ಮೋದಿ-ಅದಾನಿ 'ಸ್ನೇಹ'ದ ಕುರಿತು ಸಾಕ್ಷ್ಯಚಿತ್ರ: ಆಕ್ರೋಶದ ಬೆನ್ನಲ್ಲೇ ವಿಡಿಯೋ ಡಿಲೀಟ್ ಮಾಡಿದ ರಾಜ್ ಠಾಕ್ರೆ!

ಮುಂಬೈ:  ಪ್ರಧಾನಿ ನರೇಂದ್ರ ಮೋದಿ ಮತ್ತು ಉದ್ಯಮಿ ಗೌತಮ್ ಅದಾನಿ ಕುರಿತ ವಿವಾದಾತ್ಮಕ ಸಾಕ್ಷ್ಯಚಿತ್ರವನ್ನು ಮಹಾರಾಷ್ಟ್ರ ನವನಿರ್ಮಾಣ ಸೇನಾ (MNS) ಮುಖ್ಯಸ್ಥ ರಾಜ್ ಠಾಕ್ರೆ ಸಾಮಾಜಿಕ ಮಾಧ್ಯಮದಿಂದ ಡಿಲೀಟ್ ಮಾಡಿದ್ದಾರೆ. ಮುಂಬೈ ಪೊಲೀಸ್ ಆಯುಕ್ತರ ಕೋರಿಕೆಯ ಮೇರೆಗೆ ಈ ಕ್ರಮಕೈಗೊಂಡಿರುವುದಾಗಿ ರಾಜ್ ಠಾಕ್ರೆ ಹೇಳಿದ್ದಾರೆ. ಹಾಟ್‌ಮೇಲ್ ಸಂಸ್ಥಾಪಕ ಸಬೀರ್ ಭಾಟಿಯಾ ನಿರ್ಮಿಸಿದ ಸಾಕ್ಷ್ಯಚಿತ್ರವು ಎಕ್ಸ್‌ನಲ್ಲಿ 4.8 ಮಿಲಿಯನ್‌ಗಿಂತಲೂ ಹೆಚ್ಚು ವೀಕ್ಷಣೆ ಪಡೆದಿತ್ತು.

ಮುಂಬೈ ಪೊಲೀಸರು ಸಬೀರ್ ಭಾಟಿಯಾ ಪೋಸ್ಟ್ ಮಾಡಿದ ಸಾಕ್ಷ್ಯಚಿತ್ರವನ್ನು ಹಂಚಿಕೊಂಡ 24 ಖಾತೆದಾರರಿಗೆ ಕಾನೂನು ನೋಟಿಸ್‌ಗಳನ್ನು ಕಳುಹಿಸಿದ್ದಾರೆ. ಇನ್ನು ಪೊಲೀಸರು ಒತ್ತಡದಲ್ಲಿ ರಾಜ್ ಠಾಕ್ರೆ ಅವರನ್ನು ಸಾಕ್ಷ್ಯಚಿತ್ರವನ್ನು ತೆಗೆದುಹಾಕುವಂತೆ ವಿನಂತಿಸಿದ್ದಾರೆಯೇ ಎಂದು ಎಂಎನ್‌ಎಸ್ ನಾಯಕರು ಪ್ರಶ್ನಿಸಿದ್ದಾರೆ. ಸಾರ್ವಜನಿಕರಿಗೆ ತಿಳಿಸಲು ಸಾಕ್ಷ್ಯಚಿತ್ರವನ್ನು ಪೋಸ್ಟ್ ಮಾಡಲಾಗಿದೆ ಎಂದು ರಾಜ್ ಠಾಕ್ರೆ ಬರೆದುಕೊಂಡಿದ್ದರು. ಅದಾನಿ ಮತ್ತು ಪ್ರಧಾನಿ ಮೋದಿ ಅವರ ದೀರ್ಘಕಾಲದ ಸ್ನೇಹದ ಬಗ್ಗೆ ಚಿತ್ರವು ವಿವರವಾದ ಮಾಹಿತಿಯನ್ನು ಒದಗಿಸುತ್ತದೆ ಎಂದು ಹೇಳಿದ್ದರು.

ಬೃಹನ್ ಮುಂಬೈ ಮಹಾನಗರ ಪಾಲಿಕೆ ಚುನಾವಣೆಗೂ ಮುನ್ನ 2026ರ ಜನವರಿಯಿಂದ ಪ್ರಧಾನಿ ಮೋದಿ ಜೊತೆ ಅದಾನಿಯವರ ನಿಕಟ ಸಂಬಂಧದ ಬಗ್ಗೆ ಸಾಕ್ಷ್ಯಚಿತ್ರ ನಿರ್ಮಿಸಲಾಗಿದೆ ರಾಜ್ ಠಾಕ್ರೆ ಹೇಳಿದ್ದಾರೆ. ಅದಾನಿ ಗ್ರೂಪ್ ಇಡೀ ದೇಶವನ್ನು ಹೇಗೆ ಸ್ವಾಧೀನಪಡಿಸಿಕೊಳ್ಳುವತ್ತ ಸಾಗುತ್ತಿದೆ ಎಂಬುದನ್ನು ಸಾಕ್ಷ್ಯಚಿತ್ರ ಎತ್ತಿ ತೋರಿಸಿದೆ. ಸಾಕ್ಷ್ಯಚಿತ್ರಕ್ಕೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ ಎಂದು ಅವರು ಹೇಳಿದ್ದಾರೆ. ಸಾಕ್ಷ್ಯಚಿತ್ರ ಸಂಬಂಧಿಸಿದ ವೀಡಿಯೊಗಳು ಇನ್ನೂ ಅವರ ಸಾಮಾಜಿಕ ಮಾಧ್ಯಮ ಖಾತೆಗಳಲ್ಲಿ ಲಭ್ಯವಿದೆ. ಆ ವೀಡಿಯೊಗಳ ಕೆಲವು ಭಾಗಗಳನ್ನು ಸಾಕ್ಷ್ಯಚಿತ್ರದಲ್ಲಿ ಸೇರಿಸಲಾಗಿದೆ ಎಂದು ಅವರು ಹೇಳಿದ್ದಾರೆ.

ಮುಂಬೈ ಪೊಲೀಸರ ಮೇಲೆ ಯಾವ ಒತ್ತಡವಿತ್ತು? ಇದು ಮುಂಬೈ ಪೊಲೀಸರ ಕೆಲಸವೇ? ಬಿಷ್ಣೋಯ್ ಗ್ಯಾಂಗ್ ಸದಸ್ಯರು ನಗರವನ್ನು ಹೇಗೆ ಪ್ರವೇಶಿಸುತ್ತಾರೆ ಎಂಬುದನ್ನು ಕಂಡುಹಿಡಿಯಲು ಅವರಿಗೆ ಸಮಯವಿಲ್ಲ. ಆದರೆ ಯಾರು ಯಾವ ವೀಡಿಯೊವನ್ನು ಪೋಸ್ಟ್ ಮಾಡಿದ್ದಾರೆಂದು ನೋಡಲು ಅವರಿಗೆ ಸಮಯವಿದೆ ಎಂದು ಎಂಎನ್ಎಸ್ ನಾಯಕರು ಆರೋಪಿಸಿದರು.

ಅಕ್ಟೋಬರ್ 18ರಂದು ಸಬೀರ್ ಭಾಟಿಯಾ ಪೋಸ್ಟ್ ಮಾಡಿದ ವಿವಾದಾತ್ಮಕ ಸಾಕ್ಷ್ಯಚಿತ್ರವನ್ನು ಹಂಚಿಕೊಂಡಿದ್ದ 24 ಎಕ್ಸ್ ಖಾತೆದಾರರಿಗೆ ಮುಂಬೈ ಪೊಲೀಸರು ಕಾನೂನು ಸೂಚನೆಗಳನ್ನು ಕಳುಹಿಸಿದ್ದಾರೆ. ಸಾಕ್ಷ್ಯಚಿತ್ರವು ಸಂಸ್ಥೆಯ ವಿರುದ್ಧ ಸುಳ್ಳು, ದಾರಿತಪ್ಪಿಸುವ ಮತ್ತು ಮಾನನಷ್ಟಕರ ಹೇಳಿಕೆಗಳು ಮತ್ತು ಆರೋಪಗಳನ್ನು ಒಳಗೊಂಡಿದೆ. ಇವುಗಳನ್ನು ಯಾವುದೇ ವಾಸ್ತವಿಕ ಅಥವಾ ಕಾನೂನು ಆಧಾರವಿಲ್ಲದೆ ಹರಡಲಾಗಿದೆ. ಇದು ಸಂಸ್ಥೆಯ ಖ್ಯಾತಿ, ವಿಶ್ವಾಸಾರ್ಹತೆ ಮತ್ತು ಸಾರ್ವಜನಿಕ ಇಮೇಜ್‌ಗೆ ನಿರಂತರ ಹಾನಿಯನ್ನುಂಟುಮಾಡುತ್ತಿದೆ ಎಂದು ನೋಟಿಸ್‌ನಲ್ಲಿ ಹೇಳಲಾಗಿದೆ.