ಮೇ ತಿಂಗಳಲ್ಲಿ 1.95 ಲಕ್ಷ ವಾಹನ ಮಾರಾಟ; ಮಾರುತಿ ಸುಝುಕಿ, ಕಿಯಾ ದಾಖಲೆ

ನವದೆಹಲಿ: ಇಂಧನ ದರ ಏರಿಕೆಯ ನಡುವೆಯೂ ಮಾರುತಿ ಸುಝುಕಿ ಇಂಡಿಯಾ ಕಂಪೆನಿಯು ಮೇ ತಿಂಗಳಲ್ಲಿ 1,95,535 ವಾಹನಗಳನ್ನು ಮಾರಾಟ ಮಾಡುವ ಮೂಲಕ ತನ್ನ ಇತಿಹಾಸದಲ್ಲೇ ಅತ್ಯಧಿಕ ಮಾಸಿಕ ಮಾರಾಟ ದಾಖಲಿಸಿದೆ.

ಕಳೆದ ವರ್ಷದ ಮೇ ತಿಂಗಳಲ್ಲಿ ಕಂಪೆನಿಯು 1,38,690 ವಾಹನಗಳನ್ನು ಮಾರಾಟ ಮಾಡಿತ್ತು.

ಅದಕ್ಕೆ ಹೋಲಿಸಿದರೆ ಈ ಬಾರಿ ಗಣನೀಯ ಏರಿಕೆ ಕಂಡುಬಂದಿದೆ.

ಪ್ರಯಾಣಿಕರ ವಾಹನ ವಿಭಾಗದಲ್ಲಿಯೂ ಮಾರುತಿ ಸುಝುಕಿ ಉತ್ತಮ ಸಾಧನೆ ಮಾಡಿದೆ. ಕಳೆದ ವರ್ಷದ ಮೇ ತಿಂಗಳಲ್ಲಿ ಮಾರಾಟವಾಗಿದ್ದ 1,35,962 ಪ್ರಯಾಣಿಕರ ವಾಹನಗಳಿಗೆ ಹೋಲಿಸಿದರೆ, ಈ ವರ್ಷದ ಮೇ ತಿಂಗಳಲ್ಲಿ 1,90,337 ವಾಹನಗಳು ಮಾರಾಟವಾಗಿವೆ. ಈ ಅಂಕಿ-ಅಂಶಗಳಲ್ಲಿ ವಾಣಿಜ್ಯ ವಾಹನಗಳ ಮಾರಾಟ ಸೇರಿಲ್ಲ.

ಮಾರುತಿ ಸುಝುಕಿ ಇಂಡಿಯಾದ ಮಾರುಕಟ್ಟೆ ಮತ್ತು ಮಾರಾಟ ವಿಭಾಗದ ಹಿರಿಯ ಕಾರ್ಯಕಾರಿ ಅಧಿಕಾರಿ ಪಾರ್ಥೊ ಬ್ಯಾನರ್ಜಿ ಮಾತನಾಡಿ, 'ಇಂಧನ ದರ ಏರಿಕೆಯಿಂದ ಸಣ್ಣ ಕಾರುಗಳ ಖರೀದಿ ಮೇಲೆ ಪರಿಣಾಮ ಉಂಟಾಗಿದೆ. ವಿಶೇಷವಾಗಿ ಈ ವಿಭಾಗದ ಗ್ರಾಹಕರು ಹೆಚ್ಚಿನ ಒತ್ತಡ ಎದುರಿಸುತ್ತಿದ್ದಾರೆ. ಆದರೂ ಮಿನಿ ಹಾಗೂ ಕಾಂಪ್ಯಾಕ್ಟ್ ವಿಭಾಗಗಳಲ್ಲಿ ಉತ್ತಮ ಬೆಳವಣಿಗೆ ಸಾಧಿಸಿದ್ದೇವೆ. ಒಟ್ಟಾರೆ ಪ್ರಯಾಣಿಕರ ವಾಹನಗಳ ಮಾರಾಟದಲ್ಲಿ ಶೇ.42ರಷ್ಟು ಏರಿಕೆಯಾಗಿದೆ' ಎಂದು ತಿಳಿಸಿದ್ದಾರೆ.

ಆಲ್ಟೊ ಮತ್ತು ಎಸ್-ಪ್ರೆಸ್ಸೊ ಒಳಗೊಂಡ ಮಿನಿ ಕಾರುಗಳ ಮಾರಾಟವು ಕಳೆದ ವರ್ಷದ ಮೇ ತಿಂಗಳಿನ 6,776 ವಾಹನಗಳಿಂದ ಈ ವರ್ಷದ ಮೇ ತಿಂಗಳಲ್ಲಿ 16,275 ವಾಹನಗಳಿಗೆ ಏರಿಕೆಯಾಗಿದೆ.

ಬಲೆನೊ, ಸೆಲೆರಿಯೊ, ಡಿಝೈರ್, ಇಗ್ನಿಸ್, ಸ್ವಿಫ್ಟ್ ಹಾಗೂ ವ್ಯಾಗನ್ ಆರ್ ಒಳಗೊಂಡ ಕಾಂಪ್ಯಾಕ್ಟ್ ಕಾರುಗಳ ಮಾರಾಟವು ಕಳೆದ ವರ್ಷದ ಮೇ ತಿಂಗಳಿನ 61,960 ವಾಹನಗಳಿಂದ ಈ ವರ್ಷದ ಮೇ ತಿಂಗಳಲ್ಲಿ 81,555 ವಾಹನಗಳಿಗೆ ಹೆಚ್ಚಳ ಕಂಡಿದೆ.

ಪ್ರಯಾಣಿಕರ ವಾಹನ ಮಾರುಕಟ್ಟೆಯಲ್ಲಿ ಮೇ ತಿಂಗಳಲ್ಲಿ ಬಲಿಷ್ಠ ಬೆಳವಣಿಗೆ ದಾಖಲಾಗಿದ್ದು, ಕಿಯಾ ಇಂಡಿಯಾವು ಕೂಡ ದಾಖಲೆಯ ಮಾರಾಟ ಸಾಧಿಸಿದೆ. ಹೀಗಾಗಿ ಹೊಸ ಹಣಕಾಸು ವರ್ಷದ ಆರಂಭದಲ್ಲಿ ಕಂಡುಬಂದ ಮಾರಾಟದ ವೇಗವು ಮುಂದುವರಿದಂತಾಗಿದೆ.

ಜೂನ್ 2026ರಿಂದ ವಿವಿಧ ಮಾದರಿಗಳ ವಾಹನಗಳ ಬೆಲೆಯಲ್ಲಿ ಗರಿಷ್ಠ 30,000 ರೂ.ವರೆಗೆ ಹೆಚ್ಚಳ ಜಾರಿಯಾಗಲಿರುವ ಹಿನ್ನೆಲೆಯಲ್ಲಿ ಗ್ರಾಹಕರು ಮುಂಗಡ ಖರೀದಿಗೆ ಮುಂದಾಗಿರುವುದೂ ಮೇ ತಿಂಗಳ ಮಾರಾಟ ಏರಿಕೆಗೆ ಕಾರಣವಾಗಿರಬಹುದು ಎಂದು ಉದ್ಯಮ ವಲಯದ ಮೂಲಗಳು ತಿಳಿಸಿವೆ.