ್ಯಗಳಿಂದ ಹಿಂದೆ ಸರಿಯಲಿಲ್ಲ. ಚಿಕಿತ್ಸೆಗೆ ಕಷ್ಟಕರವಾದ ಕ್ಯಾನ್ಸರ್‌ಗಳಿಂದ ಬಳಲುತ್ತಿರುವ ರೋಗಿಗಳಿಗೆ ಉತ್ತಮ ಚಿಕಿತ್ಸಾ ಆಯ್ಕೆಗಳನ್ನು ಒದಗಿಸುವ ಪ್ರಯತ್ನಗಳಿಗೆ ಬೆಂಬಲ ನೀಡುತ್ತಲೇ ಇದ್ದರು.

ಪಿತ್ತರಸ ನಾಳದ ಕ್ಯಾನ್ಸರ್‌ (ಕೋಲಾಂಜಿಯೊಕಾರ್ಸಿನೋಮ) ಮತ್ತು ಮೇದೋಜ್ಜೀರಕ ಗ್ರಂಥಿಯ ಕ್ಯಾನ್ಸರ್‌ ಗಳ ಕುರಿತ ಸಂಶೋಧನೆಯ ಮೂಲಕ ಅವರು ಅಂತರರಾಷ್ಟ್ರೀಯ ಮನ್ನಣೆ ಗಳಿಸಿದ್ದರು. ರೋಗಿಗಳಿಗೆ ಹೊಸ ಚಿಕಿತ್ಸಾ ವಿಧಾನಗಳನ್ನು ಒದಗಿಸುವ ಕ್ಲಿನಿಕಲ್ ಪ್ರಯೋಗಗಳ ಮಹತ್ವವನ್ನು ಪ್ರತಿಪಾದಿಸುತ್ತಿದ್ದ ಅವರು, ಯುವ ಸಂಶೋಧಕರಿಗೆ ಮಾರ್ಗದರ್ಶನವನ್ನೂ ನೀಡುತ್ತಿದ್ದರು.

2024ರಲ್ಲಿ ಮಾತನಾಡಿದ್ದ ಅವರು, ಚಿಕಿತ್ಸೆಗಾಗಿ ತಮ್ಮ ಬಳಿ ಬರುವ ಪ್ರತಿಯೊಬ್ಬ ರೋಗಿಗೂ ಸಾಧ್ಯವಾದರೆ ಕ್ಲಿನಿಕಲ್ ಪ್ರಯೋಗದ ಮೂಲಕ ಹೊಸ ಚಿಕಿತ್ಸೆಯನ್ನು ಪಡೆಯುವ ಅವಕಾಶ ಕಲ್ಪಿಸಬೇಕು ಎಂದು ಹೇಳಿದ್ದರು. ರೋಗಿಗಳಿಗೆ ಅತ್ಯಾಧುನಿಕ, ವಿಭಿನ್ನ ಮತ್ತು ನವೀನ ಚಿಕಿತ್ಸಾ ಆಯ್ಕೆಗಳನ್ನು ಒದಗಿಸುವುದು ತಮ್ಮ ಗುರಿ ಎಂದು ವಿವರಿಸಿದ್ದರು.

ಯುವ ವಿಜ್ಞಾನಿಗಳಿಗೆ ಪ್ರೋತ್ಸಾಹ

ತಮ್ಮ ಅನಾರೋಗ್ಯದ ನಡುವೆಯೂ ಭವಿಷ್ಯದ ಕ್ಯಾನ್ಸರ್ ಸಂಶೋಧನೆಗೆ ನೆರವಾಗುವ ಪ್ರಯತ್ನವನ್ನು ಶ್ರಾಫ್ ಮುಂದುವರಿಸಿದ್ದರು. ಉದಯೋನ್ಮುಖ ವಿಜ್ಞಾನಿಗಳನ್ನು ಪ್ರೋತ್ಸಾಹಿಸುವ ಉದ್ದೇಶದಿಂದ 'ಕಾಂಕರ್ ಕ್ಯಾನ್ಸರ್ - ರಚನಾ ಶ್ರಾಫ್, MD, MS, FASCO ಎಂಡೋವ್ಡ್ ಯಂಗ್ ಇನ್ವೆಸ್ಟಿಗೇಟರ್ ಪ್ರಶಸ್ತಿ'ಯನ್ನು ಸ್ಥಾಪಿಸಿದ್ದರು.

ಅರಿಜೋನಾ ವಿಶ್ವವಿದ್ಯಾಲಯದ ಪ್ರಕಾರ, ಈ ಉಪಕ್ರಮದ ಮೂಲಕ ಭವಿಷ್ಯದ ಕ್ಯಾನ್ಸರ್ ಸಂಶೋಧನೆಗಾಗಿ 1.35 ಮಿಲಿಯನ್ ಡಾಲರ್‌ ಗೂ ಹೆಚ್ಚು ನಿಧಿ ಸಂಗ್ರಹವಾಗಿದೆ.

2024ರಲ್ಲಿ ASCOಗೆ ನೀಡಿದ ಸಂದರ್ಶನದಲ್ಲಿ ತಮ್ಮ ವೃತ್ತಿಜೀವನದ ಧ್ಯೇಯವನ್ನು ಹಂಚಿಕೊಂಡಿದ್ದ ಅವರು, 'ನಿಮಗೆ ಸೂರ್ಯನ ಬೆಳಕು ಸಿಗದಿದ್ದರೆ, ಸೂರ್ಯನ ಬೆಳಕಾಗಿ' ಎಂಬ ಸಂದೇಶ ನೀಡಿದ್ದರು.

ಕ್ಯಾನ್ಸರ್ ಸಂಶೋಧನೆಗೆ ನೀಡಿದ ಕೊಡುಗೆ, ರೋಗಿಗಳ ಆರೈಕೆಯ ಬಗೆಗಿನ ಬದ್ಧತೆ ಮತ್ತು ಯುವ ವಿಜ್ಞಾನಿಗಳಿಗೆ ನೀಡಿದ ಪ್ರೋತ್ಸಾಹದ ಮೂಲಕ ಶ್ರಾಫ್ ತಮ್ಮದೇ ಆದ ಪರಂಪರೆಯನ್ನು ಬಿಟ್ಟುಹೋಗಿದ್ದಾರೆ.

ಅವರು ಪತಿ ಡಾ. ಪುನೀತ್ ಶ್ರಾಫ್, ಮಕ್ಕಳಾದ ಸಿಮ್ರಾನ್ ಮತ್ತು ಸಚಿನ್, ತಂದೆ ದೇವೇಂದ್ರ ತ್ರಿವೇದಿ, ತಾಯಿ ಡಾ. ಅಮಿತಾ ತ್ರಿವೇದಿ ಹಾಗೂ ಸಹೋದರಿ ನೀಮಾ ಸಾಹ್ನಿ ಅವರನ್ನು ಅಗಲಿದ್ದಾರೆ.