ಮೇಘಾಲಯ | ಭಾರತ-ಬಾಂಗ್ಲಾದೇಶ ಗಡಿ ಬೇಲಿ ಜೋಡಣೆಗೆ ವಿರೋಧ; ಒಂಟಿತನದ ಭಯದಲ್ಲಿ ಲಿಂಗ್ಖಾಂಗ್ ಗ್ರಾಮಸ್ಥರು

ಶಿಲ್ಲಾಂಗ್: ಭಾರತ-ಬಾಂಗ್ಲಾದೇಶ ಗಡಿಯಲ್ಲಿರುವ ಮೇಘಾಲಯದ ಲಿಂಗ್ಖಾಂಗ್ ಗ್ರಾಮದ ನಿವಾಸಿಗಳು ರವಿವಾರ ಗಡಿ ಬೇಲಿ ನಿರ್ಮಾಣದ ಪ್ರಸ್ತಾವಿತ ಜೋಡಣೆಯನ್ನು ವಿರೋಧಿಸಿ ಪ್ರತಿಭಟನೆ ನಡೆಸಿದರು. ಶೂನ್ಯ ರೇಖೆಯ ಉದ್ದಕ್ಕೂ ಬೇಲಿ ನಿರ್ಮಿಸಬೇಕು. ಇಲ್ಲವಾದರೆ ಗ್ರಾಮವು ದೇಶದ ಉಳಿದ ಭಾಗಗಳಿಂದ ಪ್ರತ್ಯೇಕಗೊಳ್ಳುವ ಅಪಾಯ ಎದುರಾಗಲಿದೆ ಎಂದು ಅವರು ಆತಂಕ ವ್ಯಕ್ತಪಡಿಸಿದರು.

ಪೂರ್ವ ಖಾಸಿ ಹಿಲ್ಸ್ ಜಿಲ್ಲೆಯ ಲಿಂಗ್ಖಾಂಗ್ ಗ್ರಾಮವು ವಾಸ್ತವಿಕವಾಗಿ ಭಾರತ-ಬಾಂಗ್ಲಾದೇಶ ಶೂನ್ಯ ರೇಖೆಯಲ್ಲಿಯೇ ಇದೆ. ಗ್ರಾಮದ ಕೆಲವು ಮನೆಗಳು ಬಾಂಗ್ಲಾದೇಶದ ವಸತಿ ಪ್ರದೇಶದಿಂದ ಕೆಲವೇ ಮೀಟರ್ಗಳ ಅಂತರದಲ್ಲಿವೆ. ಅಂತರರಾಷ್ಟ್ರೀಯ ಒಪ್ಪಂದದ ಪ್ರಕಾರ, ಗಡಿ ಬೇಲಿಯನ್ನು ಶೂನ್ಯ ರೇಖೆಯಿಂದ ಕನಿಷ್ಠ 150 ಗಜ ದೂರದಲ್ಲಿ ನಿರ್ಮಿಸಬೇಕು.

ಕೋವಿಡ್-19 ಸಾಂಕ್ರಾಮಿಕದ ಸಂದರ್ಭದಲ್ಲಿ ಗ್ರಾಮಸ್ಥರು ನಿರ್ಮಿಸಿದ್ದ ಬಿದಿರಿನ ಬೇಲಿಯೇ ಈಗ ಗ್ರಾಮವನ್ನು ಬಾಂಗ್ಲಾದೇಶದಿಂದ ಪ್ರತ್ಯೇಕಿಸುತ್ತಿದೆ. ಅಂದಿನಿಂದ ಪರಿಸ್ಥಿತಿಯಲ್ಲಿ ಹೆಚ್ಚಿನ ಬದಲಾವಣೆ ಆಗಿಲ್ಲ ಎಂದು ಸ್ಥಳೀಯರು ತಿಳಿಸಿದ್ದಾರೆ.

ಗ್ರಾಮಸ್ಥರು ಪೈನುರ್ಸ್ಲಾದ ಉಪವಿಭಾಗಾಧಿಕಾರಿಗೆ ಮನವಿ ಪತ್ರ ಸಲ್ಲಿಸಿ, ನಡೆಯುತ್ತಿರುವ ಬೇಲಿ ನಿರ್ಮಾಣ ಕಾಮಗಾರಿಯನ್ನು ತಕ್ಷಣ ಸ್ಥಗಿತಗೊಳಿಸುವಂತೆ ಆಗ್ರಹಿಸಿದರು.

'ನಾವು ಗಡಿ ಬೇಲಿ ನಿರ್ಮಾಣವನ್ನು ವಿರೋಧಿಸುತ್ತಿಲ್ಲ. ಆದರೆ ನಮ್ಮ ಗ್ರಾಮವು ಭಾರತದ ಭೂಭಾಗದೊಳಗೆ ಮತ್ತು ಬೇಲಿ ವ್ಯಾಪ್ತಿಯೊಳಗೆ ಉಳಿಯುವಂತೆ ಶೂನ್ಯ ರೇಖೆಯಲ್ಲಿಯೇ ಬೇಲಿ ನಿರ್ಮಿಸಬೇಕು' ಎಂದು ಗ್ರಾಮದ ಮುಖ್ಯಸ್ಥ ರಾಮು ಹೇಳಿದರು.

ಪ್ರಸ್ತಾವಿತ ಬೇಲಿ ಜೋಡಣೆಯಿಂದ ಲಿಂಗ್ಖಾಂಗ್ ಗ್ರಾಮವು ಬೇಲಿಯ ಹೊರಭಾಗದಲ್ಲಿ ಉಳಿಯುವ ಸಾಧ್ಯತೆ ಇದೆ. ಇದರಿಂದ ಗ್ರಾಮಸ್ಥರ ಸಂಚಾರ, ಭದ್ರತೆ ಹಾಗೂ ಗ್ರಾಮದ ಭವಿಷ್ಯದ ಕುರಿತು ಕಳವಳ ಉಂಟಾಗಿದೆ ಎಂದು ಅವರು ಹೇಳಿದರು.

'ಬೇಲಿ ಈಗ ಪ್ರಸ್ತಾಪಿಸಿರುವ ಜಾಗದಲ್ಲೇ ನಿರ್ಮಾಣವಾದರೆ ನಮ್ಮ ಗ್ರಾಮವು ಅದರ ಹೊರಭಾಗದಲ್ಲಿ ಉಳಿಯಲಿದೆ. ನಮ್ಮ ಭವಿಷ್ಯದ ಬಗ್ಗೆ ನಾವು ಚಿಂತಿತರಾಗಿದ್ದೇವೆ. ರಾಜ್ಯ ಸರ್ಕಾರವು ನಮ್ಮ ಕಳವಳಗಳನ್ನು ಆಲಿಸಿ, ಭಾರತ ಸರ್ಕಾರದೊಂದಿಗೆ ಈ ವಿಷಯವನ್ನು ಚರ್ಚಿಸಬೇಕು' ಎಂದು ಸ್ಥಳೀಯ ನಿವಾಸಿ ರಿಮಾ ಖೊಂಗ್ಸ್ದಿರ್ ಹೇಳಿದರು.

ಭಾರತ-ಬಾಂಗ್ಲಾದೇಶ ಗಡಿಯನ್ನು ಸುರಕ್ಷಿತಗೊಳಿಸುವ ಉದ್ದೇಶದಿಂದ ಗಡಿ ಬೇಲಿ ನಿರ್ಮಾಣ ಕಾರ್ಯ ಮುಂದುವರಿದಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಮೇಘಾಲಯವು ಬಾಂಗ್ಲಾದೇಶದೊಂದಿಗೆ 444 ಕಿ.ಮೀ ಉದ್ದದ ಗಡಿಯನ್ನು ಹಂಚಿಕೊಂಡಿದೆ. ಇದರಲ್ಲಿ ಸ್ಥಳೀಯ ಸಮಸ್ಯೆಗಳು ಹಾಗೂ ದುರ್ಗಮ ಭೂಪ್ರದೇಶದ ಕಾರಣದಿಂದ 80 ಕಿ.ಮೀ ಗಿಂತ ಕಡಿಮೆ ಭಾಗಕ್ಕೆ ಇನ್ನೂ ಬೇಲಿ ನಿರ್ಮಾಣವಾಗಿಲ್ಲ.

ಲಿಂಗ್ಖಾಂಗ್ ಗ್ರಾಮದಲ್ಲಿ ನಿವಾಸಿಗಳ ಭದ್ರತೆ ಮತ್ತು ನೆರವಿಗಾಗಿ ಈಗಾಗಲೇ ಹೊರಠಾಣೆ ಸ್ಥಾಪಿಸಲಾಗಿದೆ ಎಂದು ಗಡಿ ಭದ್ರತಾ ಪಡೆ (BSF)ಯ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

'ಗ್ರಾಮದಲ್ಲಿ BSF ಸಿಬ್ಬಂದಿ ನಿಯೋಜಿತರಾಗಿದ್ದಾರೆ. ನಿವಾಸಿಗಳ ಸುರಕ್ಷತೆಯನ್ನು ಖಚಿತಪಡಿಸಲು ಅಗತ್ಯವಿರುವ ಎಲ್ಲ ಭದ್ರತಾ ಕ್ರಮಗಳನ್ನು ಕೈಗೊಳ್ಳಲಾಗುತ್ತಿದೆ' ಎಂದು ಅವರು ಹೇಳಿದರು.

ಜನವಸತಿ ಪ್ರದೇಶಗಳಿಗೆ ಪರಿಣಾಮ ಬೀರುವ ಭಾಗಗಳಲ್ಲಿ ಶೂನ್ಯ ರೇಖೆಯ ಉದ್ದಕ್ಕೂ ಏಕಸಾಲಿನ ಬೇಲಿ ನಿರ್ಮಾಣದ ವಿಷಯವನ್ನು ಭಾರತವು ಬಾಂಗ್ಲಾದೇಶದೊಂದಿಗೆ ಚರ್ಚಿಸಿದೆ ಎಂದು ಗೃಹ ಇಲಾಖೆಯ ಹಿರಿಯ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

'ಶೂನ್ಯ ರೇಖೆಯಲ್ಲೇ ಏಕಸಾಲಿನ ಬೇಲಿ ನಿರ್ಮಿಸುವ ಪ್ರಸ್ತಾಪದ ಕುರಿತು ಮಾತುಕತೆ ಆರಂಭವಾಗಿದೆ. ಆದರೆ ಈ ವಿಷಯದ ಬಗ್ಗೆ ಬಾಂಗ್ಲಾದೇಶದ ಹೊಸ ಸರ್ಕಾರ ಇನ್ನೂ ನಿರ್ಧಾರ ಕೈಗೊಂಡಿಲ್ಲ' ಎಂದು ಅವರು ಹೇಳಿದರು.