ʼವೆಸ್ಟ್‌ ಬ್ಯಾಂಕ್‌ ನಲ್ಲಿ ನಿರ್ಮೂಲನೆ, ಗಾಝಾದಲ್ಲಿ ಮುಂದುವರಿದ ಜನಾಂಗೀಯ ಹತ್ಯೆʼ: ಇಸ್ರೇಲ್ ವಿರುದ್ಧ ವಿಶ್ವಸಂಸ್ಥೆ ಆಯೋಗದ ಗಂಭೀರ ಆರೋಪ

ಜೆನೀವಾ / ಜೆರುಸಲೆಮ್:  ಆಕ್ರಮಿತ ವೆಸ್ಟ್‌ ಬ್ಯಾಂಕ್‌ ನಲ್ಲಿ ಇಸ್ರೇಲ್‌ ಸೇನೆ ಹಾಗೂ ಆಡಳಿತವು ಸಾಮೂಹಿಕ ನಿರ್ಮೂಲನೆ (EXTERMINATION), ಹಿಂಸೆ ಮತ್ತು ಅತ್ಯಾಚಾರದಂತಹ ಮಾನವೀಯತೆಯ ವಿರುದ್ಧದ ಅಪರಾಧಗಳನ್ನು ಎಸಗಿದೆ. ಅಷ್ಟೇ ಅಲ್ಲದೆ, ಅಮೆರಿಕದ ಮಧ್ಯಸ್ಥಿಕೆಯಲ್ಲಿ ಏರ್ಪಟ್ಟ ಕದನ ವಿರಾಮ ಜಾರಿಯಲ್ಲಿದ್ದರೂ ಗಾಝಾದಲ್ಲಿ 'ಜನಾಂಗೀಯ ಹತ್ಯೆ'ಯನ್ನು (GENOCIDE) ಮುಂದುವರಿಸಿದೆ ಎಂದು ವಿಶ್ವಸಂಸ್ಥೆಯ ತನಿಖಾ ಆಯೋಗವೊಂದು ನೇರ ಆರೋಪ ಮಾಡಿದೆ.

ಆಕ್ರಮಿತ ಫೆಲೆಸ್ತೀನ್ ಭೂಪ್ರದೇಶದ ಕುರಿತಾದ ವಿಶ್ವಸಂಸ್ಥೆಯ ಸ್ವತಂತ್ರ ಅಂತಾರಾಷ್ಟ್ರೀಯ ತನಿಖಾ ಆಯೋಗವು ಅ. 26ರಂದು ಈ ಸಮಗ್ರ ವರದಿಯನ್ನು ಬಿಡುಗಡೆ ಮಾಡಿದೆ. ಇಸ್ರೇಲ್‌ ನ ಸಾರ್ವತ್ರಿಕ ಚುನಾವಣೆಯ ಮುನ್ನಾದಿನವೇ ಪ್ರಕಟಗೊಂಡಿರುವ ಈ ವರದಿಯು, 2023ರ ಅಕ್ಟೋಬರ್ 7ರಿಂದ 2026ರ ಸೆಪ್ಟೆಂಬರ್ ಅಂತ್ಯದವರೆಗೆ ಸರಕಾರಿ ಪಡೆಗಳು ನಡೆಸಿದ ಹತ್ಯೆಗಳು ಹಾಗೂ ದೈಹಿಕ ಮತ್ತು ಮಾನಸಿಕ ದೌರ್ಜನ್ಯಗಳನ್ನು ಕೂಲಂಕಷವಾಗಿ ಪರಿಶೀಲಿಸಿದೆ.

ವೆಸ್ಟ್‌ ಬ್ಯಾಂಕ್‌ ನಲ್ಲಿ ಭೀಕರ ಪರಿಸ್ಥಿತಿ: ವರದಿಯ ಮುಖ್ಯಾಂಶಗಳು

1967ರಿಂದ ಇಸ್ರೇಲ್ ಆಕ್ರಮಣದಲ್ಲಿರುವ ವೆಸ್ಟ್‌ ಬ್ಯಾಂಕ್‌ನಲ್ಲಿ, 2023ರ ಅಕ್ಟೋಬರ್ 7ರಂದು ದಕ್ಷಿಣ ಇಸ್ರೇಲ್ ಮೇಲೆ ಹಮಾಸ್ ನೇತೃತ್ವದಲ್ಲಿ ನಡೆದ ದಾಳಿಯ ಬಳಿಕ ಪರಿಸ್ಥಿತಿ ಅತ್ಯಂತ ಗಂಭೀರವಾಗಿ ಹದಗೆಟ್ಟಿದೆ ಎಂದು ಆಯೋಗ ತಿಳಿಸಿದೆ. ಅಲ್ಲಿನ ನಾಗರಿಕರ ಮೇಲೆ ಇಸ್ರೇಲ್ ಸೇನಾ ಕಾರ್ಯಾಚರಣೆಗಳು ಹಾಗೂ ಯಹೂದಿ ವಲಸಿಗರ (settlers) ನಿರಂತರ ಹಿಂಸಾಚಾರವು 'ವ್ಯಾಪಕ ಮತ್ತು ವ್ಯವಸ್ಥಿತ ದಾಳಿ'ಯ ಸ್ವರೂಪ ಪಡೆದುಕೊಂಡಿದೆ. ಹಮಾಸ್ ದಾಳಿಗೆ ಪ್ರತಿಯಾಗಿ ವೆಸ್ಟ್‌ ಬ್ಯಾಂಕ್‌ ನ ಜನತೆಯನ್ನು 'ಸಾಮೂಹಿಕವಾಗಿ ಶಿಕ್ಷಿಸುವ' (collective punishment) ದುರುದ್ದೇಶವನ್ನು ಇಸ್ರೇಲ್ ಅಧಿಕಾರಿಗಳು ಹೊಂದಿದ್ದಾರೆ ಎಂದು ವರದಿ ಬೆಟ್ಟುಮಾಡಿದೆ.

"ಇಸ್ರೇಲಿ ಅಧಿಕಾರಿಗಳು ಮತ್ತು ಸಶಸ್ತ್ರ ಪಡೆಗಳು ವೆಸ್ಟ್‌ ಬ್ಯಾಂಕ್‌ ನಲ್ಲಿ ಸಾಮೂಹಿಕ ನಿರ್ಮೂಲನೆ, ಚಿತ್ರಹಿಂಸೆ, ಅತ್ಯಾಚಾರ ಸೇರಿದಂತೆ ಲೈಂಗಿಕ ದೌರ್ಜನ್ಯಗಳಂತಹ ಮಾನವೀಯತೆಯ ವಿರುದ್ಧದ ಅಪರಾಧಗಳನ್ನು ಎಸಗಿವೆ. ಜೊತೆಗೆ ರಾಷ್ಟ್ರೀಯತೆ, ಜನಾಂಗ ಮತ್ತು ಜನಾಂಗೀಯತೆಯ ಆಧಾರದ ಮೇಲೆ ತಾರತಮ್ಯದ ದಮನಕಾರಿ ನೀತಿಯನ್ನು ಅನುಸರಿಸಿವೆ" ಎಂದು ವರದಿಯಲ್ಲಿ ಸ್ಪಷ್ಟವಾಗಿ ದಾಖಲಿಸಲಾಗಿದೆ.

ವಾಯುದಾಳಿಗಳ ಭಾರಿ ಹೆಚ್ಚಳ ಮತ್ತು ನಿರ್ಮೂಲನಾ ಕಾರ್ಯತಂತ್ರ

ವೆಸ್ಟ್‌ ಬ್ಯಾಂಕ್ ವ್ಯಾಪ್ತಿಯಲ್ಲಿ ಇಸ್ರೇಲ್ ನಡೆಸುತ್ತಿರುವ ವಾಯುದಾಳಿಗಳಲ್ಲಿ ತೀವ್ರ ಏರಿಕೆಯಾಗಿರುವುದನ್ನು ಅಂಕಿಅಂಶಗಳ ಸಹಿತ ಆಯೋಗ ವಿವರಿಸಿದೆ. 2008ರಿಂದ 2023ರ ಅಕ್ಟೋಬರ್ 6ರವರೆಗಿನ ಅವಧಿಯಲ್ಲಿ ವಾಯುದಾಳಿಗೆ ಕೇವಲ ಆರು ಫೆಲಸ್ತೀನಿಯರು ಬಲಿಯಾಗಿದ್ದರೆ, 2023ರ ಅಕ್ಟೋಬರ್ 7ರಿಂದ 2026ರ ಸೆಪ್ಟೆಂಬರ್ 30ರವರೆಗಿನ ಅವಧಿಯಲ್ಲಿ 254 ಮಂದಿ ವಾಯುದಾಳಿಗೆ ಪ್ರಾಣ ಕಳೆದುಕೊಂಡಿದ್ದಾರೆ.

ಈ ಕುರಿತು ಮಾತನಾಡಿದ ಆಯೋಗದ ಅಧ್ಯಕ್ಷ ಜಸ್ಟಿಸ್ ಎಸ್.ಮುರಳೀಧರ್, "ಫೆಲೆಸ್ತೀನ್ ನಾಗರಿಕರನ್ನು ಉದ್ದೇಶಪೂರ್ವಕವಾಗಿ ಹತ್ಯೆ ಮಾಡುವುದು, ಗಾಯಗೊಳಿಸುವುದು ಮತ್ತು ಮನೆಗಳನ್ನು ಧ್ವಂಸಗೊಳಿಸುವುದು ಹಾಗೂ ಇದರ ಹೊಣೆಯನ್ನು ನಿರಂತರವಾಗಿ ನಿರಾಕರಿಸುತ್ತಿರುವುದು ಇಸ್ರೇಲ್‌ ನ ವಿಶಾಲ ಕಾರ್ಯತಂತ್ರದ ಭಾಗವಾಗಿದೆ. ಫೆಲೆಸ್ತೀನ್ ಜನರನ್ನು ಸರ್ವನಾಶ ಮಾಡಿ, ಅವರ ನೆಲದಿಂದ ಒಕ್ಕಲೆಬ್ಬಿಸಿ, ಅಲ್ಲಿನ ಜೀವನ ಪರಿಸ್ಥಿತಿಯನ್ನು ಬದುಕಲು ಅಸಾಧ್ಯವಾಗಿಸುವುದೇ ಇದರ ಹಿಂದಿನ ಹುನ್ನಾರ" ಎಂದು ಆಪಾದಿಸಿದ್ದಾರೆ.

"ಗಾಝಾದಲ್ಲಿ ಇಸ್ರೇಲ್ ತನ್ನ ಪ್ರಾದೇಶಿಕ ನಿಯಂತ್ರಣವನ್ನು ವಿಸ್ತರಿಸುತ್ತಿದ್ದು, ಇಸ್ರೇಲ್ ನಿಯಂತ್ರಿತ ಪ್ರದೇಶಗಳನ್ನು ಗುರುತಿಸುವ 'ಯೆಲ್ಲೋ ಲೈನ್' ಬಳಿ ಬರುವ ಅಥವಾ ಅದನ್ನು ದಾಟುವ ಫೆಲೆಸ್ತೀನ್ ನಾಗರಿಕರ ಮೇಲೆ ನಿರಂತರ ಹಲ್ಲೆ ಮತ್ತು ಹತ್ಯೆಗಳು ನಡೆಯುತ್ತಿವೆ" ಎಂದೂ ಅವರು ತಿಳಿಸಿದ್ದಾರೆ.

ವರದಿಯನ್ನು ತಿರಸ್ಕರಿಸಿದ ಇಸ್ರೇಲ್‌

ವಿಶ್ವಸಂಸ್ಥೆಯ ಈ ವರದಿಯನ್ನು ಇಸ್ರೇಲ್ ಸಾರಾಸಗಟಾಗಿ ತಿರಸ್ಕರಿಸಿದೆ. ಜೆನೀವಾದಲ್ಲಿರುವ ಇಸ್ರೇಲ್ ರಾಯಭಾರ ಕಚೇರಿಯು ಪ್ರತಿಕ್ರಿಯಿಸಿ, "ಇದು ಇಸ್ರೇಲ್ ದೇಶವನ್ನು ರಾಕ್ಷಸೀಕರಿಸಲು ಮತ್ತು ಅದರ ಅಸ್ತಿತ್ವವನ್ನೇ ಅಪರಾಧವೆಂದು ಬಿಂಬಿಸಲು ಆಯೋಗವು ನಡೆಸುತ್ತಿರುವ ಸುಳ್ಳು ಮಾಹಿತಿ ಅಭಿಯಾನದ ಭಾಗವಾಗಿದೆ" ಎಂದು ಕಿಡಿಕಾರಿದೆ. ಅಂತರರಾಷ್ಟ್ರೀಯ ಸಮುದಾಯವು ಇಂತಹ ತಿರುಚಿದ ಅಂಶಗಳನ್ನು ತಳ್ಳಿಹಾಕಬೇಕು, ಆಯೋಗದ ವರದಿಯನ್ನು ತಿರಸ್ಕರಿಸಬೇಕು ಮತ್ತು ತಕ್ಷಣವೇ ಈ ಆಯೋಗವನ್ನು ವಿಸರ್ಜಿಸಬೇಕೆಂದು ಇಸ್ರೇಲ್ ಆಗ್ರಹಿಸಿದೆ.

ಗಾಝಾದಲ್ಲಿ ಮುಂದುವರಿದ ಕದನ ಮತ್ತು ನರಮೇಧ

ವಿಶ್ವಸಂಸ್ಥೆಯ ಅಧಿಕೃತ ನಿಲುವನ್ನು ಪ್ರತಿನಿಧಿಸದಿದ್ದರೂ, ಈ ಮೂವರು ಸದಸ್ಯರ ಸ್ವತಂತ್ರ ಆಯೋಗವು 2025ರ ಸೆಪ್ಟೆಂಬರ್‌ ನಲ್ಲೇ ಇಸ್ರೇಲ್ ಗಾಝಾದಲ್ಲಿ ಜನಾಂಗೀಯ ಹತ್ಯೆ ಎಸಗಿದೆ ಎಂಬ ತೀರ್ಮಾನಕ್ಕೆ ಬಂದಿತ್ತು. ಇಸ್ರೇಲ್ ಇದನ್ನು ಸಂಪೂರ್ಣವಾಗಿ ತಳ್ಳಿಹಾಕಿತ್ತು. ಆದರೆ, ಕಳೆದ ಅಕ್ಟೋಬರ್‌ ನಲ್ಲಿ ಅಮೆರಿಕದ ಮಧ್ಯಸ್ಥಿಕೆಯಲ್ಲಿ ಕದನ ವಿರಾಮ ಏರ್ಪಟ್ಟಿದ್ದರೂ, ಫೆಲೆಸ್ತೀನ್ ಜನರನ್ನು ಸಂಪೂರ್ಣವಾಗಿ ಅಥವಾ ಭಾಗಶಃ ನಾಶಪಡಿಸುವ ಉದ್ದೇಶದಿಂದ ಇಸ್ರೇಲ್ ಪಡೆಗಳು ಗಾಝಾದಲ್ಲಿ ಮಾರಕ ಕೃತ್ಯಗಳನ್ನು ಮುಂದುವರಿಸಿವೆ ಎಂದು ಆಯೋಗದ ಹೊಸ ವರದಿ ಹೇಳಿದೆ.

ಗಾಝಾದ ಆರೋಗ್ಯ ಸಚಿವಾಲಯದ ಪ್ರಕಾರ, ಈ ಭೀಕರ ಯುದ್ಧದಲ್ಲಿ ಈವರೆಗೆ ಕನಿಷ್ಠ 74,500ಕ್ಕೂ ಹೆಚ್ಚು ಜನರು ಮೃತಪಟ್ಟಿದ್ದು, ಬಹುತೇಕ ಇಡೀ ಜನಸಂಖ್ಯೆಯೇ ನಿರಾಶ್ರಿತವಾಗಿದೆ. ಸೋಮವಾರವೂ ಗಾಝಾದಾದ್ಯಂತ ಇಸ್ರೇಲ್ ನಡೆಸಿದ ವಾಯುದಾಳಿಯಲ್ಲಿ ಏಳು ವರ್ಷದ ಹೆಣ್ಣುಮಗು ಸೇರಿದಂತೆ ಕನಿಷ್ಠ ಐವರು ಫೆಲೆಸ್ತೀನಿಯರು ಮೃತಪಟ್ಟಿದ್ದಾರೆ.

ಫೆಲೆಸ್ತೀನ್ ಪ್ರಾಧಿಕಾರದ ಮೇಲೆಯೂ ಆಕ್ಷೇಪ

ವರದಿಯು ಫೆಲೆಸ್ತೀನ್ ಭದ್ರತಾ ಪಡೆಗಳು ಎಸಗಿರುವ ಲೋಪಗಳನ್ನೂ ಎತ್ತಿ ತೋರಿಸಿದೆ. ಫೆಲೆಸ್ತೀನ್ ಪ್ರಾಧಿಕಾರವು (ಪಿಎ) ಭಿನ್ನಾಭಿಪ್ರಾಯ ವ್ಯಕ್ತಪಡಿಸುವ ನಾಗರಿಕರನ್ನು ಗುರಿಯಾಗಿಸಿಕೊಂಡಿದೆ ಎಂದು ಆಯೋಗ ತಿಳಿಸಿದೆ. ಪತ್ರಕರ್ತರು ಮತ್ತು ಮಾನವ ಹಕ್ಕುಗಳ ಕಾರ್ಯಕರ್ತರ ಹತ್ಯೆ ಹಾಗೂ ಹಲ್ಲೆಗಳಿಂದಾಗಿ ಅಲ್ಲಿನ ನಾಗರಿಕ ಸಮಾಜದ ಸ್ವತಂತ್ರ ಕಾರ್ಯವ್ಯಾಪ್ತಿ ದಿನೇದಿನೇ ಕಿರಿದಾಗುತ್ತಿದೆ ಎಂದು ವರದಿ ಉಲ್ಲೇಖಿಸಿದೆ.

2021ರಲ್ಲಿ ವಿಶ್ವಸಂಸ್ಥೆಯ ಮಾನವ ಹಕ್ಕುಗಳ ಮಂಡಳಿಯಿಂದ ರಚಿಸಲ್ಪಟ್ಟ ಈ ಆಯೋಗವನ್ನು ಕಳೆದ ವರ್ಷ ನವೆಂಬರ್‌ವರೆಗೆ ಮುನ್ನಡೆಸಿದ್ದ ದಕ್ಷಿಣ ಆಫ್ರಿಕಾದ ಹೈಕೋರ್ಟ್‌ನ ಮಾಜಿ ನ್ಯಾಯಮೂರ್ತಿ ನವಿ ಪಿಳ್ಳೈ ಅವರಿಗೆ ಈ ತಿಂಗಳು (ಅಕ್ಟೋಬರ್ 2026) ನೊಬೆಲ್ ಶಾಂತಿ ಪುರಸ್ಕಾರ ಲಭಿಸಿದೆ.

ಹೆಬ್ರಾನ್‌ನಲ್ಲಿ ಬಿಗಿ ದಿಗ್ಬಂಧನ: ಜನಾಂಗೀಯ ನಿರ್ಮೂಲನೆಯ ಆತಂಕ

ಕಳೆದ ವಾರ ಹೆಬ್ರಾನ್ ನಗರದ ಸಮೀಪ ನಡೆದ ಗುಂಡಿನ ದಾಳಿಯ ಬೆನ್ನಲ್ಲೇ ಇಸ್ರೇಲ್ ಪಡೆಗಳು ಅಲ್ಲಿ ತೀವ್ರ ದಮನಕಾರಿ ಕಾರ್ಯಾಚರಣೆ ಆರಂಭಿಸಿವೆ. ಶುಕ್ರವಾರದಿಂದಲೇ ಹೆಬ್ರಾನ್ ನಗರಕ್ಕೆ ಬೀಗ ಜಡಿದಿರುವ ಇಸ್ರೇಲ್, ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಅವರ ನಿರ್ದೇಶನದಂತೆ ಈ ದಿಗ್ಬಂಧನವನ್ನು ಇಡೀ ವೆಸ್ಟ್‌ ಬ್ಯಾಂಕ್‌ಗೆ ವಿಸ್ತರಿಸಲು ಯೋಜಿಸಿದೆ.

ಈ ಬೆಳವಣಿಗೆಯನ್ನು ವಿಶ್ವಸಂಸ್ಥೆಯ ಮಾನವ ಹಕ್ಕುಗಳ ಹೈಕಮಿಷನರ್ ವೋಲ್ಕರ್ ಟರ್ಕ್ ತೀವ್ರವಾಗಿ ಖಂಡಿಸಿದ್ದಾರೆ. ಬಡಾವಣೆಗಳನ್ನು ಖಾಲಿ ಮಾಡಿಸುವ ಮತ್ತು ನಾಮಾವಶೇಷ ಮಾಡುವ ಇಸ್ರೇಲ್‌ನ ಬೆದರಿಕೆಗಳು 'ಜನಾಂಗೀಯ ನಿರ್ಮೂಲನೆ'ಯ (ethnic cleansing) ಗಂಭೀರ ಆತಂಕವನ್ನು ಹುಟ್ಟುಹಾಕಿವೆ ಎಂದು ಅವರು ಎಚ್ಚರಿಸಿದ್ದಾರೆ. ಈ ದಿಗ್ಬಂಧನದಿಂದಾಗಿ ಈಗಾಗಲೇ 2,000ಕ್ಕೂ ಹೆಚ್ಚು ಫೆಲೆಸ್ತೀನ್ ಜನರು ಬಲವಂತವಾಗಿ ನಿರಾಶ್ರಿತರಾಗಿದ್ದು, ಮನೆಗಳ ಧ್ವಂಸ ಮತ್ತು ಮುಕ್ತ ಸಂಚಾರಕ್ಕೆ ನಿರ್ಬಂಧ ಉಂಟಾಗಿದೆ.

"ಇಸ್ರೇಲ್ ಕೈಗೊಂಡಿರುವ ಈ ಕಠಿಣ ಕ್ರಮಗಳು ಅನಗತ್ಯ ಮತ್ತು ಅಸಮಾನ ಬಲಪ್ರಯೋಗದ ಆತಂಕವನ್ನು ಸೃಷ್ಟಿಸಿದ್ದು, ಇದು ತಕ್ಷಣವೇ ನಿಲ್ಲಬೇಕು. ನಾಗರಿಕರನ್ನು ಅವರ ಮನೆಗಳಲ್ಲೇ ಕೂಡಿಹಾಕಲಾಗಿದ್ದು, ಭಯದ ವಾತಾವರಣ ಸೃಷ್ಟಿಸಲು ಇಂತಹ ದಂಡನಾತ್ಮಕ ಕ್ರಮಗಳನ್ನು ಜಾರಿಗೊಳಿಸಲಾಗುತ್ತಿದೆ ಎಂದು ಹಿರಿಯ ಇಸ್ರೇಲ್‌ ಅಧಿಕಾರಿಗಳ ಹೇಳಿಕೆಗಳೇ ಸೂಚಿಸುತ್ತಿವೆ. ಇದು ಎಂದಿಗೂ ಒಪ್ಪಿಕೊಳ್ಳಲಾಗದ್ದು" ಎಂದು ಟರ್ಕ್ ಹೇಳಿದ್ದಾರೆ.

ಅಲ್ಲದೆ, ಸ್ಥಳಾಂತರಗೊಂಡ ಜನರಿಗೆ ಮರಳಿ ಮನೆಗಳಿಗೆ ತೆರಳಲು ಅವಕಾಶ ನೀಡಬೇಕು ಮತ್ತು ಅಕ್ರಮ ಒಕ್ಕಲೆಬ್ಬಿಸುವಿಕೆ ಹಾಗೂ ಧ್ವಂಸಗಳಿಗೆ ಇಸ್ರೇಲ್ ಸೂಕ್ತ ಪರಿಹಾರ ನೀಡಬೇಕು ಎಂದು ಆಗ್ರಹಿಸಿರುವ ಅವರು, "ಸಾಮೂಹಿಕ ಶಿಕ್ಷೆಯು ಅಂತರರಾಷ್ಟ್ರೀಯ ಕಾನೂನಿನ ಸ್ಪಷ್ಟ ಉಲ್ಲಂಘನೆ" ಎಂದು ಸ್ಪಷ್ಟಪಡಿಸಿದ್ದಾರೆ.

ಹಿಂದೆಯೂ ಇಸ್ರೇಲ್‌ ನ ಹಲವು ಸಚಿವರು ವೆಸ್ಟ್‌ ಬ್ಯಾಂಕ್ ಮತ್ತು ಗಾಝಾದಲ್ಲಿ ಜನಾಂಗೀಯ ನಿರ್ಮೂಲನೆಗೆ ಬಹಿರಂಗವಾಗಿ ಕರೆ ನೀಡಿದ್ದರು. ಕಳೆದ ತಿಂಗಳು 'ವೈನೆಟ್ ನ್ಯೂಸ್' ಜೊತೆ ಮಾತನಾಡಿದ್ದ ಹಣಕಾಸು ಸಚಿವ ಬೆಜಲೆಲ್ ಸ್ಮೊಟ್ರಿಚ್, "ಆಕ್ರಮಿತ ಭೂಪ್ರದೇಶದಲ್ಲಿ ಇಸ್ರೇಲ್ ಪೂರ್ಣ ಪ್ರಮಾಣದ ಯುದ್ಧ ಸಾರಬೇಕು ಮತ್ತು ಗಾಝಾದಲ್ಲಿ ಮಾಡಿದ್ದನ್ನೇ ಇಲ್ಲೂ ಪುನರಾವರ್ತಿಸಬೇಕು" ಎಂದು ಹೇಳಿದ್ದರಲ್ಲದೆ, ವೆಸ್ಟ್‌ ಬ್ಯಾಂಕ್‌ನ ನಿರಾಶ್ರಿತರ ಶಿಬಿರಗಳನ್ನು ಇಸ್ರೇಲ್ ಪಡೆಗಳು ಈಗಾಗಲೇ 'ತೆರವುಗೊಳಿಸಿವೆ' ಎಂದು ಹೇಳಿದ್ದರು.